લોકસભા ચૂંટણી નજીક આવી રહી છે ત્યારે નેતાઓ હાલમાં પ્રચારનાં જોરમાં છે. દર વખતે ચૂંટણીમાં પક્ષો દ્વારા કોઈને કોઈ સૂત્ર અપનાવવામાં આવતું હોય છે. ત્યારે આ વખતે પણ કોંગ્રેસ દ્વારા `ચોકીદાર ચોર હૈ' એવું સૂત્ર અપનાવવામાં આવ્યું છે તો તેની સામે જવાબી સૂત્ર તરીકે ભાજપ દ્વારા `મૈં ભી ચોકીદાર' એવું સૂત્ર વહેતું કરવામાં આવ્યું છે. ત્યારે આ સૂત્રની ભાજપનાં સમર્થકો પર કંઇક આવી અસર થઈ રહી છે.
પરંપરાગત છૂંદણા ત્રોફાવવાની કળા હવે ભલે લુપ્ત થવાનાં આરે પહોંચી ગઈ હોય પરંતુ બદલાતા રાજકારણનાં પ્રવાહે આ કળાને નવા રંગરૂપ સાથે સજીવન રાખી છે અને આમ પણ યુવાનોમાં હવે ટેટુ ચીતરાવવાનો ક્રેઝ વધતો જઈ રહ્યો છે. ત્યારે તેમાં હવે રાજકારણનાં રંગો ઉમેરાઈ રહ્યાં છે. નેતાનાં ભાષણોમાં ઊઠી રહેલાં 'ચોકીદાર ચોર હૈ' અને 'મૈં ભી ચોકીદાર' જેવાં સૂત્રો માત્ર હવામાં જ નથી ગૂંજતા. પરંતુ આ સૂત્રોનું હવે યુવાધનને પણ ઘેલું લાગ્યું છે એટલે જ તો હવે ભાજપ સમર્થિત યુવાઓ હવે 'મૈં ભી ચોકીદાર હું' આ સૂત્ર ટેટુ સ્વરૂપે હાથ પર ચીતરાવી રહ્યાં છે.
સાબરકાંઠાનાં હિંમતનગરમાં આવેલ એક ટેટુ શોપનાં માલિકે મફતમાં 'મૈં ચોકીદાર હું' લખી આપવાનું શરૂ કર્યું છે અને મોટી સંખ્યામાં મોદી સમર્થકો ટેટુ પડાવવા માટે ઉમટી રહ્યાં છે. આપને નવાઇ લાગશે કે લોકો ટેટુ ચીતરાવીને ચોકીદાર બની રહ્યાં છે અને પોતાનાં હાથ સૂત્ર સાથે મોદીનાં ચિત્રનાં ચીતરામણ સાથે લખાવે છે. `મેં ચોકીદાર હું'.. નરેન્દ્ર મોદીએ શરૂ કરેલ 'મેં ચોકીદાર હું' કેમ્પેઇનમાં લોકો જોડાઈ રહ્યાં છે.
કેટલીક મહિલાઓ એમ માની રહી છે કે મોદીજીની ચોકીદાર સરકારમાં તેઓ સુરક્ષિત છે. આથી, મહિલાઓ પણ મોદીનાં 'મેં ભી ચોકીદાર હું'નાં કેમ્પેઇનમાં જોડાઈ છે. આમ, આ ટેટુ શોપમાં મફત ટેટુ ચીતરાવી આપવાની જાહેરાત થયાં પછી અત્યાર સુધી 400થી વધુ લોકોએ `મેં ચોકીદાર હું'નાં ટેટુઓ હાથ પર ચીતરાવ્યાં છે અને હજુ પણ 200થી વધુ લોકો લાઈનમાં છે. સવારથી મોડી સાંજ સુધી આ શોપમાં યુવાનો અને યુવતીઓને ટેટુઓ બનાવી આપવામાં આવે છે.
હાલમાં 'મૈં ભી ચોકીદાર કેમ્પેઇન' સમગ્ર ભારતમાં ચાલી રહ્યું છે ત્યારે હિંમતનગરમાં આ ટેટુ શોપ માલિક અલગ રીતે જ કેમ્પેઇનમાં જોડાયાં છે અને લોકોને મફતમાં 'મેં ચોકીદાર હું'નું ટેટુ બનાવી આપીને ભાજપનાં ચોકીદાર કેમ્પેઇનને આગળ ધપાવી રહ્યાં છે.