રશિયા-યુક્રેન વચ્ચે ચાલતા યુદ્ધ વચ્ચે ક્રૂડ ઓઇલની વર્તમાન કિંમતોને જોતા એવું લાગી રહ્યું છે કે, હવે પેટ્રોલનાં ભાવમાં 15 રૂપિયા સુધીનો વધારો થઇ શકે છે.
ડીઝલ મોંઘુ થતા શાકભાજીના ભાવમાં વધારો
ક્રૂડ ઓઈલના ભાવમાં થયો ફરી વધારો
રિયલ એસ્ટેટથી લઈને વધશે શાકભાજી સુધીનાં ભાવ
રશિયા-યુક્રેન વચ્ચે ચાલી રહેલા યુદ્ધના કારણે માત્ર પેટ્રોલ-ડીઝલ જ નહીં પરંતુ તમામ પ્રકારની ખાદ્ય ચીજોના ભાવમાં વધારો થયો છે. ભલે તમે પેટ્રોલ-ડીઝલ સીધું ખરીદો કે ન ખરીદો, પરંતુ મોંઘવારીનો માર તમારી પર પણ પડશે. ત્યારે મોંઘવારીની આ અસર હવે શાકભાજીથી લઈને ઘર સુધીની કિંમતોમાં વધારો થવાનું કારણ બની રહી છે.
સતત બે દિવસના વધારા બાદ આજે પેટ્રોલ-ડીઝલના ભાવમાં કોઈ જ ફેરફાર જોવા નથી મળ્યો. પરંતુ ભાવમાં વધુ વધારો થવાની સંભાવના છે. કારણ કે ગુરુવારે ક્રૂડ ઓઇલની કિંમત ફરી બેરલ દીઠ 120 ડોલર પ્રતિ બેરલની નજીક પહોંચી ગઈ છે.
શાકભાજીથી લઈને ઘરવખરીની કિંમતોમાં થઇ શકે છે વધારો
વાસ્તવમાં ક્રૂડ ઓઇલની વર્તમાન કિંમતોને જોતા એવી આશંકા સેવાઇ રહી છે કે, પેટ્રોલની કિંમતમાં 15 રૂપિયા પ્રતિ લીટર સુધીનો વધારો થઈ શકે છે. 137 દિવસના વિરામ બાદ 22 અને 23 માર્ચે પેટ્રોલ અને ડીઝલના ભાવમાં પ્રતિ લિટર 80 પૈસાનો વધારો કરવામાં આવ્યો હતો. જો કે, તમને જણાવી દઇએ કે, ભલે તમે પેટ્રોલ-ડીઝલ સીધું ખરીદો કે ન ખરીદો પરંતુ મોંઘવારીનો ફટકો તમને જરૂરથી પડશે. મોંઘવારીની આ અસર હવે શાકભાજીથી લઈને ઘર સુધીની કિંમતોમાં વધારો થવાનું કારણ બની રહી છે.
હાલમાં દેશના 4 મહાનગરોમાં પેટ્રોલ-ડીઝલના ભાવ કંઇક આ મુજબ છે. દિલ્હીમાં પેટ્રોલ 97.01 રૂપિયા પ્રતિ લિટર જ્યારે ડીઝલ 88.27 રૂપિયા પ્રતિ લિટર મળી રહ્યું છે. મુંબઈમાં પેટ્રોલની કિંમત 111.67 રૂપિયા અને ડીઝલ 95.85 રૂપિયા પ્રતિ લિટર છે. કોલકાતામાં પેટ્રોલ 106.34 રૂપિયા જ્યારે ડીઝલ 91.42 રૂપિયા પ્રતિ લિટર છે. તો ચેન્નાઈમાં પણ પેટ્રોલ 102.91 રૂપિયા અને ડીઝલ 92.95 રૂપિયા પ્રતિ લિટરે મળી રહ્યું છે.
નિષ્ણાંતોના મતે પેટ્રોલ-ડીઝલના ભાવ સતત કેટલાંય દિવસો સુધી વધી શકે છે. ત્યારે આવી સ્થિતિમાં આવનારા દિવસોમાં લોકોની મુશ્કેલીઓ અનેક ગણી વધી શકે છે. કારણ કે જ્યારે પેટ્રોલ-ડીઝલના ભાવમાં છેલ્લે ફેરફાર કરવામાં આવ્યો હતો ત્યારે આંતરરાષ્ટ્રીય સ્તરે ક્રૂડ ઓઈલની કિંમત બેરલ દીઠ 82 ડૉલર પ્રતિ બેરલ હતી, જે હવે વધીને 120 ડૉલરની નજીક પહોંચી ગઈ છે.
પેટ્રોલના ભાવમાં થઈ શકે છે 15 રૂપિયા સુધીનો વધારો
એ હિસાબે જો જોઇએ તો દેશમાં પેટ્રોલ-ડીઝલની કિંમતમાં લગભગ 15 રૂપિયાનો વધારો થઈ શકે છે. આ વધારાની અસરથી ફળ-શાકભાજી સહિતના મકાનોના ભાવ પણ વધશે તે નક્કી. રિયલ એસ્ટેટ સેક્ટરે વધતી જતી મોંઘવારીને જોતાં મકાનોની કિંમતમાં 10થી 15 ટકાનો વધારો થવાની આગાહી વ્યક્ત કરી છે.
માત્ર એટલું જ નહીં પરંતુ રશિયા-યુક્રેન વચ્ચેના યુદ્ધના કારણે પેટ્રોલ-ડીઝલથી માંડીને તમામ પ્રકારની ખાદ્ય ચીજોના ભાવ પણ વધી ગયા છે. જેમાં મુખ્યત્વે સૂર્યમુખી, પામ ઓઇલ, સોયા તેલ, વનસ્પતિ તેલ, સીંગદાણા તેલ, ઘઉં, લોટ અને સરસવનું તેલ સામેલ છે. છેલ્લાં એક મહિનામાં સૂર્યમુખી તેલના ભાવમાં 19.6%, પામ ઓઇલમાં 14.5%, સોયા તેલમાં 11.1%, વનસ્પતિ તેલમાં 9.8%, સીંગદાણાના તેલમાં 5.3%, ઘઉંના તેલમાં 1.3%, લોટમાં 0.9% અને સરસવના તેલમાં 0.4%નો વધારો થયો છે. એ સિવાય કંપનીઓ પણ વધતી જતી કિંમતને ધ્યાનમાં રાખીને રેફ્રિજરેટર-AC સહિત તમામ પ્રકારની ઈલેક્ટ્રોનિક્સ વસ્તુઓની કિંમતો વધારવા માટે તૈયાર છે.