દેશભરમાં જ્યાં કોરોના મહામારીનો પ્રકોપ યથાવત જોવા મળી રહ્યો છે. ત્યારે બીજી તરફ દેશમાં સતત છેલ્લા 23 દિવસથી પેટ્રોલ-ડીઝલની કિંમતમાં સતત વધારો જોવા મળી રહ્યો છે. ત્યારે આજે કોંગ્રેસ દ્વારા પેટ્રોલ-ડીઝલની કિંમતને લઇને રાજ્યવ્યાપી વિરોધ કરવામાં આવી રહ્યો છે. કોંગ્રેસના પૂર્વ અધ્યક્ષ રાહુલ ગાંધીએ પણ ટ્વિટ કરી લોકોને અભિયાનમાં જોડાવા અપીલ કરી છે. કોંગ્રેસ પ્રદેશ પ્રમુખની અમદાવાદ ખાતે વિરોધને લઇને પોલીસે અટકાયત કરી છે.
અમદાવાદમાં કોંગ્રેસ દ્વારા વિરોધ પ્રદર્શન કાર્યક્રમ
પટ્રોલ-ડીઝલના ભાવને લઇ કોંગ્રેસ રાજ્યવ્યાપી દેખાવો કરી રહી છે. અમદાવાદમાં કોંગ્રેસ દ્વારા વિરોધ પ્રદર્શન કાર્યક્રમ યોજવામાં આવ્યો છે. જેને લઇને સરદાર બાગ પાસે મોટી સંખ્યામાં પોલીસ તૈનાત કરવામાં આવી છે.
કોંગ્રેસ પ્રદેશ પ્રમુખ અમિત ચાવડા કાર્યક્રમમાં હાજર રહ્યાં. જો કે પોલીસ દ્વારા કોંગ્રેસ કાર્યકરો દ્વારા કરવામાં આવી રહેલા વિરોધ વચ્ચે કાર્યકરો સહિત પ્રદેશ પ્રમુખ અમિત ચાવડાની અટકાયત કરી છે.
ઉલ્લેખનીય છે કે આ અગાઉ પોલીસે માત્ર દેખાવ કરવાની મંજૂરી આપી હતી. જો રેલી સ્વરૂપે નીકળશે તો પોલીસ દ્વારા ડિટેઇન કરવામાં આવશે તેમ જણાવામાં આવ્યું હતું.
રાજકોટમાં પેટ્રોલ-ડીઝલ મુદ્દે કોંગ્રેસનો વિરોધ
રાજકોટમાં પેટ્રોલ-ડીઝલના ભાવ વધારા મુદ્દે કોંગ્રેસે વિરોધ કર્યો છે. શહેરના પેલેસ રોડ ખાતે કોંગ્રેસે વિરોધ પ્રદર્શન કર્યું છે. કોંગ્રેસના કાર્યકરોએ ઘોડા પર બેસીને વિરોધ કર્યો છે. છેલ્લા 23 દિવસથી પેટ્રોલ ડીઝલના ભાવ વધી રહ્યાં છે. વિરોધ કરી રહેલા કોંગ્રેસી કાર્યકરોની અટકાયત કરવામાં આવી છે.
સુરતમાં કોંગ્રેસ દ્વારા પેટ્રોલ-ડીઝલના ભાવ વધારાનો વિરોધ
પેટ્રોલ ડીઝલના વધી રહેલા ભાવને લઈને સુરતમાં કોંગ્રેસના કાર્યકરોએ વિરોધ કર્યો છે. કોંગ્રેસના કાર્યકરોએ સૂત્રોચ્ચાર કરીને વિરોધ કર્યો છે. છેલ્લા 23 દિવસથી સતત પેટ્રોલ-ડીઝલના ભાવમાં વધારો થઈ રહ્યો છે ત્યારે કોંગ્રેસ વધારેલા ભાવને પરત ખેંચવાની માગ કરી છે. સુરત શહેરના કામરેજમાં પેટ્રોલ-ડીઝલના ધરખમ વધતા જતા ભાવ બાબતે વિરોધ નોંધાવ્યો છે. મોટર સાયકલોને ધક્કોમારીને કામરેજ મામલતદાર કચેરી ખાતે પહોંચ્યાં છે.
વડોદરામાં કોંગ્રેસ કાર્યકર્તાઓ દ્વારા પેટ્રોલ-ડીઝલના ભાવ વધારાને લઇને વિરોધ
પેટ્રોલ-ડીઝલના ભાવમાં સતત 23 દિવસથી વધારો થઈ રહ્યો છે. જેને લઇને વડોદરામાં પણ કોંગ્રેસના કાર્યકરોએ વિરોધ કર્યો છે. કોંગ્રેસના કાર્યકરોએ કાર્યાલયથી કલેક્ટર કચેરી સુધી વિરોધ પ્રદર્શન કર્યુ છે. આ દરમિયાન મોટી સંખ્યામાં કાર્યકરો હાજર રહ્યા હતા.