સાયબર ક્રાઈમ / '‘લાઈટ બિલ ભરી દો, નહીં તો કનેક્શન કપાઈ જશે’: આવી લિન્ક ખોલતાં પહેલાં સાવધાન, પોલીસની અપીલ જાણવા જેવી

• ‘લાઈટ બિલ ભરી દો, નહીં તો કનેક્શન કપાઈ જશે’ લિન્ક ખોલતાં પહેલાં સાવધાન
• વીજ કંપનીઓના નામે આવેછે બોગસ SMS
• આવા બોગસ SMS થી સાવચેત રહેવા પોલીસની અપીલ

સોશિયલ મીડિયાના જમાનામાં ઓનલાઈન ફ્રોડ થવાના કિસ્સા અનેક સામે આવે છે. ત્યારે સાયબર ક્રાઇમ પોલીસ દ્વારા ચેતવણી આપવામાં આવી છે. જો તમને ‘તમારું લાઈટ બિલ બાકી છે અને જો તમે આ સાથે આપેલી લિન્ક પર ક્લિક કરીને તેનું ઓનલાઈન પેમેન્ટ નહીં કરો તો ૨૪ કલાકમાં જ તમારું વીજ કનેક્શન કપાઈ જશે’ આ પ્રકારના SMS તમારા વીજ કંપનીમાં રજિસ્ટર્ડ મોબાઈલ નંબર પર આવે તો ઉતાવળમાં લિન્ક ખોલીને પેમેન્ટ કરવાની ભૂલ ના કરતા, નહીં તો તમારું બેન્ક એકાઉન્ટ શાતિર ઠગ ટોળકી સાફ કરી જશે. અમદાવાદ સાયબર ક્રાઈમ પોલીસ છેલ્લા થોડા સમયથી સતત વધી રહેલા લાઈટ બિલના નામના ફ્રોડને અટકાવવા અમદાવાદીઓને અપીલ કરી રહી છે. 

એસએમએસ મોકલીને લોકોને જાળમાં ફસાવતી ગેંગનો આતંક

અમદાવાદ સહિત ગુજરાતભરમાં ટોરેન્ટ પાવર, યુજીવીસીએલ, એમજીવીસીએલ સહિતની વીજ કંપનીઓના નામે બોગસ એસએમએસ મોકલીને લોકોને જાળમાં ફસાવતી ગેંગનો આતંક હમણાંથી ખૂબ વધી ગયો છે. આ લોકો પેન્ડિંગ લાઈટ બિલનાં નામે ઉઘરાણી કરતા મેસેજ મોકલીને લોકોને ટાર્ગેટ બનાવે છે. તેમની જાળમાં ફસાયેલા લોકો લિન્ક ખોલીને ઓનલાઈન પેમેન્ટ કરવાની કોશિશ કરે તે સાથે જ તેમનું બેન્ક એકાઉન્ટ સાફ થઈ જાય છે.

સાયબર હેકિંગના નવા કેસ સામે આવી રહ્યા છે

ઉલ્લેખનીય છે કે, ભારતમાં ઝડપથી વધી રહેલા ડિજિટલાઇઝેશનને કારણે જીવન સરળ બન્યું છે પરંતુ કેટલીક સમસ્યાઓ પણ વધી છે. સાયબર હેકિંગના નવા કેસ સામે આવી રહ્યા છે. હેકર્સ નવાં નવાં બહાનાં કરીને સામાન્ય લોકોને પોતાની છેતરપિંડીનો શિકાર બનાવી રહ્યા છે. આ કિસ્સામાં ઠગ લિન્ક અથવા મેસેજ દ્વારા એકાઉન્ટ ખાલી કરી લાખો રૂપિયા સેરવી લે છે. ઠગ ટોળકી સામાન્ય લોકોને વીજ બિલ જમા કરાવવાના નામે એસએમએસ દ્વારા લિન્ક મોકલે છે. આ મેસેજમાં બિલની માહિતી સાથે તે લિન્ક પણ હોય છે, જેના પર ક્લિક કરીને પૈસા જમા કરવાનું કહેવામાં આવે છે. આ લિન્ક હકીકતમાં વીજ કંપનીની હોતી નથી, પરંતુ હેકર્સ તેના દ્વારા મોબાઈલ હેક કરે છે. આ લિન્ક પર ક્લિક કરતાંની સાથે જ બેન્ક એકાઉન્ટમાંથી પૈસા કપાઈ જાય છે. 
સૂત્રોના જણાવ્યા અનુસાર, હેકર્સ પાસે વીજ કંપનીઓના ગ્રાહકોના તમામ કોન્ફિડેન્શિયલ ડેટા હોય છે, જેના આધારે તેઓ આ પ્રકારના એસએમએસ મોકલી શિકાર કરતા હોય છે.

વોટ્સએપ અને એસએમએસ દ્વારા છેતરપિંડી

હેકર્સ વોટ્સએપ મેસેજ અને એસએમએસ દ્વારા લિન્ક મોકલીને આ છેતરપિંડીને અંજામ આપે છે. યૂઝર લિન્ક પર ક્લિક કરીને હેકર્સ દ્વારા બિછાવેલી જાળમાં ફસાઈ જાય છે અને તેની મહેનતની કમાણી ગુમાવે છે. હેકર્સ દ્વારા મોકલવામાં આવેલા મેસેજમાં દાવો કરવામાં આવ્યો છે કે જો વીજળીનું બિલ તરત ચૂકવવામાં નહીં આવે તો કનેક્શન કાપી નાખવામાં આવશે. સામાન્ય લોકો કશું પણ વિચાર્યા વગર આ લિન્ક પર ક્લિક કરે છે.