શહેરના વસ્ત્રાપુર-થલતેજ વિસ્તારમાં PG (પેઈંગ ગેસ્ટ) તરીકે રહો છો અને દરવાજા ખુલ્લા રાખો છો તો સાવધાન રહેજો, કારણ કે પેઈંગ ગેસ્ટ તરીકે રહેતાં યુવક-યુવતીના રૂમને ટાર્ગેટ બનાવી ચોરી કરતી ગેંગ શહેરમાં સક્રિય બની છે, વસ્ત્રાપુર વિસ્તારમાં ચાર જ દિવસમાં 14થી વધુ મોબાઈલની PGમાંથી ચોરી થયાનો બનાવ બનતાં ચકચાર મચી ગઈ છે
સ્વરૂપવાન યુવતીઓએ કરી ચોરી થઈ CCTV કેમેરામાં કેદ
શહેરમાં અંદાજિત 500 જેટલા PG વિસ્તાર
મોટાભાગના PG દરવાજો બંધ કરતા નથી તેથી બને છે શિકાર
વસ્ત્રાપુર તેમજ સેટેલાઈટ વિસ્તારમાં પેઈંગ ગેસ્ટ તરીકે રહેતા યુવક-યુવતીઓની સંખ્યા વધુ છે. છેલ્લા કેટલાય સમયથી પેઈંગ ગેસ્ટ તરીકે રહેતા યુવક-યુવતીઓના રૂમમાં ચોરીના બનાવમાં વધારો થયો છે. તાજેતરમાં વસ્ત્રાપુર વિસ્તારના ત્રણ પીજીમાં ચોરી થઇ છે.
થલતેજના PG બન્યા શિકાર
થલતેજ વિસ્તારના વિહારધામના ફ્લેટ નંબરઃ એ/6માં ચાલતા પીજીમાં જયદીપ પરમાર (ઉ.વ. 21) તેના બીજા પાંચ મિત્રો સાથે રહે છે. બે દિવસ પહેલાં જયદીપ અને તેના મિત્રો રાબેતા મુજબ તેમના રૂમમાં સૂઈ ગયા હતા. બીજા દિવસે વહેલી સવારે જયદીપે જાગીને જોતાં તેનો મોબાઈલ ગાયબ હતો. રૂમમાં તપાસ કરતાં અન્ય પાંચ મિત્રોના ફોન પણ ગાયબ હતા.
એકસાથે ચાર મોબાઈલ ગાયબ
તા. 30 સપ્ટેમ્બરના રોજ થલતેજમાં આવેલા જય અંબેનગર પાસેના મકાન નંબરઃ એ/13ના કે. જે. પીજીમાં જય રાજપરા (ઉ.વ. 26) તેના બીજા ત્રણ મિત્રો સાથે રહે છે. જય અને તેના મિત્રો બહાર ફરી આવ્યા બાદ તેમના રૂમમાં સૂઈ ગયા હતા. બીજા દિવસે સવારના પોણા છ વાગ્યાની આસપાસ તેણે જાગીને જોતાં તેનો મોબાઈલ ગાયબ હતો. આથી રૂમમાં તપાસ કરતાં અન્ય ત્રણ મિત્રોના પણ ગાયબ હતા.
વહેલી સવારે મોબાઈલ ચોરી
PGમાંથી મોબાઈલ ચોરીની ઘટના તા. 1 ઓક્ટોબરના રોજ વસ્ત્રાપુરમાં આવેલા અપૂર્વ એપાર્ટમેન્ટના મકાન નંબરઃ એ/9, જલારામ પીજીમાં અમન રાજપરા (ઉ.વ.21) તથા તેની સાથે તેના બીજા મિત્રો પણ રહે છે. અમન અને તેના મિત્રો રૂમમાં સૂઈ ગયા હતા. બીજા દિવસે સવારના પોણા છ વાગ્યાની આસપાસ તેણે જાગીને જોયું તો તેનો મોબાઈલ ગાયબ હતો. આથી રૂમમાં તપાસ કરતાં અન્ય ત્રણ મિત્રોના ફોન પણ ગાયબ હતા.
સ્વરૂપવાન યુવતીઓએ કરી ચોરી થઈ CCTV કેમેરામાં કેદ
PGમાં મૂકેલા સીસીટીવી કેમેરા ચેક કરતાં બે સ્વરૂપવાન યુવતીઓ પીજીમાં આવી હોવાની વાત બહાર આવી હતી, જે પૈકી એક યુવતી PGમાં પ્રવેશ કરીને ચાર મોબાઈલની ચોરી કરીને ફરાર થઇ ગઈ હતી. પોલીસે હાલ PGમાં ચોરીની ઘટનાઓ વધુ બની રહી હોવાના કારણે તપાસનો દોર શરૂ કરી દીધો છે.
શહેરમાં અંદાજિત 500 જેટલા PG
શહેરમાં અંદાજિત 500 જેટલાં PG-હોસ્ટેલ ચાલી રહ્યાં છે, જેમાં અભ્યાસ કરતાં અથવા નોકરી કરતાં હજારો યુવક અને યુવતીઓ રહે છે. શહેરના પોશ વિસ્તાર જેવા કે વસ્ત્રાપુર, સોલા, સેટેલાઇટ, શ્યામલ, આનંદનગર, બોપલ, ઘુમા, નવરંગપુરા, ચાંદખેડા, મિણનગર, બાપુનગર, નરોડા સહિતના વિસ્તારમાં PG ચાલે છે,
મોટાભાગના PG દરવાજો બંધ કરતા નથી
મોટા ભાગના PGમાં રહેતાં યુવક-યુવતીઓ મકાનનો દરવાજો બંધ નથી કરતાં, કારણ કે PGમાં રહેતાં યુવક-યુવતીઓ ગમે ત્યારે PGમાં આવતાં હોય છે અને તેઓ મોડી રાતે આવતાં હોવાથી અન્ય મિત્રો સૂઈ ગયા હોય છે. પીજી જે વિસ્તારમાં ચાલતા હોય છે તેની આસપાસ કામ કરવા માટે આવતા ઘરઘાટી કે પછી અજણ્યા શખ્સો PGમાં રહેતાં યુવક-યુવતી પર વોચ રાખતાં હોય છે અને તકનો લાભ લઈને મોબાઈલ, લેપટોપ સહિતની ચીજવસ્તુઓની ચોરીની ઘટના અંજામ આપીને ફરાર થઇ જતાં હોય છે.
PGમાંથી મોબાઈલ ચોરી સામાન્ય
PGમાંથી મોબાઈલ ચોરી કરનાર ગેંગ ખાસ કરીને મોબાઈલ કે અન્ય ચીજવસ્તુની ચોરી કરવા માટે મોટા ભાગે સવારના 5-30 થી 7 વાગ્યાનો સમય પસંદ કરતાં હોય છે, કારણ કે યુવક-યુવતીઓ મોડી રાત સુધી જાગતાં હોય છે અને મોડાં ઊઠતાં હોય છે તથા તે ગાઢ નિદ્રામાં હોવાથી મોબાઈલ-પર્સ તેમજ લેપટોપ ચોરતી ગેંગ વહેલી સવારે PGમાં પ્રવેશ કરીને ચોરી કરીને નાસી જાય છે. આ અંગે અલગ અલગ વિસ્તારના પોલીસ સ્ટેશનમાં મોબાઈલ ચોરીની ફરિયાદ તો નોંધાય છે, પરંતુ પોલીસ ચોર ટોળકી સુધી પહોંચવામાં નિષ્ફળ રહે છે.