કડકડતી ટાઢ / ગુજરાતમાં હજુ 2 દિવસ કોલ્ડવેવની આગાહી: અમદાવાદમાં રેકોર્ડબ્રેક ઠંડી, 7.6 ડિગ્રી તાપમાનમાં લોકો ઠુંઠવાયા

• ગુજરાતમાં કડકડતી ઠંડીનું જોર યથાવત્
• રાજ્યના 14 શહેરમાં તાપમાન 10 ડિગ્રીથી ઓછું
• અમદાવાદમાં 7.6 ડિગ્રી તાપમાન નોંધાયું

ઉત્તરીય ઠંડા પવનોને પગલે હાડ ગાળી નાખતી ઠંડી પડતાં લોકોને સીઝનની રેકોર્ડબ્રેક ઠંડીનો અનુભવ થઈ રહ્યો છે. ગુજરાતમાં કડકડતી ઠંડીનું જોર યથાવત છે. આજે રાજ્યના 14 શહેરમાં તાપમાન 10 ડિગ્રીથી ઓછું નોંધાયું છે. તો રાજ્યના તમામ શહેરોમાં ઠંડીનો પારો 13.0 ડિગ્રીથી નીચે નોંધાયો છે.

અમદાવાદમાં સિઝનમાં ત્રીજી વખત 10 ડિગ્રીની નીચે પહોંચ્યો ઠંડીનો પારો
અમદાવાદમાં સિઝનમાં ત્રીજી વખત ઠંડીનો પારો 10 ડિગ્રી નીચે પહોંચ્યો છે. અમદાવાદમાં આજે 7.6 ડિગ્રી તાપમાન નોંધાયું છે. જેના કારણે વહેલી સવારે લોકો તાપણાનો સહારો લેવા મજબૂર થયા છે. તો મોટા ભાગના લોકો સૂર્યોદય બાદ સૂર્યના કિરણો આકરા બને એની રાહ જોઇ ઘરોમાં પુરાઇ રહેવા મજબૂર બન્યા છે. એવી જ રીતે સૂર્યાસ્તની સાથે લોકો ઘરોની બહાર નીકળવાનું ટાળી રહ્યા છે.

નલિયામાં 2 ડિગ્રી તાપમાન નોંધાયું
ગત 15મી જાન્યુઆરી બાદ આકરી ઠંડીને પગલે રાજ્યના ઘણા શહેરોનું લઘુતમ તાપમાન સિંગલ ડિજિટમાં આવી ગયું છે. કચ્છમાં પવન વેગે ઠંડી વધતાં રાજ્યના શીતમથક નલિયામાં તાપમાનનો પારો  ગગડ્યો છે. નલિયામાં 2 ડિગ્રી તાપમાન નોંધાયું છે. પર્યટન સ્થળ માઉન્ટ આબુમાં તાપમાન માઈનસ 6 ડિગ્રી સુધી ગગડ્યું છે. 

બે દિવસ કોલ્ડવેવની આગાહી
હવામાન વિભાગે હજુ બે દિવસ રાજ્યના કેટલાક વિસ્તારોમાં કોલ્ડવેવની શક્યતા દર્શાવી છે અને ત્યારબાદના દિવસમાં ઠારમાંથી આંશિક રાહત થશે અને લઘતમ તાપમાન 2થી 3 ડીગ્રી ઊંચકાય તેવી વકી છે. વેસ્ટર્ન ડિસ્ટર્બન્સની અસરના કારણે વાતાવરણમાં ફેરફાર આવ્યો છે. જેના લીધે રાજ્યમાં કડકડતી ઠંડી પડી રહી છે.

ગુજરાતમાં હાડ થીજવતી ઠંડી
- નલિયામાં 2 ડિગ્રી તાપમાન નોંધાયું
- ગાંધીનગરમાં 5.3 ડિગ્રી તાપમાન નોંધાયું
- કંડલામાં 5.5 ડિગ્રી તાપમાન નોંધાયું
- પોરબંદરમાં 6.2 ડિગ્રી તાપમાન નોંધાયું
- કેશોદમાં 6.7 ડિગ્રી તાપમાન નોંધાયું
- ડીસામાં 7 ડિગ્રી તાપમાન નોંધાયું
- રાજકોટમાં 7.3 ડિગ્રી તાપમાન નોંધાયું
- અમદાવાદમાં 7.6 ડિગ્રી તાપમાન નોંધાયું