રશિયાએ ચેતવણી આપી છે કે, તેઓ આંતરરાષ્ટ્રીય બજારમાં ક્રૂડ ઓઇલનું સપ્લાય પણ રોકી દેશે અને યુરોપને મળતો ગેસ સપ્લાય પણ બંધ કરી દેશે. તો શું પુતિનના આ નિર્ણયથી ભારતમાં પેટ્રોલની કિંમત 150 રૂપિયા પ્રતિ લિટર થઇ જશે?
તેલ અને ગેસની આયાત પર પ્રતિબંધથી થશે નુકસાન!
ક્રૂડ ઓઈલના ભાવમાં અણધાર્યો ઉછાળો
ભારતીયોના ખિસ્સા પર થઇ શકે છે આની અસર
રશિયા-યુક્રેન વચ્ચે સતત 14 દિવસથી યુદ્ધ ચાલી રહ્યું છે. રશિયા સતત યુક્રેન પર હુમલો કરી રહ્યું છે અને તેની સેના પણ ધીમે-ધીમે કીવ તરફ આગળ વધી રહ્યું છે. દરમિયાન, US અને બ્રિટને રશિયન તેલ અને ગેસની આયાત પર પ્રતિબંધ લગાવી દીધો છે. ત્યારે સામે રશિયાએ પણ ચેતવણી આપી છે કે, આવું કરવાથી તેઓ પણ આંતરરાષ્ટ્રીય બજારમાં ક્રૂડ ઓઇલનું સપ્લાય પણ રોકી દેશે અને યુરોપને મળતો ગેસ સપ્લાય પણ બંધ કરી દેશે. તો શું પુતિનના નિર્ણયથી ભારતમાં પેટ્રોલની કિંમત 150 રૂપિયા પ્રતિ લિટર થઇ જશે?
જાણો રશિયાના આ નિર્ણયની શું અસર થશે?
આ વિશ્વયુદ્ધની રશિયાની અર્થવ્યવસ્થા પર ખરાબ અસર પડી રહી છે અને તેના પુરાવા પણ હવે મળી રહ્યાં છે. જો રશિયા ક્રૂડ ઓઈલનો પુરવઠો બંધ કરે છે, તો આંતરરાષ્ટ્રીય બજારમાં ક્રૂડ ઓઈલના ભાવ $300 પ્રતિ બેરલ સુધી પહોંચી જશે, જે પહેલેથી જ ઐતિહાસિક સ્તર પર છે. રશિયા-યુક્રેન વચ્ચેના યુદ્ધના કારણે ક્રૂડ ઓઈલના ભાવ $139 પ્રતિ બેરલ થઈ ગયા છે, જે 2008 પછીની સૌથી વધારે કિંમત છે.
ક્રૂડ ઓઈલના ભાવમાં અણધાર્યો ઉછાળો
રશિયાના નાયબ વડાપ્રધાન એલેક્ઝાન્ડર નોવાકે એક નિવેદનમાં જણાવ્યું હતું કે, "એ બિલકુલ સ્પષ્ટ છે કે, રશિયન તેલના અસ્વીકારના વૈશ્વિક બજાર માટે વિનાશક પરિણામો આવશે." ભાવમાં અણધાર્યો ઉછાળો જોવા મળશે. તે $300 પ્રતિ બેરલ હશે.' નોવાકે કહ્યું કે, 'યુરોપને રશિયા પાસેથી મળેલા તેલના જથ્થાને બદલવામાં એક વર્ષથી વધુ સમય લાગશે અને તેને તેની ખૂબ જ ઊંચી કિંમત ચૂકવવી પડશે.'
ભારતીયોના ખિસ્સા પર પડશે સીધી અસર
જો આંતરરાષ્ટ્રીય બજારમાં ક્રૂડ ઓઇલની કિંમત વધારે વધશે તો તેની સીધી જ અસર ભારત અને ભારતના સામાન્ય લોકોના ખિસ્સા પર પડશે. ક્રૂડ ઓઈલના ભાવમાં વધારા બાદ એવું બની શકે કે, ભારતમાં પેટ્રોલની કિંમત આવનારા મહિનામાં 150 રૂપિયા પ્રતિ લીટરના આંકડાને પાર કરી શકે છે. જો કે, સરકાર પોતાના ખિસ્સામાંથી કેટલાં પૈસા ખર્ચે છે અને સામાન્ય લોકોને કેટલી રાહત આપે છે તે તો હવે જોવાનું જ રહ્યું.