કોરોના સંકટ વચ્ચે દેશમાં જાહેર કરાયેલા લોકડાઉન દરમિયાન પેટ્રોલ-ડીઝલની કિંમતમાં વધારો કરવામાં આવ્યો નહોતો. જો કે સતત છેલ્લા 2 દિવસથી પેટ્રોલ-ડીઝલની કિંમતમાં વધારો જોવા મળી રહ્યો છે. દેશમાં પેટ્રોલ અને ડીઝલની કિંમતમાં એકવાર ફરી વધારો થયો છે. સતત બીજા દિવસે સોમવારના રોજ પેટ્રોલ અને ડીઝલની કિંમતમાં 60 પૈસાનો વધારો થયો છે.
પેટ્રોલ-ડીઝલની કિંમતમાં 60 પૈસાનો થયો વધારો
દિલ્હીમાં પેટ્રોલની કિંમત 72.46 રૂપિયા પ્રતિ લિટર થઇ
આ કારણે દિલ્હીમાં પેટ્રોલની કિંમત 71.86 રૂપિયાથી વધીને 72.46 રૂપિયા પ્રતિ લિટર પર પહોંચી છે, જ્યારે ડીઝલની કિંમત 69.99 રૂપિયાથી વધીને 70.59 રૂપિયા પ્રતિ લિટર થઇ ગઇ છે. આ અગાઉ ઓઇલ કંપનીએ રવિવારે 83 દિવસ બાદ કિંમતોની સમીક્ષા કરી જેમાં 60 પૈસા પ્રતિ લિટર વધારો કરવામાં આવ્યો હતો. આમ પેટ્રોલ-ડીઝલની કિંમતમાં સતત બીજા દિવસે વધારો થયો છે. આ બે દિવસમાં પેટ્રોલમાં 1.20 રૂપિયા પ્રતિ લીટર મોંઘુ થયું છે.
ઇન્ડિયન ઓઇલની વેબસાઇટ મુજબ દિલ્હી સિવાય કોલકાતા, મુંબઇ અને ચેન્નાઇમાં પેટ્રોલની કિંમત સોમવારે ક્રમશઃ 74.35, 79.49 અને 76.60 રૂપિયા પ્રતિ લિટર થઇ ગઇ છે. જ્યારે ડીઝલના ભાવ ક્રમશઃ 66.61, 69.37 અને 69.25 રૂપિયા પ્રતિ લિટર પર પહોંચ્યાં છે.
કેમ નહોતો વધી રહ્યો ભાવ
ખરેખ, પેટ્રોલ અને ડીઝલની કિંમતોની દરરોજ આધાર પર સમીક્ષા કરવામાં આવી રહી નહોતી. એક ઓઇલ કંપનીના અધિકારીના જણાવ્યાં મુજબ દૈનિક ભાવ સુધારણા ફરીથી શરૂ કરવામાં આવી. ઓઇલ કંપની જો કે એટીએફ અને એલપીજીની કિંમતોની નિયમિત રીતે સમીક્ષા કરી રહી નહોતી, પરંતુ 16 માર્ચથી પેટ્રોલ અને ડીઝલની કિંમતોમાં કોઇ ફેરફાર કરવામાં આવ્યો નહોતો.
ઉલ્લેખનીય છે કે આંતરરાષ્ટ્રીય માર્કેટમાં ક્રુડ ઓઇલની કિંમતોમાં ઘટાડાનો ફાયદો ઉઠાવામાં સરકારે પેટ્રોલ અને ડીઝલ પર ઉત્પાદ કિંમતોમાં ત્રણ રૂપિયા પ્રતિ લિટરનો વધારો કર્યો હતો, ત્યારબાદ કિંમતોની સમીક્ષા રોકી દીધી હતી.