મોંઘવારી માટે રહો તૈયાર પેટ્રોલ 83 અને ડિઝલ 74એ પહોંચશે

દેશભરમાં પેટ્રોલ અને ડિઝલની કિંમત ભલે સૌથી ઉચ્ચતમ સ્તર પર પહોંચી ગઇ છે પરંતુ હજુ તેના ભાવ વધારાની સંભાવના રહેલી છે. આંતરરાષ્ટ્રીય બજારમાં સતત વધી રહેલા કાચા તેલની કિંમતને કારણે થઇ શકે છે. જૂન 2017 બાદ આંતરરાષ્ટ્રીય બજારમાં કાચા તેલની કિંમતમાં 50%થી વધુનો ભાવ વધારો જોવા મળ્યો છે.  હાલમાં જ થયેલા એક સર્વે મુજબ ચાલુ વર્ષે કાચા તેલ 12% મોંઘાં થઇ શકે છે.

હાલમાં દિલ્હીમાં પેટ્રોલની કિંમત 73.31 રૂપિયા પ્રતિ લિટર છે. જ્યારે ડિઝલની કિંમત 64.14 રૂપિયા છે. એક અનુમાન અનુસાર જો કાચા તેલ 12% મોંઘું થયુ તો દિલ્હીમાં પેટ્રોલ 83 રૂપિયા લીટર (લગભગ) અને ડિઝલ 74 રૂપિયા (લગભગ) પર પહોંચી જશે. તેલની કિંમત સીધી જ આંતરરાષ્ટ્રી બજાર સાથે જોડાયેલી હોવાથી ઘરેલૂ બજારમાં પણ તેની અસર થશે. દરરોજ થતા વધારા-ઘટાડા પર નજર નાખીએ તો 24 માર્ચે દિલ્હીમાં પેટ્રોલની કિંમત 72.03 રૂપિયા પ્રતિ લીટર હતી અને ડિઝલની કિંમત 63.01 રૂપિયા હતી. પેટ્રોલ-ડિઝલ પર થઇ રહેલા આ ભાવ વધારાના પગલે સામાન્ય માણસ પર સતત મોંઘવારીનો બોજ પડી રહ્યો છે.

કમોડિટી માર્કેટના એક્સપર્ટ અનુસાર ''બ્રેટ ક્રૂડ 0.5% વધારાની મજબૂતી સાથે 70.9 ડોલર પ્રતિ બેરલની સપાટીએ પહોંચી ગયું છે. જે 80 ડોલર પ્રતિ બેરલે પહોંચે તેવી શક્યતા છે. આંતરરાષ્ટ્રીય માર્કેટમાં જે રેટ હશે તે હિસાબે ઘરેલૂ માર્કેટમાં રિટેલ રેટ નક્કી થશે.''

ટેક્સની ભરમાર:

પેટ્રોલ-ડિઝલ પર ટેક્સની ભરમાર છે. આના પર લાગતા ટેક્સ એક્ચ્યુઅલ કિંમતથી વધુ હોય છે. જો ક્રૂડની કિંમત 68થી 69 પ્રતિ બેરલ હોય અને ડોલરના મુકાબલે રૂપિયો 64થી 65ની રેંજમાં છે ત્યારે દિલ્હીમાં એક લીટર પેટ્રોલની કિંમત 35 રૂપિયા હશે. જેમાં ડીલરનું કમિશન પણ સામેલ છે. જો કે આ કિંમતમાં 27% વેટ (15 રૂપિયા) અને 22 રૂપિયા એક્સાઇઝ ડ્યૂટી લાગે છે. એટલે કે કુલ ટેક્સના 60% એક્સાઇઝ ડ્યૂટી લાગશે. આવી રીતે 35 રૂપિયાનું પેટ્રોલ અંદાજીત 70 રૂપિયાને પાર ચાલ્યું જશે.