રાહત / સતત આઠમા દિવસે પેટ્રોલ અને ડીઝલના ભાવમાં ઘટાડો

આજે સતત આઠમા દિવસે પેટ્રોલ અને ડીઝલના ભાવમાં ઘટાડાનો સિલસિલો જારી રહ્યો છે. આજે દિલ્હીમાં પેટ્રોલના ભાવમાં પ્રતિલિટર ૧૬ પૈસાનો અને ડીઝલના ભાવમાં પ્રતિલિટર ૩૪ પૈસાનો ઘટાડો થયો છે. આ ઘટાડાના પગલે દિલ્હીમાં પેટ્રોલનો ભાવ ઘટીને પ્રતિલિટર રૂ. ૭૧.૦૭ અને ડીઝલ પ્રતિલિટર રૂ. ૬૫.૨૨ની સપાટીએ પહોંચી ગયું છે.

એ જ રીતે મુંબઇમાં પેટ્રોલ પ્રતિલિટર રૂ. ૭૬.૭૬, ચેન્નઇમાં રૂ. ૭૩.૮૪, કોલકાતામાં રૂ. ૭૩.૩૧ના ભાવે વેચાઇ રહ્યું છે. ડીઝલ પણ મુંબઇમાં પ્રતિલિટર ૬૮.૩૯, ચેન્નઇમાં રૂ. ૬૯, કોલકાતામાં રૂ. ૬૭.૧૪ની સપાટીએ પહોંચી ગયું છે.

નિષ્ણાતોના જણાવ્યા પ્રમાણે પેટ્રોલ અને ડીઝલના ભાવમાં હજુ આગામી દિવસોમાં પણ વધુ ઘટાડો થવાની સંભાવના છે, કારણ કે આંતરરાષ્ટ્રીય બજારમાં ક્રૂડ ઓઇલના ભાવ સતત ગગડી રહ્યા છે. આજે ક્રૂડના આંતરરાષ્ટ્રીય ભાવમાં ૦.૪૪ ટકાનો ઘટાડો થયો હતો અને ક્રૂડ પ્રતિબેરલ ૬૧.૭૦ ડોલર પર ટ્રેડ કરી રહ્યું છે.