કોંગ્રેસ નેતા રાહુલ ગાંધીએ કટાક્ષ કરતા જણાવ્યું કે મોદી સરકારે ટેક્સ વસુલીમાં PHD કરી છે. સરકારે કોર્પોરેટ ટેક્ષથી પણ વધુ કમાણી પેટ્રોલ-ડીઝલથી કરી છે.
પેટ્રોલ ડીઝલની કિંમતો પર રાહુલ ગાંધીના મોદી સરકાર પર પ્રહાર
સરકારે કોર્પોરેટ ટેક્ષથી પણ વધુ કમાણી પેટ્રોલ-ડીઝલથી કરી
કેન્દ્ર સરકારે ટેક્સ વસુલીમાં PHD કરી
રવિવારે ઓઈલ માર્કેટિંગ કંપનીઓ પેટ્રોલ અને ડીઝલના ભાવમાં 29 પૈસાનો વધારો થયો છે. કોંગ્રેસ નેતા રાહુલ ગાંધી કોરોના મહામારી દરમ્યાન પણ વડાપ્રધાન નરેન્દ્ર મોદી અને તેમની સરકાર વિરુદ્ધ આકરા ચાબખા મારવાની કોઈ તક છોડતા નથી. પેટ્રોલ-ડીઝલની વધતી કિંમતો સંદર્ભે રાહુલ ગાંધીએ ફરી એક વખત કેન્દ્ર સરકાર પર પ્રહાર કર્યા છે. રાહુલ ગાંધીએ ટ્વિટર પર એક હિન્દી અખબારના લેખને શેર કર્યો છે, જેનું શીર્ષક છે- સરકારે આવક અને કોર્પોરેટ ટેક્ષથી પણ વધુ કમાણી પેટ્રોલ-ડીઝલથી કરી છે. આ લેખને આધાર બનાવી રાહુલ ગાંધીએ મોદી સરકાર પર પ્રહાર કરી નિશાન સાધ્યું કે કેન્દ્ર સરકારે ટેક્સ વસુલીમાં PHD કરી છે.
જનતાએ 5.25 લાખ કરોડ રૂપિયા ચૂકવ્યાં
ખરેખર, રાહુલ ગાંધીએ પોતાના ટ્વિટર એકાઉન્ટ પર લખેલા લેખ મુજબ, ભારત સરકારને આવકવેરા ખાતા પાસેથી 4.69 લાખ કરોડ રૂપિયા મળ્યાં છે, જ્યારે ખાનગી કંપનીઓએ 4.57 લાખ કરોડનો કોર્પોરેટ ટેક્સ જમા કર્યો છે. તો બીજી તરફ આ બંનેથી વધારે ટેક્સ જનતાએ પેટ્રોલ-ડીઝલ પર એક્સાઈઝ ડ્યુટી અને વેટ તરીકે 5.25 લાખ કરોડ રૂપિયા ચૂકવ્યાં છે. આ આંકડા માત્ર ડિસેમ્બર 2020 સુધીના છે.
કોંગ્રેસના અન્ય નેતાઓ પણ કરે છે સરકારનો ઘેરાવ
ઉલ્લેખનીય છે કે, શુક્રવારે પણ રાહુલ ગાંધીએ ટ્વિટ કરી મોદી સરકાર પર પ્રહાર કર્યા હતા. જેમાં તેમણે કહ્યું હતું કે, મોદી સરકારનો વિકાસ એવો છે કે જો કોઈ દિવસે પેટ્રોલ-ડીઝલની કિંમતો ના વધે તો મોટા સમાચાર બની જાય છે. આ સાથે પ્રિયંકા ગાંધી અને કોંગ્રેસના અન્ય નેતા અવાર-નવાર સરકારની વિરુદ્ધમાં ટ્વિટ કરતા હોય છે. આ અગાઉ તેમણે કહ્યું હતું કે, દેશની જીડીપી ક્રેશ થઈ રહી છે, બેરોજગારી વધી રહી છે.