આંતરરાષ્ટ્રીય બજારમાં ક્રૂડ ઓઈલના ભાવમાં ઘટાડો થતા પેટ્રોલ અને ડીઝલના ભાવ હાલ પૂરતા સ્થિર રહેશે તેવું લાગી રહ્યું છે.
આંતરરાષ્ટ્રીય બજારમાં ક્રૂડના ભાવમાં ઘટાડો
100 ડોલર પ્રતિ બેરલની નીચે પહોંચ્યો ભાવ
હાલમાં પેટ્રોલ અને ડીઝલના ભાવ ન વધવાની સંભાવના
આંતરરાષ્ટ્રીય બજારમાં કાચા તેલની કિંમતમાં ઘટાડો થયો છે. રશિયા-યુક્રેન તણાવના કારણે લગભગ ત્રણ સપ્તાહથી આંતરરાષ્ટ્રીય બજારમાં રેકોર્ડ ઊંચાઈ પર રહેલા કાચા તેલની કિંમત હવે નરમ પડીને 100 ડોલર પ્રતિ બેરલની નીચે પહોંચી ગઈ છે. આવી સ્થિતિમાં ભારતીય ઓઇલ કંપનીઓ માટે પણ રાહતના સમાચાર છે. વાસ્તવમાં આંતરરાષ્ટ્રીય બજારમાં કાચા તેલની કિંમતોમાં ઘટાડાથી રિટેલ ઓઈલ કંપનીઓ પર માર્જિનનું દબાણ ઘટી ગયું છે. જેના કારણે હજુ થોડા દિવસ પેટ્રોલ-ડીઝલના ભાવ સ્થિર રહી શકે છે.
24 ફેબ્રુઆરી બાદ ક્રુડમાં ભાવ 130 ડોલર પ્રતિ બેરલે પહોંચ્યાં હતા
ઉલ્લેખનીય છે કે રશિયાએ 24 ફેબ્રુઆરીએ યુક્રેન પર હુમલો કર્યો હતો અને ત્યારબાદ આંતરરાષ્ટ્રીય સ્તર પર કાચા તેલની કિંમત 130 ડોલર સુધી પહોંચી ગઈ હતી, પરંતુ હોળી પહેલા કાચા તેલની કિંમત ફરી 100 ડોલર પર આવી ગઈ છે. દિવાળી બાદ એટલે કે નવેમ્બર 2021થી દેશમાં પેટ્રોલ અને ડીઝલની કિંમતમાં કોઈ ફેરફાર થયો નથી.
મહાનગરોમાં પેટ્રોલ અને ડીઝલના આજના રેટ શું છે?
ભારતીય પેટ્રોલિયમ માર્કેટિંગ કંપની ઈન્ડિયન ઓઈલ કોર્પોરેશન (આઈઓસીએલ)ના લેટેસ્ટ અપડેટ મુજબ દેશની રાજધાની દિલ્હીમાં 20 માર્ચ 2022ના રોજ પણ પેટ્રોલ 95.41 રૂપિયા પ્રતિ લીટર અને ડીઝલ 86.67 રૂપિયા પ્રતિ લીટર પર સ્થિર છે. આ જ રીતે દેશની આર્થિક રાજધાની મુંબઈમાં પેટ્રોલ 109.98 રૂપિયા પ્રતિ લીટર અને ડીઝલ 94.14 રૂપિયા પ્રતિ લીટરે વેંચાઈ રહ્યું છે. કોલકાતામાં પેટ્રોલ 104.67 રૂપિયા પ્રતિ લીટર અને ડીઝલ 89.79 રૂપિયા પ્રતિ લીટર છે. ચેન્નઈમાં પેટ્રોલ 101.40 રૂપિયા પ્રતિ લીટર અને ડીઝલ 91.43 રૂપિયા પ્રતિ લીટર છે.
ક્રૂડ ઓઈલના ભાવને આધારે નક્કી થાય છે પેટ્રોલ અને ડીઝલની કિંમત
આંતરરાષ્ટ્રીય બજારમાં ક્રૂડ ઓઈલની કિંમતને આધારે રોજ ઓઈલના ભાવ અપડેટ કરવામાં આવે છે, ઇન્ડિયન ઓઇલ, ભારત પેટ્રોલિયમ અને હિન્દુસ્તાન પેટ્રોલિયમ ઓઇલ કંપનીઓ દરરોજ સવારે વિવિધ શહેરોના પેટ્રોલ અને ડીઝલના ભાવની માહિતી અપડેટ કરે છે. જો કે નવેમ્બરથી ભારતમાં ભાવ સ્થિર રહ્યા છે.