દેશમાં સતત બીજા દિવસે પેટ્રોલ-ડીઝલના ભાવમાં વધારો થયો છે. પાંચ રાજ્યોની વિધાનસભાની ચૂંટણી પૂર્ણ થયાના થોડાં જ દિવસોમાં ભાવવધારો થતા જનતાના ખિસ્સા પર તેની મોટી અસર થશે.
સતત બીજા દિવસે પેટ્રોલ-ડીઝલના ભાવમાં વધારો
આ રીતે જુઓ તમારા શહેરના નવા ભાવ
એલપીજીના ભાવમાં પણ વધારો
આજે ફરી એક વાર સરકારી ઓઈલ કંપનીઓએ પેટ્રોલ અને ડીઝલમાં પ્રતિ લીટર 80 પૈસાનો વધારો કર્યો છે. રાજધાની દિલ્હીમાં આજે પેટ્રોલની કિંમત 97.01 રૂપિયા પ્રતિ લીટર અને ડીઝલની કિંમત 88.27 રૂપિયા પ્રતિ લીટર થઈ ગઈ છે.
નોંધનીય છે કે, છેલ્લાં કેટલાંક દિવસોમાં આંતરરાષ્ટ્રીય બજારમાં ક્રૂડ ઓઇલની કિંમતો ખૂબ જ ઝડપથી વધી રહી છે. ત્યારે રશિયા-યુક્રેન વચ્ચે લગભગ એક મહિના સુધી ચાલેલા યુદ્ધની અસર હવે વિશ્વભરમાં પેટ્રોલ-ડીઝલના ભાવ પર પણ થઇ રહી છે. આવી સ્થિતિમાં એવી આશંકા વ્યક્ત કરવામાં આવી રહી હતી કે, દેશના પાંચ રાજ્યોની ચૂંટણીના પરિણામો બાદ પેટ્રોલ-ડીઝલના ભાવમાં ફેરફાર થઈ શકે છે. ત્યારે 10 માર્ચે પરિણામ આવ્યાં બાદ 22 માર્ચથી પેટ્રોલ-ડીઝલના ભાવ વધવા લાગ્યા હતાં.
બીજી તરફ દેશની આર્થિક રાજધાની મુંબઈમાં પેટ્રોલની કિંમત 111.67 રૂપિયા પ્રતિ લીટરે પહોંચી ગઈ છે, જ્યારે એક લીટર ડીઝલ 95.85 રૂપિયામાં વેચાઈ રહ્યું છે. દેશના અન્ય મહાનગર કોલકાતામાં પેટ્રોલ 106.34 રૂપિયા પ્રતિ લિટર અને ડીઝલ 91.42 રૂપિયા પ્રતિ લિટરના ભાવે વેચાઈ રહ્યું છે. એ સિવાય ચેન્નાઈમાં એક લિટર પેટ્રોલની કિંમત 102.91 રૂપિયા પ્રતિ લિટર અને ડીઝલની કિંમત 92.95 રૂપિયા પ્રતિ લિટર થઈ ગઈ છે.
નોંધનીય છે કે, ગયા વર્ષે નવેમ્બર મહિનામાં કેન્દ્ર સરકારે પેટ્રોલ-ડીઝલની વધતી કિંમતોને લઈને જનતાને મોટી રાહત આપી હતી. સરકારે પેટ્રોલ પર 5 રૂપિયા અને ડીઝલ પર 10 રૂપિયા એક્સાઇઝ ડ્યૂટીમાં સીધો ઘટાડો કર્યો છે. કેન્દ્રના આ નિર્ણય બાદ મધ્યપ્રદેશ, યુપી, બિહાર સહિત લગભગ તમામ રાજ્યોએ પેટ્રોલ અને ડીઝલ પર વેટના ભાવમાં ઘટાડો કર્યો હતો. ત્યાર બાદ કેટલાંય મહિનાઓ સુધી પેટ્રોલ-ડીઝલના ભાવમાં વધારો કરવામાં આવ્યો ન હતો.
એલપીજીના ભાવમાં પણ વધારો
બીજી બાજુ એલપીજી ગ્રાહકોને પણ આગલા દિવસે મોટો ઝટકો લાગ્યો હતો. ઓઈલ માર્કેટિંગ કંપનીઓએ એક જ ઝાટકે 14.2 કિલોના એલપીજી સિલિન્ડરની કિંમતમાં 50 રૂપિયાનો વધારો કર્યો છે. જ્યાર બાદ બિહારની રાજધાની પટનામાં એલપીજીની કિંમત 1,047.50 રૂપિયા થઈ ગઈ છે. એ જ રીતે દેશના મોટા ભાગના મોટા શહેરોમાં એલપીજી સિલિન્ડરની કિંમત 1000ની નજીક પહોંચી ગઈ છે.
આ રીતે જાણો કે તમારા શહેરમાં શું છે પેટ્રોલ-ડીઝલના ભાવ?
તમે તમારા શહેરમાં દરરોજ એક SMS દ્વારા પેટ્રોલ-ડીઝલની કિંમત જાણી શકો છો. એ માટે ઈન્ડિયન ઓઈલ (IOCL) નાં ગ્રાહકોએ RSP કોડ લખીને 9224992249 નંબર પર મોકલવાનો રહેશે. તમારા શહેરનો RSP કોડ જાણવા અહીં ક્લિક કરો.
તેલના ભાવ દરરોજ અપડેટ થાય છે
આંતરરાષ્ટ્રીય બજારમાં ક્રૂડ ઓઈલની કિંમતના આધારે પેટ્રોલ અને ડીઝલની કિંમત દરરોજ અપડેટ કરવામાં આવે છે. ઓઈલ માર્કેટિંગ કંપનીઓ કિંમતોની સમીક્ષા કર્યા બાદ દરરોજ પેટ્રોલ અને ડીઝલના ભાવ નક્કી કરે છે. ઈન્ડિયન ઓઈલ, ભારત પેટ્રોલિયમ અને હિન્દુસ્તાન પેટ્રોલિયમ ઓઈલ કંપનીઓ દરરોજ સવારે વિવિધ શહેરોની પેટ્રોલ-ડીઝલના ભાવની માહિતી અપડેટ કરે છે. જો કે ભારતમાં ભાવ નવેમ્બરથી સ્થિર રહ્યાં છે.