આંતરરાષ્ટ્રીય માર્કેટમાં ક્રૂડ ઓઇલની કિંમતમાં ભારે ઘટાડો જોવા મળ્યો છે, જેનો ફાયદો ભારતની જનતાને મળી રહ્યો છે. ભારતમાં પેટ્રોલ-ડિઝલની કિંમતમાં આજરોજ ભારે ઘટાડો જોવા મળ્યો છે. આજરોજ પેટ્રોલની કિંમતમાં 2.69 અને ડિઝલની કિંમતમાં 2.33 રૂપિયાનો ઘટાડો નવી દિલ્હી ખાતે જોવા મળ્યો.
ક્રુડ ઓઇલના ભાવમાં જબરદસ્ત કડાકો
કોરોના વાયરસની માર્કેટ પર અસર
રશિયા અને OPEC દેશ વચ્ચે ચાલતા વિવાદની અસર
ઉલ્લેખનીય છે કે સાઉદી અરબ અને રશિયા વચ્ચે ઓઇલની કિંમતોને લઇને ચાલી રહેલા વિવાદ વચ્ચે ક્રૂડ ઓઇલની કિંમત આંતરરાષ્ટ્રીય બજારમાં 31 ટકા સુધી તુટી ગયેલી જોવા મળી. જેને લઇને ભારતીયોને તેનો નાણાંકીય લાભ મળી શકે છે, કારણ કે આપણો દેશ પેટ્રોલ-ડિઝલ માટે ઘણી હદ સુધી આયાત પર નિર્ભર છે. ભારત પોતાની જરૂરિયાતનું 84 ટકાથી વધારે કાચુ તેલ આયાત કરે છે.
ઉલ્લેખનીય છે કે વિશ્વભરમાં ફેલાયેલા કોરોના વાયરસની અસર વેપાર પર પડી છે. સોમવારે ક્રુડ ઓઇલની કિંમતોમાં ભારે ઘટાડો જોવા મળ્યો છે. જે 2017 બાદ એક દિવસમાં સૌથી મોટો ઘટાડો છે. ક્રુડ ઓઇલની કિંમતમાં 30 ટકા ઘટાડો થતા વિશ્વભરમાં હડકંપ મચી ગયો છે. માત્ર કોરોના જ નહીં પરંતુ રશિયા અને OPEC દેશો વચ્ચે ક્રુડ ઓઇલની કિંમતોને લઇ ચાલી રહેલા વિવાદની પણ ભાવ પર અસર પડી રહી છે.
સાઉદી અરબની સૌથી મોટી કંપની અરામકોએ એપ્રેલિ માટે ક્રુડ ઓઇલના ભાવમાં 3.10 ડોલર પ્રતિ બેરલની ઘટાડો કર્યો છે. જ્યારે માર્ચમાં આ છૂટ 6 ડોલર સુધી હતી. ત્યારે આ પરિબળોના કારણે દિવસેને દિવસે પેટ્રોલ અને ડિઝલના ભાવ ઘટી રહ્યાં છે. જ્યારે પેટ્રોલ-ડીઝલ હજુ પણ સસ્તું થાય તેવી શક્યતા છે.
ક્રુડ ઓઇલ અંગે ડીલ ન બનતા એશિયાની શેરબજાર અસ્થિર છે. ભારતમાં યસ બેંકનું સંકટ અને ક્રુડ ઓઇલના ઝટકાની અસર થઇ છે. જેના કારણે એક જ દિવસમાં સેન્સેક્સ 1500 પોઇન્ટ તૂટયો હતો. જ્યારે ટોક્યો, હોંગકોંગ, સિડની અને સિયોલના શેરબજારમાં 3થી 4.7 ટકાનો કડાકો જોવા મળ્યો હતો.