નમસ્તે ટ્રમ્પ / ટ્રમ્પનું સ્વાગત કરવા રસ્તા પર ઉભા રહેનારા લોકોને અપાશે ભોજન, આ રહ્યું મેનુ

• રોડ શોના લોકોને વિવિધ સેન્ટર પરથી ઉપડનારી બસમાં જ ફૂડ પેકેટ આપી દેવાશે
• રોડ શો પત્યા બાદ પાછા ફરતી વખતે બસમાં પણ વેફર-પેંડા જેવો નાસ્તો અપાશે
• મ્યુનિ. દ્વારા રૂ. ૧.૩૦ કરોડના ખર્ચે ફૂડ પેકેટનો કોન્ટ્રાક્ટ અપાયો

એરપોર્ટથી મોટેરા સ્ટેડિયમથી ગાંધીઆશ્રમ સુધીના સંભવિત રોડ શોના આશરે રર કિ.મી. લાંબા રૂટ પર એક લાખથી વધુ લોકો ડોનાલ્ડ ટ્રમ્પ અને વડા પ્રધાન મોદીને ઉમળકાભેર આવકારશે. દરમ્યાન રોડ શોના દર્શકોને રોડ શોમાં ભાગ લેતાં પહેલાં ચણા-પૂરી અથવા પૂરી-શાકનો મોહનથાળ સાથેનો હેવી નાસ્તો અપાશે, જેના કારણે ચારથી પાંચ કલાક સુધી આ લોકો રોડ શો માટે ઊભા રહી શકશે.
 

અગાઉ રોડ શોના મુલાકાતીઓની સંખ્યા અંગે ખુદ મ્યુુનિ. તંત્ર અને ભાજપના શાસકો વચ્ચે મતભેદ ઊભા થયા હતા, પરંતુ હવે રોડ શોના રૂટ પર એક લાખથી વધુ લોકો અમેરિકા અને ભારતના ધ્વજ સહિત આ બંને મહાનુભાવોને આવકારતાં પ્લેકાર્ડ-બેનર સાથે ઊભા રહેશે તે બાબત નિશ્ચિત બની છે. આટલી મોટી સંખ્યામાં લોકો સવારના ૯ વાગ્યાથી રોડ શોના રૂટ પર ઊભા રહેનાર હોઇ તેમના માટે મ્યુનિ. તંત્ર દ્વારા હેવી નાસ્તાની પણ વ્યવસ્થા કરાશે.

એરપોર્ટનો સમાવેશ ધરાવતા ઉત્તર ઝોનમાં કુલ આઠ વોર્ડ હોઇ તમામ વોર્ડ માટે એક-એક ડિસ્પેન્સિંગ સેન્ટર ઊભું કરાયું છે. પ્રતિ સેન્ટર માટે પાંચ એએમટીએસ બસ ફાળવાઇ છે. સવારના ૮ વાગ્યાથી આ બસ મારફતે રોડ શોના રૂટ પર લોકોને લઇ જવાશે. સવારના ૧૦-૩૦ સુધીમાં લોકોને રૂટ પર પહોંચતા કરવાના હોઇ તંત્ર દ્વારા એએમટીએસ બસમાં બેસાડતાં પહેલાં હેવી નાસ્તો પૂરો પડાશે.
 

આ હેવી નાસ્તો બસમાં જ કરવો પડશે અને તેેની પેપર ડિશ સહિતનો વેસ્ટ તંત્રના કર્મચારી બસમાં જ એકત્ર કરી લેશેે. વળતી મુસાફરીમાં પણ આ લોકોને જે તે વોર્ડના ડિસ્પેન્સિંગ સેન્ટરમાં પરત લવાશે અને તે વખતે ફોલેલા સિંગ-ચણા, બુંદી, ગાંઠિયા, વેફર, બિસ્કિટ, સૂકી કચોરી કે પેંડા જેવો હળવો નાસ્તો અપાશે.

મ્યુનિ. સત્તાવાળા દ્વારા હેવી નાસ્તામાં ચણા-પૂરી અને પૂરી-શાકની સાથે મોહનથાળ આપવાની વિચારણા હાથ ધરાઇ છે. કેટલાક ઝોનમાં પ્રતિ ડિશ રૂ.૯૦ થી ૯પના ભાવે હેવી નાસ્તો પૂરો પાડવાનો કોન્ટ્રાક્ટ પણ અપાઇ ગયો છે, જ્યારે બુંદી-ગાં‌ઠિયા, પેંડા, વેફર જેવો હળવો નાસ્તો પ્રતિ ડિશ રૂ.પ૦ની આસપાસના ભાવે પડશે.
 

જાણકાર સૂત્રો કહે છે, એક લાખથી વધુ લોકો રોડ શોમાં ઊમટી પડવાના હોઇ તેમને હેવી નાસ્તો અને હળવો નાસ્તો એએમટીએસ બસમાં પૂરો પાડવાની વ્યવસ્થા પાછળ મ્યુનિ. તંત્રને રૂ.૧.૩૦ કરોડથી વધુનો ખર્ચ થશે, જોકે આ તમામ તૈયારી યુદ્ધના ધોરણે કરવાની હોઇ જે તે ઝોનનાં ડેપ્યુટી હેલ્થ કમિશનર દ્વારા જે તે કોન્ટ્રાક્ટરને પોતાના ઝોનના નિર્ધા‌િરત લોકોના આધારે ઓર્ડર આપવાની સૂચના અપાઇ છે.

ઉત્તર ઝોનમાં સૌથી વધુ રપથી ૩૦ હજાર લોકો રોડ શોમાં ભાગ લેશે, જ્યારે અન્ય ઝોનમાંથી પણ ઓછામાં ઓછા પાંચથી છ હજારથી વધુ લોકો ભાગ લેશે, જોકે તમામ નાગરિક માટે આધારકાર્ડ સહિતની પોલીસ વેરિફિકેશન જેવી ઓળખ સાથે રાખવી ફર‌િજયાત છે અને ઓળખના આધારે બસમાં બેસાડવામાં આવશે. એએમટીએસ દ્વારા રોડ શો માટે રપ૦થી વધુ બસની વ્યવસ્થા કરાઇ છે.

‘નમસ્તે ટ્રમ્પ’ કાર્યક્રમમાં લોકોને ચોકલેટ, ચીકી, ફરસીપૂરી અપાશે

અમદાવાદ: ‘નમસ્તે ટ્રમ્પ’ કાર્યક્રમમાં ઉપસ્થિત રહેનારા લોકોને ચોકલેટ, ચીકી, ફરસીપૂરી, ચવાણું તેમજ અથાણાનું ફૂડ આપવામાં આવશે. લોકો માટે જિલ્લા કક્ષાએ તંત્ર દ્વારા મોટી સંખ્યામાં ફૂડ પેકેટ બનાવવાની કામગીરી શરૂ કરી દેવાઇ છે. ‘નમસ્તે ટ્રમ્પ’ કાર્યક્રમમાં લોકોને લાવવા અને લઇ જવા માટે ગુજરાત રાજ્ય માર્ગ વાહન વ્યવહાર નિગમની કુલ ૩૨૪ એસ. ટી. બસ દોડાવવામાં આવશે.  ઉપરાંત પ્રત્યેક એસ. ટી. બસમાં આપેલા સુપરવાઇઝરને લોકોને ક્યાં બેસાડવા તેમજ કાર્યક્રમ બાદ નિયત બસમાં લઇ જવાની જવાબદારી સોંપાઈ છે.