Dani Data નામની એપમાં બનાસકાંઠા જિલ્લાના સો કરોડથી વધુ રૂપિયા આ એપમાં ધોવાયા હોવાનું ચર્ચાઈ રહ્યું છે.
બનાસકાંઠામાં Dani Data નામની એપમાં લોકોએ કરોડો ગુમાવ્યા
2 જૂનના રોજ આ App બંધ થઈ જતા લોકોના જીવ અદ્ધર થઇ ગયા
Dani Data એપમાં લોકો ફૂટબોલની મેચમાં રૂ. ડબલ કરવાની સ્કીમ હતી
બનાસકાંઠામાં Dani Data નામની એપમાં લોકોએ કરોડો રૂપિયા ખોવાનો વારો આવ્યો છે. બનાસકાંઠા જિલ્લાના સો કરોડથી વધુ રૂપિયા આ એપમાં ધોવાયા હોવાનું ચર્ચાઈ રહ્યું છે. કહેવાય છે કે, ગુજરાતીમાં એવી કહેવત છે કે 'જ્યાં લોભિયા હોય ત્યાં ધુતારા ભૂખે ના મરે.' અનેકવાર ઓનલાઇન એપ અને ગેમમાં પૈસા ડબલ કરવાની લાલચમાં પૈસા રોકવાથી લોકોને અનેક રૂપિયા ગુમાવાનો વારો આવતો હોય છે. ત્યારે આવી જ એક ઓનલાઈન App દાની ડેટા (Dani Data) બંધ થઇ જતા અનેક લોકોના કરોડો રૂપિયા સલવાઇ ગયા છે. ધાનેરા સહિત બનાસકાંઠા (Banaskantha) જિલ્લાના લોકોએ Dani Data નામની ઓનલાઈન એપમાં પૈસા રોક્યા હતા. જે અચાનક આ App 2 જૂનના રોજ રાત્રે બંધ થઈ જતા લોકોને રાતા પાણીએ રોવાનો વારો આવ્યો છે.
Dani Data એપમાં લોકો ફૂટબોલની મેચમાં રૂ. ડબલ કરવાની સ્કીમ હતી
બનાસકાંઠામાં ઓનલાઈન મોબાઈલ એપથી લોકોએ પૈસા રોક્યા હતા અને તેમાંથી એક મહિનામાં ડબલ કરી આપવાની લાલચ આપવામાં આવતી હતી. જો કે આ એપમાં અત્યાર સુધી 100 કરોડ થી વધુ રૂપિયા લોકોએ ગુમાવવાનો વારો આવ્યો છે. જણાવી દઇએ કે, Dani Data એપમાં લોકો ફૂટબોલની મેચમાં રૂપિયા ડબલ કરવાની સ્કીમ હતી અને ઘણા બધા યુવાનો અને શિક્ષિત વર્ગના લોકોએ આ એપમાં પૈસા રોક્યા હતા અને આ પૈસા 10 તારીખ સુધી ડબલ કરી આપવાની લાલચ આપવામાં આવી હતી. જેમાં લોકોએ એક હજારથી લઈને કરોડો રૂપિયા સુધીનું રોકાણ કર્યું હતું. પહેલાં થોડા પૈસા રોકીને તેમને ડબલ કરી આપ્યા હતાં ત્યાર બાદ ધીમે-ધીમે લલચાઈને લોકોએ વધારે પૈસા રોકવાની ફરજ પડી. જેના કારણે તેઓના પૈસા ડૂબવા લાગ્યાં.
જુઓ કેવી રીતે આ ફ્રોડ થયું?
આ એપમાં લોકો પૈસા ડિપોઝિટ કરતા હતા અને એપમાં ડોમેસ્ટિક અને ઇન્ટરનેશનલ ફુટબોલ મેચ પર સટ્ટો રમવામાં આવતો હતો. લોકો દ્વારા ઓનલાઇન Dani Data એપ્લિકેશન ડાઉનલોડ કરવામાં આવતી. ત્યાર બાદ મોબાઈલ નંબર સાથે રજિસ્ટ્રેશન કરી તેમાં બેંકની રકમ નાખવામાં આવી હતી. બાદમાં લિંક ઓપન કરવાથી હોમ સ્ક્રીન પર લેવામાં આવતી હતી. મોબાઈલ નંબર પાસવર્ડ નાખીને કોડ અને બાદમાં રજીસ્ટ્રેશન થતું હતું. ઓટોમેટીક પાસવર્ડ પણ સેવ થતો હતો. આ એપ્લિકેશનથી બેંક મારફતે 400, 600 અને 3600ની અંદર રિચાર્જ કરીને આ ગેમ રમવા માટે ચાલુ કરવામાં આવતી હતી. અમુક ગેમમાં પૈસા નાખ્યા પછી ફોન ચાલુ હોય એટલે સાંજ સુધી તેમાં બીજી રકમ એડ થતી હતી અને એક મહિના સુધી જેટલા રૂપિયા નાખ્યા હોય તે રૂપિયા ડબલ થઇ જતા હતાં. જેમાં તમારો ફોન ચાલુ કરીને મૂકી દેવામાં આવતો હતો. આવી રીતે થોડા પૈસા રોક્યા બાદ વધુ લાલચ આવતા લોકોએ થોડા-થોડા કરીને કરોડો રૂપિયાનું રોકાણ કર્યું હતું. થોડા જ સમયની અંદર બનાસકાંઠામાં સો કરોડથી વધુ રૂપિયાનું રોકાણ લોકોએ આ ગેમમાં કર્યું હોવાની ચર્ચા થઈ રહી છે.
Appમાં અચાનક બેલેન્સ ઝીરો થઇ જતા લોકોને છેતરપિંડી થઇ હોવાનો અહેસાસ
મેચના આ સટ્ટામાં એક કા ડબલમાં વેપારી, ડોક્ટર સહિત અનેક અધિકારીઓએ પૈસા રોક્યા હોવાની જાણકરી મળી રહી છે. જો કે આ એપ્લિકેશનમાં અચાનક જ બેલેન્સ ઝીરો થઇ જતા લોકોની સાથે કરોડોની છેતરપિંડી થયાનું સામે આવ્યું છે. આ છેતરપિંડીમાં માત્ર ધાનેરામાં લોકોએ કરોડોથી વધુ અને બનાસકાંઠા જિલ્લામાં લોકોએ 100 કરોડ ગુમાવ્યાની ચર્ચા થઇ રહી છે.