આશ્ચર્યજનક અપહરણ / સુરતના આ શખ્સે જેલ જોવા અને મીડિયામાં આવવા માટે કરી નાંખ્યો ગુનો, જુઓ શું કર્યુ

• જેલ જોવા બાળકનું કર્યુ અપહરણ
• આરોપી રાઘવેન્દ્રની કબૂલાત
• મીડિયામાં પ્રસિદ્ધિ મેળવવાની પણ ઈચ્છા

દેશ દુનિયામાં લોકો પોતાના શોખ પૂરા કરવા માટે અવનવા અખતરા કરતા હોય છે. ત્યારે કોઈ વ્યક્તિ મીડિયામાં પ્રસિદ્ધ થવા કે પછી કોઈ જાણીતી જેલની મુલાકાત માટે હકિકતમાં ગુનાને અંજામ આપે ત્યારે સવાલ ઉભા થાય છે. આવી જ એક ઘટના સુરતમાં સામે આવી છે. સુરતમાં આરોપીએ લાજપોર જેલ અંદરથી જોવા બાળકનું અપહરણ કર્યું હોવાની ઘટના સામે આવી છે. સચિન GIDCના તલંગપોર વિસ્તારમાં રહેતા આરોપી રાઘવેન્દ્ર ઉર્ફે ભારત રામશરણ કેવટે લાજપોર જેલમાં જવા અને મીડિયામાં પ્રસિદ્ધિ મેળવવા માટે પાડોશીના આઠ વર્ષના પુત્રનું અપહરણ કર્યુ હોવાનો ખુલાસો કર્યો છે.

સચિન GIDC પોલીસે મોબાઈલ લોકેશનના આધારે આરોપી રાઘવેન્દ્રને બાળક સાથે ભુસાવલ સ્ટેશનેથી ઝડપી પાડ્યો હતો. ત્યાર બાદ આરોપીની પૂછપરછ હાથ ધરતા સમગ્ર હકીકત સામે આવી હતી. હાલ સચિન GIDC પોલીસે આરોપી રાઘવેન્દ્રની ધરપકડ કરીને કાયદેસરની કાર્યવાહી હાથ ધરી છે.

મહત્વનું છે કે, સુરતની લાજપોર જેલ ખુબ જાણીતી છે. સાથે આ જેલમાં તમામ પ્રકારના ગુનેગારોને રાખવામાં આવ્યા છે. સાથે અનેક મોટા નેતાઓ પણ આ જેલમાં આવી ચૂક્યા છે. સાથે અન્ય રાજ્યમાંથી પણ ખૂંખાર ગુનેગારોને પણ આ જેલમાં રાખવામાં આવે છે. લાજપોર જેલની સુરક્ષા પણ મજબૂત રીતે ગોઠવવામાં આવી છે.