ભાણવડ / મગફળી વજન કાંટા કૌભાંડઃ MLAનું વજન એક કાંટામાં 62, બીજામાં 65 કિલો, સાચું કોણ?

• ધારાસભ્ય વિક્રમ માડમે દેવભૂમિ દ્વારકામાં મગફળી ખરીદી કેન્દ્ર પર દરોડા પાડ્યા
• વજન કાંટામાં ગેરરીતિનો ભાંડો ફુટ્યો
• મોરબીઃ બોરીનું વજન 800 ગ્રામ હોવા છતાં 1 હજાર ગ્રામ ગણવામાં આવે છે

વિક્રમ માડમ દ્વારા આ દરોડા દેવભૂમિ દ્વારકાના ભાણવડ કેન્દ્ર પર પાડવામાં આવ્યા હતા. મગફળીના વજન કાંટામાં ગોલમાલ થતી હોવાનું બહાર આવ્યું છે. 2 અલગ-અલગ વજન કાંટા પર અલગ અલગ આંકડા આવતા આ પોલ પકડાઈ છે. વિક્રમ માડમે જાતે ઉભા રહીને તેનો ડેમો આપ્યો અને તંત્રને સભાન અવસ્થામાં લાવવાનો પ્રયાસ કર્યો હતો. બંને વજન કાંટામાં આશરે 3 કિલોનો ફરક આવતા ખેડૂતો રોષે ભરાયા છે. એક વજન કાંટામાં 62, બીજામાં 65 કિલો વજન નોંધાયા છે. આ વજન કાંટાઓ પર અનેક ખેડૂતોની મગફળી જોખાઈ ગઈ છે. ત્યારે હવે તેમના મગફળીમાં કડકી કરનારા પર શું પગલા લેવાશે તે એક સવાલ છે. 

800 ગ્રામની મગફળીમાં 200 ગ્રામ વધુ મગફળી લેવામાં આવે છેઃ ખેડૂતો

બીજી તરફ મોરબી જિલ્લામાં ટેકાના ભાવે મગફળીની ખરીદીમાં લોલમલોલ હોવાનું સામે આવ્યું છે. ખાસ કરીને ખેડૂતો સાથે છેતરપીંડી થતી હોવની ફરિયાદ ઉઠી છે. મગફળીની બરદાનનું ઓછું વજન બતાવીને વધુ વજનની મગફળી લઈ રહ્યાનો ખેડૂતોએ આક્ષેપ કર્યો હતો. જેમાં 800 ગ્રામની મગફળીમાં 200 ગ્રામ વધુ મગફળી લેવામાં આવે છે. તેથી100 બોરી મગફળીમાં 1 મણ જેટલી મગફળી વધુ લેવામાં આવતી હોવાની ફરિયાદ કરી છે.

મોરબીના માર્કેટીંગ યાર્ડમાં સીસીઆઈ દ્વારા ટેકાના ભાવે મગફળીની ખરીદી કરવામાં આવી રહી છે. પણ આ ટકા ભાવે મગફળીની ખરીદીમાં ભારે લોલમલોલ થતું હોવાનો ખેડૂતો બળાપો ઠાલવી રહ્યા છે. ખાસ કરીને મગફળીના વજનમાં ગેરરીતિ થતી હોવાનો ખેડૂતોએ આરોપ લગાવ્યો છે. ખેડૂતોની ફરિયાદ પ્રમાણે એક કિલો મગફળીનું વજન કરવામાં આવે છે. જેમાં બોરીનો વજન 800 ગ્રામ થાય છે. પણ એક કિલો વજન દેખાડીને 200 ગ્રામની વધુ મગફળી પડાવી લેવામાં આવે છે. આ વજન કાંટામાં પણ ગેરરીતિ ધ્યાને આવી છે. જેમાં એક કિલો મગફળીએ 200 ગ્રામની મગફળી વધુ લેવામાં આવતી હોવાનું ફલિત થાય છે. આ રીતે 100 બોરીએ એક મણ મગફળી વધુ લેવામાં આવે છે અને આ છેતરપીંડીથી ખેડૂતોમાં ભારોભાર રોષ ફેલાયો છે.