દેશના કેટલાક હિસ્સામાં પેટ્રોલ 100 રૂપિયે પાર પહોંચી ગયું છે. પેટ્રોલ-ડીઝલની કિંમતના વધતા ભાર વચ્ચે ગુજરાતમાં પેટ્રોલ પંપ પર રૂ.100નો ભાવ નહીં દેખાય, કારણ કે ડિજિટલ સિસ્ટમમાં 4 આંકડા જ ડિસ્પેલ થાય છે.
રાજ્યમાં 100 નો ભાવ નહીં દેખાય
સિસ્ટમમાં 4 આંકડા જ ડિસ્પ્લે થાય છે
સિસ્ટમ બદલીને પાંચ યુનિટ કરવા માંગ
હાલ રોજ રોજ પેટ્રોલ અને ડીઝલના દામ વધી રહ્યા છે. ભારતભરમાં પેટ્રોલ-ડીઝલની કિંમતોમાં સતત 12માં દિવસે પણ વધારો થયો છે. ત્યારે અમદાવાદ, સુરત, વડોદરા અને રાજકોટ સહિત રાજ્યના તમામ પેટ્રોલ પંપ પર ભાવમાં વધારો થયો છે. તેવામાં હવે ગુજરાતમાં પેટ્રોલ પંપ પર રૂ.100નો ભાવ નહીં દેખાય. કારણ કંઇક એવું છે કે, ગુજરાતના કેટલાક પેટ્રોલ પંપ પર ડિજિટલ સિસ્ટમમાં 4 આંકડા જ ડિસ્પ્લે થાય છે, 5મો આંકડો નથી ડિસ્પેલ થતો. ગુજરાતમાં હાલમાં લગભગ 5,000 જેટલા પેટ્રોલ પંપ છે. તેમાંથી 1 હજાર પંપ પર રૂ.100નો ભાવ ડિસ્પ્લે થાય તેવી સિસ્ટમ નથી. પેટ્રોલ પંપ એસો.એ ઓઈલ માર્કેટિંગ કંપનીઓની મદદ માંગી. વર્તમાન 4 યુનિટ સિસ્ટમ બદલીને પાંચ યુનિટ કરવાની માંગ કરવામાં આવી છે. મહત્વનું છે કે, પેટ્રોલ-ડીઝલનો ભાવ વધતા કોંગ્રેસ, વિપક્ષો અને સામાન્ય નાગરિકો દ્વારા વિરોધ કરવામાં આવી રહ્યો છે.
સમગ્ર દેશમાં પેટ્રોલ-ડીઝલના ભાવમાં વધારો
પેટ્રોલ-ડીઝલની કિંમતોમાં સતત 12માં દિવસે પણ વધારો થયો છે. દિલ્લીમાં પેટ્રોલમાં 39 પૈસા અને ડીઝલમાં 37 પૈસાનો વધારો થયો છે. હાલ દિલ્લીમાં પેટ્રોલનો ભાવ 90.58 અને ડીઝલનો ભાવ 80.97એ પહોંચ્યો છે. જ્યારે મોટાભાગના શહેરોમાં પેટ્રોલ-ડીઝલનો ભાવ રેકોર્ડ સ્તર પર પહોંચ્યો છે. છેલ્લા 12 દિવસમાં પેટ્રોલમાં 3.28 રૂ. અને ડીઝલમાં 3.49 રૂપિયા વધ્યા છે. મુંબઇમાં પેટ્રોલનો ભાવ 97 રૂપિયાએ પહોંચી ગયો છે. જ્યારે ભોપાલમાં એક્સપી પેટ્રોલનો ભાવ 101.51 રૂપિયાએ પહોંચ્યો છે. અને ડીઝલનો ભાવ 89.23 રૂપિયાએ પહોંચ્યો છે. જાન્યુઆરી અને ફેબ્રુઆરીમાં જ પેટ્રોલ-ડીઝલ 6.77 રૂપિયા મોંઘું થયું છે. ક્રૂડ ઓઇલના ભાવમાં ઘટાડો થયો છતા પેટ્રોલ-ડીઝલના ભાવ વધ્યા છે.
ગુજરાતમાં સતત 12માં દિવસે પેટ્રોલ-ડીઝલના ભાવમાં વધારો
રાજ્યના અમદાવાદમાં પેટ્રોલમાં 38, ડીઝલમાં 39 પૈસા વધ્યા જેને લઇને પેટ્રોલ 87.70, ડીઝલ 86.16 પ્રતિ લિટર થયું. સુરતમાં પેટ્રોલમાં 38, ડીઝલમાં 40 પૈસા વધ્યા જેને લઇને સુરતમાં પેટ્રોલ 87.77, ડીઝલ 87.16 પ્રતિ લિટર થયું. વડોદરામાં પેટ્રોલમાં 26, ડીઝલમાં 34 પૈસાનો વધારો થયો જેને લઇને વડોદરામા પેટ્રોલ 88.86, ડીઝલ 86.11 પ્રતિ લિટર થયું. રાજકોટમાં પેટ્રોલમાં 38 પૈસા અને ડીઝલમાં 40 પૈસાનો વધારો થયો જેને લઇને રાજકોટમાં પેટ્રોલનો ભાવ 87.85 રૂપિયા અને ડીઝલનો ભાવ 87.32 રૂપિયા થયો.
ગુજરાતમાં જનતાને પેટ્રોલ-ડીઝલની કિંમતોમાં કોઈ જ રાહત નહીં મળે. આ સંકેત થોડા દિવસ અગાઉ ખુદ નાયબ મુખ્યમંત્રી નીતિન પટેલે આપ્યા હતા. નીતિન પટેલે કહ્યું હતું કે ગુજરાતમાં પહેલાથી જ પેટ્રોલ-ડીઝલ પર ઓછો વેટ લેવામાં આવે છે. જેથી વેટ ઘટાડવા અંગે કોઈ જ નિર્ણય હાલ લઈ શકાય તેમ નથી.. નીતિન પટેલે જણાવ્યું કે ક્રૂડના ભાવ ઘટશે તો જ પેટ્રોલ-ડીઝલના ભાવ ઘટી શકે.
ઈંધણના ભાવ પર શું બોલ્યા PM?
PM નરેન્દ્ર મોદીએ પેટ્રોલ-ડીઝલની વધતી કિંમતો પર પ્રધાનમંત્રી નરેન્દ્ર મોદીએ જણાવ્યું હતું કે, અગાઉની સરકારોના કારણે આ સ્થિતિ સર્જાઈ છે. મધ્યમ વર્ગને આવી મુશ્કેલી ન પડી હોત. અગાઉની સરકારે ઊર્જા આયાતની નિર્ભરતા પર ધ્યાન આપ્યું હોત તો આ સ્થિતિ ન હોત. 2019-20માં ભારતે 85 ટકા ઈંધણ અને 53 ટકા ગેસની આયાત કરી. ભારતમાં ઊર્જાની વધતી માંગને પૂરી કરવા માટે સરકાર કામ કરી રહી છે. ઊર્જાની આયાત પર નિર્ભરતા ઘટાડવાનું કામ કરી રહ્યા છીએ. અમે આયાત સ્ત્રોતોમાં વિવિધતા લાવી રહ્યા છીએ. હું કોઈને પણ દોષી જાહેર કરવા નથી માગતો. પણ આ કામ અગાઉ થયું હોત તો દેશના મધ્યમ વર્ગના લોકો પર બોજ ન પડ્યો હોત. 2019-20માં ભારત રિફાઈનિંગ ક્ષમતામાં વિશ્વમાં ચોથા સ્થાને હતું. 65.2 મિલિયન ટન પેટ્રોલિયમ પ્રોડક્ટની નિકાસ કરી હતી. આજે ભારતની ગેસ અને ઓઈલ કંપની 27 દેશમાં કામ કરી રહી છે.