રોષ / લ્યો બોલો ! પરીક્ષા આપવા આવ્યા પણ કોમ્પ્યુટર જ ચાલુ ન થયા, રાજકોટ RTOમાં અરજદારોનો હોબાળો

• રાજકોટ RTO કચેરી ખાતે હોબાળો
• લાયસન્સની પરીક્ષા આપવા આવેલા લોકોએ કર્યો હોબાળો
• RTO ઓફિસ બંધ રહેતા લોકોની લાગી લાઈનો  
   

એક તરફ આરટીઓ કચેરીમાં લોકોને અગવડતા ન પડે તે માટે ઓનલાઇન કામગીરી કરવામાં આવે છે તો બીજી તરફ સર્વરમાં ધાંધિયાને કારણે હાલાકી યથાવત જોવા મળી રહી છે. ત્યારે આજે રાજકોટ આરટીઓ કચેરીમાં હોબાળો થયો. લાયસન્સ માટે પરીક્ષા આપવા આવેલા લોકોએ હોબાળો કર્યો. કારણ કે વહેલી સવારથી જ લોકો આવી ગયા હતા પરંતુ કલાકો સુધી આરટીઓની કામગીરી બંધ રહેતા લોકો રોષે ભરાયા હતા.

રાજકોટ RTO કચેરી બંધ રહેતા હોબાળો

રાજકોટ આરટીઓ કચેરી ખાતે સવારે સાત વાગ્યાથી લોકો લાઇનમાં ઉભેલા જોવા મળ્યા. કારણ કે આજે લાયસન્સ માટેની પરીક્ષા  હતી. લોકો નોકરી ધંધા તથા કોલેજમાં રજા પાડીને વહેલો નંબર આવે એટલે વહેલી સવારથી જ લાઇનમાં ઉભા રહી ગયા પરંતુ ક્યાંય સુધી કામગીરી જ ચાલુ થઇ નહી. વીટીવી ન્યૂઝ સમક્ષ લોકોએ પોતાની વ્યથા ઠાલવતા જણાવ્યુ કે ચાર કલાક સુધી ઉભા રહ્યા છીએ કોઇ જવાબ આપતુ નથી. અધિકારીઓને પૂછવા માટે અંદર ઑફિસમાં પણ જવા દેતા નથી. આટલા કલાકો સુધી ભૂખ્યા તરસ્યા ઉભા રહેવા મજબૂર બન્યા છે. 

વાયરો કપાઇ ગયા છે- RTO અધિકારી

જ્યારે વીટીવી ન્યૂઝે આ અંગે જ્યારે RTO અધિકારીને પૂછ્યુ તો તેઓએ કહ્યુ કે સરકારી ઇન્ટરનેટ ચાલતુ નથી એટલે ટેન્ડર પાસ કરીને અમે પ્રાઇવેટ નેટ લાવ્યા છીએ. તેમાં પણ ટેક્નિકલ ખામી સર્જાતા અત્યારે કામગીરી અટકી પડી છે. કોમ્પ્યુટરના વાયરો કપાઇ ગયા છે. હાલ રિપેરીંગની કામગીરી ચાલુ છે. ઇન્ટરનેટ આવ્યા બાદ લાયસન્સ માટેની કામગીરી શરૂ કરાશે. 

હાલાકી ક્યાં સુધી ?

મહત્વનું છે કે લાયસન્સની પરીક્ષા પાસ કરવા માટે લોકો પોતાના કામકાજ છોડીને આવ્યા હતા પરંતુ ક્યાંય સુધી કામગીરી શરૂ ન થતા આરટીઓ કચેરીએ મસમોટી લાઇનો જોવા મળી રહી છે.લોકો રાહ જોવા મજબૂર બન્યા હતા કે ક્યારે મારો નંબર આવે . ત્યારે હવે જોવુ એ રહ્યું કે ક્યાં સુધી આવી ટેક્નિકલ ખામીઓને કારણે લોકો અટવાશે. જો કોઇ ખામી સર્જાઇ હોય તો અરજદારોને શા માટે જાણ કરવામાં આવતી નથી.