સુરતમાં સ્વચ્છતા અભિયાન મુદ્દે લોકો પણ જાગૃત, જાહેરમાં કચરો ફેકનાર મહિલા પાસે ફેંકેલો કચરો ઉપડાવ્યો, વીડિયો સોશિયલ મીડિયામાં વાયરલ.
મહિલા પાસે ફેંકેલો કચરો ઉપડાવ્યો
જાહેરમાં કચરો ન ફેંકવા અંગે સમજાવ્યું
વીડિયો સોશિયલ મીડિયામાં વાયરલ
સ્વચ્છતા અંગે લોકોને જાગૃત કરવા માટે સરકાર દ્વારા વિવિધ કાર્યક્રમો ચલાવવામાં આવી રહ્યા છે. તો લોકો પણ સ્વચ્છતાને લઈને જાગૃત થયા છે. જેનું તાજું ઉદાહરણ સુરતમાં જોવા મળ્યું છે. સુરતીઓએ જાહેરમાં કચરો ફેંકતી એક મહિલાનો ઉધડો લીધો હતો અને મહિલા પાસે ફેંકેલો કચરો પાછો ઉપડાવ્યો હતો. જેનો એક વીડિયો સોશિયલ મીડિયામાં ફરતો થયો છે. આ વીડિયો કતારગામ વિસ્તારનો હોવાનું કહેવામાં આવી રહ્યું છે. જોકે, VTV ન્યૂઝ આ વીડિયોની પુષ્ટિ કરતું નથી.
જાહેરમાં કચરો નાખતી મહિલાને સ્થાનિકોએ ઘેરી
વીડિયોમાં જોઈ શકાય છે કે, કચરો ભરેલી થેલી નાખીને જતી મહિલાને સ્થાનિકો જોઈ જતાં સ્થાનિકોએ મહિલાને ઘેરી લીધી હતી. જે બાદ સ્થાનિકોએ અહીં કચરો કેમ નાખો છો તેમ કહીને મહિલાની પૂછપરછ કરી હતી. જેથી મહિલાએ જવાબ આપતા કહ્યું હતું કે અહીંયા બધા કચરો નાખે છે એટલે હું પણ નાખું છું અને મેં કચરો ઉપાડી લીધો તો હવે મને જવા દો.
ફેંકેલો કચરો મહિલા પાસે ઉપડાવ્યો
જોકે, કેટલીક મહિલાઓ દ્વારા આ કચરો નાખીને જઈ રહેલી મહિલાનો હાથ પકડી લીધો હતો અને પૂછ્યું હતું કે તમે કઈ સોસાયટીમાં રહો છો?. પરંતુ કચરો નાખનાર મહિલાએ જવાબ ન આપતા મામલો વધુ બિચકાયો હતો. આ વાયરલ વીડિયોમાં સ્પષ્ટ દેખાઈ રહ્યું છે કે એ મહિલાએ જ્યાં કચરો નાખ્યો ત્યાં પહેલેથી જ કચરાનો ઢગલો હતો.
સતત ત્રીજા વર્ષે સુરતે જીત્યો હતો ક્લી સિટીનો એવોર્ડ
આપને જણાવી દઈએ કે, દેશના સૌથી સ્વચ્છ શહેરોના સર્વેમાં ગુજરાતમાંથી સુરતે બાજી મારી હતી. સુરત ફરી એકવાર ભારત બીજા નંબરનું સ્વચ્છ શહેર તરીકે ઉભરી આવ્યું હતું. 40 લાખથી વધુની વસ્તી ધરાવતા સૌથી ક્લીન સિટીનો એવોર્ડ સતત ત્રીજા વર્ષે સુરતે જીત્યો હતો. ઓક્ટોબર 2022માં કેન્દ્ર સરકારના સ્વચ્છતા સર્વેક્ષણ 2022નું પરિણામ જાહેર કરવામાં આવ્યું હતું.
નંબર વન ક્લીન સિટી બનવા માટે કરી હતી તનતોડ મહેનત
દેશના નંબર વન ક્લીન સિટી બનવા માટે સુરત શહેરના તંત્ર દ્વારા ખૂબ મહેનત કરવામાં આવી હતી. તેથી આ વખતે સુરત શહેર ઈન્દોરને પછાડીને દેશનું નંબર વન ક્લીન સિટી બનશે તેવી આશા હતી પરંતુ નિરાશા મળી હતી. આ વખતે ફરી એકવાર મધ્યપ્રદેશના ઈન્દોર શહેરે દેશાના નબંર વન સ્વચ્છ શહેર તરીકે બાજી મારી લીધી હતી.