સાવધાન / Paytmમાં KYC અપડેટના નામે ફોન આવે તો ચેતજો! ગઠિયાઓ ઉપયોગ કરે છે આ મોડસ ઓપરેન્ડી

• બેથી ત્રણ લોકો એક જ મોડસ ઓપરેન્ડીથી સાયબર ક્રાઇમનો બને છે ભોગ
• બે યુવતી સહિત ત્રણનાં એકાઉન્ટમાંથી રૂ. ૩.૫૬ લાખ ઊપડી ગયા
• ગુજરાત યુનિવ‌િર્સટી પોલીસ સ્ટેશનમાં ફરિયાદ કરાઇ

શહેરના નારણપુરા વિસ્તારના સાંતેજ એન્ક્લેવમાં રહેતાં અને બિઝનેસ ડેવલપર તરીકે ફરજ બજાવતાં કિંજલ વહોરાએ ગુજરાત યુનિવ‌િર્સટી પોલીસ સ્ટેશનમાં ફરિયાદ કરી છે કે થોડા દિવસ પહેલાં કિંજલના પેટીએમમાંથી મેસેજ આવેલ કે તમારું એકાઉન્ટ થોડા સમયમાં હોલ્ડ કરવામાં આવશે, જેથી તેણે કેવાયસી અપડેટની કાર્યવાહી પૂરી કરવા માટે જણાવ્યું હતું.

જેથી કિંજલે પેટીએમની ઓફિસમાં ફોન કર્યો હતો, જેમાં સુ‌િમત જૈન નામની વ્યક્તિએ તેમને કેવાયસી અપડેટ કરવા માટે ટીમ વ્યુઅર સપોર્ટ એ‌િપ્લકેશન ડાઉનલોડ કરવા માટે કહ્યું હતું. કિંજલે આ એપ્લિકેશન ડાઉનલોડ કર્યા બાદ સુ‌િમત જૈને એપ્લિકેશનનો રિમોટ નંબર માગ્યો હતો.

રિમોટ નંબર મેળવ્યા બાદ તેણે ફરિયાદીના આઇસીઆઇસીઆઇ બેન્કના ડિબેટકાર્ડની વિગતો મેળવીને બેન્ક એકાઉન્ટમાંથી કુલ રૂ. ૧,ર૪,૯૯૪ પેટીએમ વોલેટમાંથી અન્ય બેન્ક એકાઉન્ટમાં ટ્રાન્સફર કરી લીધા હતા, જોકે કિંજલને જાણ થતાં જ તેમણે ટીમ વ્યુઅર એપ્લિકેશન ઇન્સ્ટોલ કરીને એટીએમકાર્ડ પણ બ્લોક કરાવી દીધું હતું. ત્યારબાદ કિંજલે ગુજરાત યુનિવ‌િર્સટી પોલીસને કરતાં પોલીસે ફરિયાદ નોંધીને વધુ તપાસ શરૂ કરી છે.

બીજી તરફ સિંધુ ભવન પાસે આવેલ સંકલ્પ ‌સિનિરિટીમાં રહેતાં વીન્તી પોદ્દાર પણ  ઠગાઈનાે ભોગ બન્યાં છે. વીન્તીના મોબાઈલ પર રાહુલ શર્મા નામના યુવકે ફોન કર્યો હતો. તેણે કહ્યું હતું કે પેટીએમનો સારી રીતે ઉપયોગ કરવાનું સજેશન આપીને વિશ્વાસમાં લઈ વીન્તી પાસે પેટીએમમાં તમામ વિગત ભરાવીને રાહુલે તેમના ખાતામાંથી ૬૪ હજાર રૂપિયા ટ્રાન્સફર કરીને છેતરપિંડી આચરી હતી. વીન્તીએ વસ્ત્રાપુર પોલીસ સ્ટેશનમાં રાહુલ નામના યુવક વિરુદ્ધમાં ફરિયાદ નોંધાવી છે.

આવો જ એક કિસ્સો સરખેજમાં બન્યો છે. સરખેજ વિસ્તારમાં આવેલ સોરેલ એપાર્ટમેન્ટમાં રહેતા વિકાસ શર્મા સાથે પેટીએમના નામે ૧.૬૮ લાખ છેતરપિંડી થઇ છે. વિકાસના મોબાઈલમાં પેટીએમ અપડેટ કરવા મેસેજ આવ્યો હતો, જેથી વિકાસે જે નંબર પરથી મેસેજ આવ્યો હતો તે નંબર પર ફોન કરતાં યુવકે પેટીએમમાંથી વાત કરું છું તેવી ઓળખ આપીને પેટીએમ કેવાયસી વેરિફિકેશન કરવાના બહાને વિકાસ પાસે બેન્કની વિગતો મેળવીને ઓટીપીની લઈ તેમના ખાતામાંથી યુવકે ૧.૬૮ લાખ રૂપિયા ઉપાડી લીધા હતા.

વિકાસને રૂપિયા ડેબિટ થયાનો મેસજ આવતાં ચોંકી ગયા હતા અને તાત્કાલિક સરખેજ પોલીસ સ્ટેશનમાં જઈ યુવક વિરુદ્ધમાં ફરિયાદ નોંધાવતાં પોલીસે ગુનો નોંધી તપાસ હાથ ધરી છે.

ઉલ્લેખનીય છે કે ગઠિયા પેટીએમ વાપરતા લોકોને એવા વિશ્વાસમાં લે છે કે યુઝર આઇડી પાસવર્ડથી કોઇ નુકસાન નહીં થાય અને બેન્કમાં ગયા વગર કેવાયસીની પ્રોસેસ થઇ જશે. ગઠિયાઓ ઘણી વાર ફોન કરે છે અને તમને તમારા પેટીએમ એકાઉન્ટના કેવાયસીને પૂર્ણ કરવા કહે છે.

ત્યારબાદ તેઓ તમારી વિગતો લઇ છેતરપિંડી કરે છે. તેથી જો તમને આવા કોલ આવે તો સૌપ્રથમ પેટીએમ કસ્ટમર કેરમાં જાણ કરવી જોઈએ. આ સિવાય જો તમે કેવાયસી કરાવવા માગતા હો તો તમે તેને પેટીએમ એપ પર જઇને અપડેટ કરી શકો છો અથવા તમે પેટીએમ એક્ઝિક્યુટિવને કોલ કરી શકો છો. આમ, થોડી સાવધાની રાખીને ઓનલાઈન પેમેન્ટ એપનો ઉપયોગ કરશો તો ક્યારેય છેતરાશો નહીં.