ટ્રાયલ / ટેસ્ટમાં ફેલ થઈ કોરોનાથી લડનારી ફાઇઝરની paxlovid દવા, ઓછું ન કરી શકી કોરોનાનું જોખમ

• કોરોના સામે લડવા માટે ફાઈઝરના પ્રયાસને મોટો ઝટકો લાગ્યો
• Pfizer દ્વારા બનાવવામાં આવેલી દવા Paxlovid ટેસ્ટમાં ફેલ
• કંપનીએ ખુદ મીડિયાને આ અંગેની જાણકારી આપી

કોરોના સામે લડવા માટે ફાઈઝરના પ્રયાસને મોટો ઝટકો લાગ્યો છે. કોરોનાને લઈને Pfizer દ્વારા બનાવવામાં આવેલી જાણીતી દવા Paxlovid ટેસ્ટમાં ફેલ થઈ ગઇ છે. એટલે કે તાજેતરમાં જ કોરોના સંક્રમિત પર તેનું પરીક્ષણ કરવામાં આવ્યું. આ દરમિયાન, આ દવા સંક્રમિતોમાં કોવિડ-19ના જોખમને ઘટાડવા તેના પ્રાથમિક લક્ષ્યને પૂર્ણ કરવામાં નિષ્ફળ રહી. કંપનીએ ખુદ મીડિયાને આ જાણકારી આપી છે.

કંપનીએ એક નિવેદન બહાર પાડ્યું

Pfizer એ શુક્રવારે એક નિવેદનમાં જણાવ્યું હતું કે, PaxLovid ઘરેલુ સંપર્કના માધ્યમથી આવતા પુખ્ત વયના લોકોમાં કોવિડ-19 સંક્રમણના ખતરાને રોકી નથી શક્યો. જો કે, પ્લેસિબોની સરખામણીમાં આ દવાએ લગભગ ત્રીજા ભાગનું જોખમ ઘટાડ્યું હોવા છતાં આ સંખ્યા જરૂરી સંખ્યા કરતા ઘણી ઓછી છે.

આ દવાની આતુરતાથી રાહ જોઈ રહ્યાં છીએ

મુખ્ય કાર્યકારી અધિકારી આલ્બર્ટ બૌર્લાએ કહ્યું કે, તેઓ અભ્યાસના પરિણામોથી નિરાશ છે. પૅક્સલોવિડનો ઉપયોગ એવાં લોકો માટે વિસ્તારિત કરવાનો હતો કે જેઓએ હજુ સુધી COVID-19 માટે પરીક્ષણ કર્યું ન હતું પરંતુ એક ચેપગ્રસ્ત વ્યક્તિના સંપર્કમાં આવ્યા હોય. બજારમાં તેની આતુરતાથી રાહ જોવાઈ રહી છે. એનાલિટિક્સ ગ્રુપ એરફિનિટી લિમિટેડની આગાહી મુજબ, 2022માં આશરે 24 બિલિયન ડૉલરના અંદાજિત વેચાણ સાથે PaxLovid પહેલેથી જ ફાર્માસ્યુટિકલ ઉદ્યોગમાં સૌથી ઝડપી વેચાણકર્તાઓમાંનું એક છે.

તાજેતરમાં જ મળી હતી મંજૂરી

તમને જણાવી દઈએ કે, ફાઈઝરની આ દવાને ડ્રગ કંટ્રોલર જનરલ ઓફ ઈન્ડિયા (DCGI) દ્વારા ગયા અઠવાડિયે મંજૂરી મળી હતી. કોવિડ-19 વિરૂદ્ધ આ દવાના ઇમરજન્સી ઉપયોગની મંજૂરી આપવામાં આવી હતી. એવું કહેવામાં આવ્યું હતું કે, આ દવા 8થી 10 દિવસમાં બજારમાં ઉપલબ્ધ થશે, પરંતુ તેનું તાજેતરમાં જ આવેલા પરિણામથી લોકોની રાહ વધી જશે.