મોંઘવારીનો માર / પેટ્રોલ-ડીઝલના ભાવમાં ભડકો, આ કારણ બન્યું જવાબદાર

• અમેરિકા અને ઈરાન વચ્ચે યુધ્ધના ભણકારા 
• પેટ્રોલ-ડીઝલના વધ્યા ભાવ 
• સામાન્ય માનવી પર પડશે અસર 

દિલ્હી, મુંબઇ અને કોલકાતામાં પ્રતિ લિટર પેટ્રોલમાં ૧૫ પૈસાનો વધારો થતાં ભાવ અનુક્રમે રૂ.૭૫.૬૯, રૂ.૮૧.૨૮ અને રૂ.૭૮.૨૮ પર પહોંચી ગયા છે. જ્યારે ચેન્નઇમાં પેટ્રોલના ભાવમાં પ્રતિ લિટર ૧૬ પૈસાનો વધારો થતાં ભાવ રૂ.૭૮.૬૪ને આંબી ગયો છે. એ જ રીતે દિલ્હી અને કોલકાતામાં ડીઝલમાં પ્રતિ લિટર ૧૬ પૈસાનો વધારો થયો છે. 

પેટ્રોલ-ડીઝલના ભાવમાં તોળાયો વધારો 

જેના પગલે દિલ્હી અને કોલકાત્તામાં ડીઝલનો પ્રતિલિટર ભાવ રૂ. ૬૮.૬૮ અને રૂ.૭૧.૦૪ને આંબી ગયો છે, જ્યારે મુંબઇમાં ડીઝલમાં પ્રતિ લિટર ૧૮ પૈસાનો વધારો થતાં ભાવ રૂ.૭૨.૦૨ પર પહોંચી ગયો છે. ચેન્નઇમાં ડીઝલમાં પ્રતિ લિટર ૧૯ પૈસાનો વધારો થતાં ભાવ રૂ. ૭૨.૫૮ પર પહોંચી ગયો છે. આમ, અમેરિકા અને ઈરાન વચ્ચે સંઘર્ષ અને તણાવ છેડાયા બાદ પેટ્રોલના ભાવ એક વર્ષની સર્વાધિક સપાટીએ પહોંચી ગયા છે. 

આંતરરાષ્ટ્રીય સ્તરે ક્રૂડ ઓઇલના વધ્યા ભાવ 

આંતરરાષ્ટ્રીય સ્તરે ક્રૂડ ઓઇલના ભાવની અસર ભારતમાં પેટ્રોલ-ડીઝલના ભાવ પર જોવા મળી છે. નિષ્ણાતોના જણાવ્યા પ્રમાણે ક્રૂડ ઓઈલની કિંમત અને અમેરિકા-ઈરાનની તંગદિલીથી શેરબજારની ચાલ પણ નક્કી થશે.