શહેરમાં પેટ્રોલની અછત સર્જાઇ છે. જુહાપુરા વિસ્તારમાં પેટ્રોલની અછત જોવા મળી છે. પેટ્રોલ પંપ પર પેટ્રોલ આઉટ ઓફ સ્ટોકના બોર્ડ લાગતા સ્થાનિકો ટૅન્શનમાં મુકાયા હતા.
અમદાવાદમાં પેટ્રોલનો સ્ટોક ખૂટ્યો
જુહાપુરામાં નાયરાના પેટ્રોલ પંપ પર પેટ્રોલ ખૂટ્યું
2 દિવસથી પેટ્રોલ પંપ પર સ્ટોક નથી આવ્યો
રાજ્ય (Gujarat) માં છેલ્લાં કેટલાંય દિવસથી ઈંધણની અછત સર્જાવાની અફવાઓ વહેતી થઇ છે. આવી પરિસ્થિતિ વચ્ચે અમદાવાદના ટ્રાફિકથી સતત ધમધમતા વિસ્તાર જુહાપુરામાં પેટ્રોલની અછત જોવા મળી છે. જુહાપુરા વિસ્તારમાં આવેલા નાયરા (એસ્સાર)ના પેટ્રોલપંપમાં પેટ્રોલની અછત જોવા મળતા વાહનચાલકોને હેરાન પરેશાન થવાનો વારો આવ્યો હતો.
ગુરૂવારે જ પંપ સંચાલકોએ આપ્યું હતું મોટું નિવેદન
પેટ્રોલની આ અછતને લઇ સંચાલકોએ નિવેદન આપ્યું છે. તેઓએ કહ્યું કે, 'રાજ્યમાં 20 ટકા જેટલો પુરવઠો ઓછો આવે છે. જેના કારણે પેટ્રોલની અછત સર્જાઈ છે.'
છેલ્લા 2 દિવસથી પેટ્રોલ પંપ પર નથી આવ્યો પેટ્રોલનો સ્ટોક
ઉલ્લેખનીય છે કે, છેલ્લા 2 દિવસથી પેટ્રોલ પંપ પર પેટ્રોલનો સ્ટોક નહીં આવતા પંપની બહાર બેરિકેટ મુકીને પેટ્રોલનો સ્ટોક નહીં હોવાના બોર્ડ લગાવવામાં આવ્યા હતા.
ઈંધણની અછત માત્ર અફવા, રાજ્યમાં પૂરતા પ્રમાણમાં ઈંધણ ઉપલબ્ધ: ઊર્જામંત્રી કનુભાઈ દેસાઈ
તાજેતરમાં વલસાડમાં સુશાસનના 8 વર્ષની ઉજવણી કરવામાં આવી હતી. જેમાં રાજ્યના ઊર્જા મંત્રી કનુભાઈ દેસાઈએ પેટ્રોલ-ડીઝલની અછતને લઇને મહત્વનું નિવેદન આપ્યું હતું. તેઓએ કહ્યું હતું કે, 'ઈંધણની અછત માત્ર અફવા છે. અત્યારે રાજ્યમાં પૂરતા પ્રમાણમાં ઈંધણ ઉપલબ્ધ છે. વધુમાં તેમણે કહ્યું કે, સરકારે વીજ કટોકટી મામલે જે પ્રકારે પગલાં ભર્યા છે, તે પ્રકારે આ મુદ્દે પણ સરકાર પ્લાનિંગ કરી રહી છે. અત્યારે રાજ્યમાં ઈંધણની કોઈ પ્રકારની અછત નથી. જેથી લોકોએ આ પ્રકારની અફવાથી દૂર રહેવું જોઈએ.'
અરવલ્લીના 5 ટકા પંપો પર જ ડીઝલ હોવાથી ખેડૂતો પરેશાન
બીજી બાજુ અરવલ્લી જિલ્લામાં પણ ડીઝલની શોર્ટેજથી ખેડૂતો પરેશાન થયા હતા. જિલ્લાના 5 ટકા પંપો પર જ ડીઝલ હોવાથી પેટ્રોલ પંપ પર લોકોની લાંબી કતારો લાગેલી જોવા મળી હતી. વાવણીના સમયે જ ડીઝલ ખૂટતા ખેડૂતોમાં ભારે આક્રોશ જોવા મળી રહ્યો છે. જણાવી દઇએ કે, સરહદી જિલ્લામાં ડીઝલની સૌથી મોટી માંગ હોય છે. ખેતર ખેડવામાં ટ્રેક્ટર ચલાવવા ડીઝલની સૌથી વધારે જરૂર પડતી હોય છે. એવાં સમયે ડીઝલની શોર્ટેજ વચ્ચે અરવલ્લીમાં પેટ્રોલ પંપ પર ટ્રેક્ટરોની લાંબી લાઇન લાગી હતી.