WC 2019 / ‘અબ્બુ’વાળી જાહેરાતથી PCBને મરચાં લાગ્યાંઃ ICCને ફરિયાદ કરી

'અબ્બુ'વાળી જાહેરાતને PCBએ આપત્તિજનક જાહેર કરી છે. ICC અધિકારીઓએ પણ આ અંગે ચેનલ સાથે વાતચીત કરી છે અને તેમને PCBના વાંધા અંગે જાણકારી આપી છે. બધું જાણતા હોવા છતાં BCCIના અધિકારીએ આ મામલાથી દૂર રહેવાનું પસંદ કર્યું છે.

BCCIના એક સિનિયર અધિકારીએ જણાવ્યું, ''અહેસાન મનીએ PCB તરફથી ICC સમક્ષ વિરોધ વ્યક્ત કર્યો છે. હું સચોટ રીતે ના કહી શકું કે મનીએ પત્ર લખ્યો છે કે ટેલિફોન પર ફરિયાદ નોંધાવી છે, પરંતુ અમને જાણવા મળ્યું છે કે વિરોધ નોંધાવવામાં આવ્યો છે.''

ભારત અને પાકિસ્તાનની મેચ પહેલાં સ્ટાર સ્પોર્ટ્સ ચેનલે એક જાહેરાત તૈયાર કરી હતી, જેમાં ભારતીય પ્રશંસક ખુદને પાકિસ્તાન સમર્થકનો 'બાપ' કહી રહ્યો છે. એ જાહેરાત એવા સંદર્ભમાં તૈયાર કરવામાં આવી, કારણ કે પાકિસ્તાનની ટીમ વર્લ્ડકપમાં ક્યારેય ભારતીય ટીમ  સામે જીતી શકી નથી. જાહેરાતમાં એક બાંગ્લાદેશી પ્રશંસક પાકિસ્તાની પ્રશંસકને પૂછી રહ્યો છે. પાકિસ્તાની પ્રશંસક કહે છે, ''મારા અબ્બુએ કહ્યું છે કે કોશિશ ચાલુ રાખવી જોઈએ...'' ત્યારે જ ભારતીય પ્રશંસક કહે છે, ''મેં એવું ક્યારે કહ્યું?'' જાણવા મળ્યું છે કે ICC અગાઉ જ આ અંગે સ્પોર્ટ્સ ચેનલ સાથે વાત કરી ચૂકી છે. 

આ બધા વચ્ચે એક ભારતીય ચેનલના પ્રતિનિધિઓનું એક્રિડેશન કાર્ડ રદ કરી દેવામાં આવ્યું છે, તેમણે ICCના નિયમોનું ઉલ્લંઘન કર્યું. આ ચેનલના રિપોર્ટર અને કેમેરામેને ભારતીય કેપ્ટન વિરાટ કોહલીની પ્રેસ કોન્ફરન્સનું જીવંત પ્રસંરણ કરી દીધું, જેની સખત મનાઈ છે. એક અન્ય સિનિયર ભારતીય પત્રકારે પણ ફેસબુક પર કોહલીની પ્રેસ કોન્ફરન્સનું લાઇવ ટેલિકાસ્ટ કર્યું હતું, જેના માટે તેને ICC તરફથી ચેતવણી આપવામાં આવી હતી.