રાહતના સમાચાર / પેટ્રોલ-ડીઝલના ભાવ ઘટાડા અંગે કેન્દ્રીય મંત્રીનું સૂચક નિવેદન, જાણો ક્યારથી ઘટી શકે છે કિંમત 

• પેટ્રોલ-ડીઝલના ભાવ મુદ્દે કેન્દ્રીય પ્રધાનનું નિવેદન 
• મોદી સરકારના મંત્રીએ કહ્યું શિયાળા પછી ઘટી શકે છે ભાવ
• માંગમાં વધારો થતાં કિંમતોમાં વધારો થયો છે

કેન્દ્રીય પેટ્રોલિયમ મંત્રી ધર્મેન્દ્ર પ્રધાને કહ્યું કે શિયાળો પૂરો થાય ત્યારે તે પછીથી ઓઇલના ભાવમાં પણ નરમાઇ આવી શકે છે. તેમણે કહ્યું કે આ સિઝનમાં ઓઇલ ના ભાવમાં વધારો થાય છે. ઘણા શહેરોમાં ઓઇલ ના ભાવ લિટર દીઠ 100 રૂપિયાની સપાટી પાર કર્યા બાદ વિપક્ષો દ્વારા વિરોધ પ્રદર્શન ચાલુ છે.

શિયાળો પૂરો થતાં જ ઘટી શકે છે કિંમતો 

કેબિનેટ મંત્રી ધર્મેન્દ્ર પ્રધાને કહ્યું કે આંતરરાષ્ટ્રીય બજારમાં ક્રૂડના ભાવમાં થયેલા વધારાની અસર ગ્રાહકો પર પણ પડી છે. શિયાળો થતાં જ કિંમતોમાં થોડો ઘટાડો થશે. આ આંતરરાષ્ટ્રીય બાબત છે. માંગમાં વધારો થતાં કિંમતોમાં વધારો થયો છે. આ શિયાળામાં થાય છે અને કિંમતોમાં વધુ ઘટાડો થશે.

શુક્રવારે દિલ્હીમાં પેટ્રોલ 90.93 રૂપિયા પ્રતિ લિટર અને ડીઝલની કિંમતો 81.31 રૂપિયા પ્રતિ લિટર થઈ ગઈ હતી. જ્યારે મુંબઇમાં પેટ્રોલ 97.34 અને ડીઝલ 88.44 રૂપિયા પ્રતિ લિટર વેચાઇ રહ્યું છે. કોલકાતામાં પેટ્રોલની કિંમત પ્રતિ લિટર 94.68 અને ડીઝલના લિટર દીઠ 84.20 રૂપિયા છે અને બેંગલોરમાં પેટ્રોલ 93.98 અને ડીઝલ 86.21 રૂપિયા પ્રતિ લિટર પર વેચાઇ રહ્યું છે.

દેશમાં અમુક જગ્યાએ પેટ્રોલ-ડીઝલના ભાવ ૧૦૦ને પાર પહોંચી ગયા છે 

રાજસ્થાન અને મધ્યપ્રદેશમાં કેટલીક જગ્યાએ પેટ્રોલના ભાવ 100 રૂપિયાને પાર કરી ગયા છે. આ રાજ્યો પેટ્રોલ-ડીઝલ વેટ વસૂલ કરે છે. ઓઇલ  પરનો ટેક્સ ઘટાડવામાં નહીં આવે અથવા ઓઇલ  ઉત્પાદક દેશો એપ્રિલથી ઝડપથી ઉત્પાદનમાં વધારો નહીં કરે ત્યાં સુધી આ સ્થિતિ રહેશે. 

ત્રણ વોલ સ્ટ્રીટ બેંકો ગોલ્ડમેન સાશ, મોર્ગન સ્ટેનલી અને બેન્ક ઓફ અમેરિકા છેલ્લા બે દિવસમાં, આગામી કેટલાક મહિનામાં ઓઇલના ભાવ બેરલ દીઠ 70 ડોલર સુધી પહોંચી જવાની આગાહી કરી રહી છે. તે પછી પણ, ભાવ 75 ડોલર સુધી આવે તેવી અપેક્ષા છે. ગોલ્ડમેનના જણાવ્યા મુજબ ઓપેક જો તેનું ઉત્પાદન વધારે તો પણ ભાવ નીચા આવવાની કોઈ જ શક્યતા નથી કેમ કે ડિમાન્ડ મુજબ સપ્લાય નથી.