વડોદરા પોલીસને પ્રિવેન્ટિવ ક્રાઈમ બ્રાન્ચ દ્વારા જુગાર રમનારાને ઝડપી પાડતા તેઓની પૂછપરછ દરમિયાન આરોપી પાસેથી મહારાષ્ટ્ર એજ્યુકેશન બોર્ડની નકલી માર્કશીટનું મોટું કૌભાંડ મળી આવતા પોલીસ પણ વિચારતી થઇ હતી. આ મામલે હાલ વડોદરા પોલીસે બે આરોપીની અટકાયત કરી છે.
વડોદરા પોલીસે ડુપ્લીકેટ માર્કશીટનું ઝડપી પાડ્યુ કૌભાંડ
અકોટા પાસે શિવશક્તિનગર સોસાયટીમાં ચાલતા કૌભાંડનો પર્દાફાશ
પોલીસ IPL સટ્ટાના કેસમાં તપાસ અર્થે ગઇ હતી
પ્રાપ્ત થતી જાણકારી પ્રમાણે, વડોદરા PCB પોલીસે સટ્ટા બેટિંગમાં ધોરણ 10 નાપાસ આદિલ ચીનવાલાની ધરપકડ કરી હતી. પોલીસ આદિલનો ફોન તપાસ કરતી હતી તે દરમિયાન તેના ફોનમાંથી બોગસ માર્કશીટ અને સર્ટિ ના ફોટો મળી આવ્યા.
બોગસ માર્કશીટ અને સર્ટિફિકેટનું કૌભાંડ ઝડપાયું
ઉલ્લેખનીય છે કે, પોલીસે આદિલની કડકાઈથી પૂછપરછ કરતા તેને બોગસ માર્કશીટ અને સર્ટિફિકેટનું કૌભાંડ ચલાવનાર શખ્સોનો પર્દાફાશ કર્યો હતો. પોલીસે આદિલની માહિતીના આધારે અકોટા પોલીસ લાઇન પાસે રહેતા નોયલ ઉર્ફે નેવલ પરેરાના ઘરે તપાસ કરી જ્યાંથી બોગસ માર્કશીટ અને સર્ટિફિકેટ મળી આવ્યા..
આરોપી પાસેથી અલગ અલગ યુનિવર્સિટીના સર્ટિફિકેટ મળી આવ્યા
પોલીસને આરોપી નોયલ તેના ઘરે ના મળતા બોગસ માર્કશીટ અને સર્ટિફિકેટ બનાવનારા શખ્સ જીગર ગોગરાની ધરપકડ કરી. આરોપી પાસેથી અલગ અલગ યુનિવર્સિટી, સ્કૂલ અને ટ્રસ્ટની બોગસ માર્કશીટ અને સર્ટિફિકેટ મળી આવ્યા.
રાજ્ય વ્યાપી કૌભાંડ બહાર આવવાની શક્યતા
ઉલ્લેખનીય છે કે, પીસીબીની ટીમે સટોડીયાને પકડતા બોગસ માર્કસીટનું કૌભાંડ પણ હાથ લાગ્યું છે ત્યારે ફરાર નોવેલને પકડવામા આવે તો રાજ્ય વ્યાપી કૌભાંડ બહાર આવવાની શક્યતા છે.