રાંધણ ગેસ, સીએનજી, પીએન્જી બાદ સતત પેટ્રોલ-ડીઝલના ભાવમાં પણ કટકે કટકે વધારો કરાયો
પેટ્રોલ-ડીઝલના ભાવમા 80 પૈસાનો વધારો
પેટ્રોલનો નવો 97.47 રૂપિયા થયો
ડીઝલનો નવો ભાવ 91.53 રૂપિયા થયો
ગુજરાતની જનતાને તારીખ 22 માર્ચથી જોરદાર મોંઘવારીના ઝટકા લાગવાના શરૂ થઈ ગયા છે. મંગળવાર અને બુધવાર પેટ્રોલ-ડીઝલના ભાવ ભડકે બળ્યા બાદ ફરી વખત પેટ્રોલ ડીઝલના ભાવમાં વધારો કરાયો છે. પેટ્રોલ-ડીઝલના ભાવમા 80 પૈસા વધારી દેવામાં આવતા પેટ્રોલનો નવો 97.47 રૂપિયા થયો છે જ્યારે ડીઝલનો નવો ભાવ 91.53 રૂપિયા થયો છે. ગુજરાતના પેટ્રોલ-ડીઝલ એસોસિએશન તરફથી નવો ભાવ નક્કી કરવામાં આવ્યો છે.આવતીકાલ શુક્રવારથી નવો ભાવ લાગુ.
ક્યારે કેટલો ભાવ વધારો લાગુ થયો?
તારીખ
પેટ્રોલ
ડીઝલ
22 માર્ચ
79 પૈસા
85 પૈસા
23 માર્ચ
80 પૈસા
82 પૈસા
25 માર્ચ
80 પૈસા
80 પૈસા
બુધવારે પણ કર્યો હતો ભાવ વધારો
23 માર્ચને બુધવારે ડીઝલમાં ફરીથી 82 પૈસાનો વધારો થતાં ડીઝલનો નવો ભાવ 90.73 રૂપિયા સુધી પહોંચ્યો હતો જ્યારે પેટ્રોલમાં 80 પૈસાનો ફરીથી વધારો થતાં પેટ્રોલનો નવો ભાવ 96 રૂપિયા 67 પૈસા પ્રતિલીટર થયો હતો.
મંગળવારે પણ કર્યો હતો વધારો
મહત્વનું છે કે મોંઘવારીના મારમાં પિસાતી જનતા પર 22 માર્ચ મંગળવારના રોજ પણ પેટ્રોલ અને ડીઝલના ભાવમાં વધારો ઝીકવામાં આવ્યો હતો. ગુજરાત એસોસિએશનના જણાવ્યા અનુસાર પેટ્રોલમાં પ્રતિ લીટરે 79 પૈસાનો વધારો ડીઝલમાં પ્રતિ લીટરે 85 પૈસો વધારો કરવામાં આવ્યો હતો. છેલ્લા 4 દિવસમાં ત્રીજી વખત ઈંધણની કિમતમાં વધારો કરવામાં આવ્યો છે.
અદાણી દ્વારા CNGના ભાવમાં વધારો
ગઈકાલે પેટ્રોલ ડીઝલના ભાવ વધતા જે લોકો સીએનજીનો વપરાશ કરતા હતા તેઓને થોડી રાહત હતી. કારણ કે પેટ્રોલની સરખામણીએ સીએનજીના ભાવ ઓછા હતા. પરંતુ આ રાહત પણ બહુ ન રહી. આખરે સીએનજીભાવમાં પણ વધારો થઇ ગયો. અદાણી ગેસ દ્વારા સીએનજી ભાવમાં વધારો કરવામાં આવ્યો છે. પહેલા એક કિલોનો ભાવ 73.09 પ્રતિ કિલો હતો જે હવે વધીને 74.59 પ્રતિ કિલો થયો છે.
ગુજરાત ગેસે પણ ભાવ વધાર્યો
ગઈકાલે ગુજરાત ગેસ દ્વારા સીએનજી ગેસના ભાવમાં રૂપિયા 3નો વધારો કરવામાં આવ્યો છે. એટલે હવે પ્રતિ કિલો ગેસનો ભાવ જે 67.53 હતો તે વધીને 70.53 રૂપિયા થઇ ગયો છે. આવામાં હવે સ્કૂલ વાન ચાલકો મુશ્કેલીમાં મુકાયા છે. કોરોનાને કારણે અઢી વર્ષથી શાળા બંધ હતી . ધંધો હતો નહી અને હવે શાળા શરુ થઇ તો સીએનજીના ભાવ વધી ગયા. વાલીઓ પણ વધારે ભાડાને કારણે વાનમાં વિદ્યાર્થીઓને મોકલતા અચકાય છે. આવક ઓછી અને ખર્ચા વધારે હોવાથી ઘરનું પણ કેવી રીતે પુરુ કરવું ?