એશિયા કપ / BCCIની સ્પષ્ટતા : પાકિસ્તાનને ભારત આવવું હોય તો આવે પરંતુ ટીમ ઈન્ડિયા રમવા નહીં જાય

• BCCIની સ્પષ્ટતા, પાકિસ્તાન ક્રિકેટ બોર્ડના એશિયા કપની યજમાની કરવા પર કોઇ આપત્તી નથી
• તટસ્થ સ્થળ હંમેશાથી વિકલ્પ રહ્યો છે, બીસીસીઆઇએ 2018માં આ કર્યું : BCCI
• જો ભારતને એશિયા કપનો ભાગ બનવું હોય તો એ જરૂરી છે કે ટૂર્નામેન્ટ પાકિસ્તાનમાં ન થાય

બીસીસીઆઇના એક સીનિયર અધિકારીએ કહ્યું કે, યજમાનીનો કોઇ મુદ્દો નથી અને આ માત્ર તટસ્થ સ્થળે રમવાની વાત છે, કેમકે ભારતીય ટીમ પાકિસ્તાનનો પ્રવાસ કરશે નહીં. 

અધિકારીએ કહ્યું કે, સવાલ એ નથી કે પીસીબી યજમાની કરી રહ્યું છે. આ ટૂર્નામેન્ટના સ્થળની વાત છે. હાલ આ સમયે જે પ્રકારે સ્થિતિ છે, તેથી એ સ્પષ્ટ છે કે અમને તટસ્થ સ્થળ જોઇએ. એવી કોઇ સંભાવના નથી કે ભારત મલ્ટી નેશન ટૂર્નામેન્ટમાં ભાગ લેવા પાકિસ્તાન જાય. જો એશિયાઇ ક્રિકેટ પરિષદ (ACC) આ વાતથી ખુશ છે કે એશિયા કપ વિના ભારતે યોજાય તો એ અલગ વાત છે. પરંતુ જો ભારતને એશિયા કપનો ભાગ બનવું હોય તો એ જરૂરી છે કે ટૂર્નામેન્ટ પાકિસ્તાનમાં ન થાય.

2018માં એશિયા કપ ભારતમાં યોજાવાનો હતો, પરંતુ પાકિસ્તાની ખેલાડીઓને લઇને વિઝાની સમસ્યા થઇ હતી અને આ કારણે એશિયા કપ સંયુકત અરબ અમીરાત (UAE) માં કરાવવામાં આવ્યો હતો અને તેની યજમાની બીસીસીઆઇએ કરી હતી. અધિકારીએ કહ્યું કે, પીસીબી પણ આ કરી શકે છે. 

તેઓએ કહ્યું કે, તટસ્થ સ્થળ હંમેશાથી વિકલ્પ રહે છે. બીસીસીઆઇએ 2018માં આ કર્યું હતું. પાકિસ્તાનમાં 2009માં શ્રીલંકા ક્રિકેટ ટીમની બસ પર આતંકવાદીઓએ હુમલો કરી દીધો હતો ત્યારથી પાકિસ્તાનમાં આંતરરાષ્ટ્રીય ક્રિકેટ નહોતો થયો.

જોકે હાલમાં જ શ્રીલંકાએ પાકિસ્તાનનો પ્રવાસ કર્યો હતો, તથા બાંગ્લાદેશ પણ પ્રવાસ પર છે. જોકે, ભારત અને પાકિસ્તાનનો મુદ્દો તેનાથી વધારે છે. બંને દેશોની વચ્ચે રાજકીય સંબંધોને કારણે એ સ્થિતિ છે કે ભારત કોઇપણ કિંમતે પાકિસ્તાનનો પ્રવાસ ન કરી શકે.