અમદાવાદઃ છેલ્લા કેટલાક સમયથી પેટ્રોલ-ડીઝલના ભાવમાં ઘટાડો જોવા મળી રહ્યો છે. થોડા સમય પહેલા પેટ્રોલના ભાવમાં ભડકો થયો હતો. પરંતુ હવે રોજ બરોજ ભાવમાં ઘટાડો જોવા મળતા સરકાર અને સામાન્ય પ્રજાએ રાહતનો શ્વાસ લીધો છે. અમેરિકાએ ઈરાન પરથી ઈંધણનો પ્રતિબંધ ઉઠાવી લેતા હાલ આ રાહત મળી છે. પરંતુ આ રાહત લાંબા દિવસ રહે તેમ લાગતું નથી. કારણ કે ઈરાન હવે ઈંધણનું ઉત્પાદન ઓછુ કરવાનો વિચાર કરી રહ્યું છે. ત્યારે ફરી એકવાર પેટ્રોલ-ડીઝલના ભાવમાં ભડકો થશે તેમ લાગી રહ્યું છે.
સાઉદી અરબે કાચા ઇંધણનું ઉત્પાદન ઓછું કરવાનો નિર્ણય કર્યો
હાલ રોજ પેટ્રોલ અને ડીઝલના ભાવો ઘટવાની ખુશી હવે કદાચ લાંબો સમય ટકશે નહી. કારણ કે સાઉદી અરબે કાચા ઇંધણનું ઉત્પાદન ઓછું કરવાનો નિર્ણય કર્યો છે. આ નિર્ણય બાદ ભાવમાં ફરી ભડકો થાય તેમ લાગી રહ્યું છે. દિવાળી બાદ સતત પાચમાં દિવસે પેટ્રોલ અને ડીઝલના ભાવોમાં ઘટાડો જોવા મળ્યો છે. દિલ્હી મુંબઈ ચેન્નઇમાં પેટ્રોલમાં 17 પૈસા અને ડીઝલમાં 16 પૈસાનો ઘટાડો નોંધાયો છે. હવે આ નિર્ણય બાદ કાચા તેલની કિંમતોમાં ફરી એકવાર વધારો આવે તેવી શક્યતા છે.
દેશ ડિસેમ્બરથી ઇંધણના ઉત્પાદનમાં કરશે ઘટાડો
કેમ કે પ્રમુખ તેલ ઉત્પાદક દેશ સાઉદી અરબે કહ્યુ છે કે આવનારા મહીનાથી જ તે ઈંધણના ઉત્પાદન પર કાપ મુકશે. સઉદી અરબના ઉર્જામંત્રીએ જણાવ્યુ હતુ કે તેમનો દેશ ડિસેમ્બરથી ઇંધણના ઉત્પાદન પાંચ લાખ બેરલ રોજનો ઘટાડી દેશે. છેલ્લા કેટલાક દિવસથી જે ઈંધણના ભાવ ઘટી રહ્યા છે તેના કારણે ઈરાને આ નિર્ણય કર્યો હોવાનું સૂત્રો કહી રહ્યા છે.
ઈરાન અબુધાબી સહિતના દેશો કરશે બેઠક
ઈરાન અને અન્ય કાચુ ઈંધણ પુરુ પાડતા દેશો પરથી અમેરિકાએ પ્રતિબંધ હટાવી લીધો છે. જેના કારણે ભારત સહિતના દેશો ત્યાથી વધારે પ્રમાણમાં કાચું ઈંધણ આયાત કરી રહ્યા છે. જેથી તેની કિંમતોમાં સતત ઘટાડો દેખાઈ રહ્યો છે. તેને લઈને આ દેશોને ભય છે કે આજ રીતે જો કાચો માલ સપ્લાય કરશે તો તેમની જરૂરિયાત અન્ય દેશમાં ઓછી થઈ શકે છે. તેના કારણે તેઓ હવે આ કાપ મુકવા જઈ રહ્યા છે. ઈરાન અબુધાબી સહિતના દેશો આ મામલે 6 ડિસેમ્બરે બેઠક કરવાના છે. બેઠક બાદ આગામી રણનીતિ નક્કી કરીને જાહેર કરાશે તેમ માનવામાં આવી રહ્યું છે. એટલે કે ભારતમાં લોકસભા ચૂંટણી પહેલા ઈંધણ ફરી એકવાર ચર્ચાનો વિષય બને તો નવાઈ નહીં રહે.