ગુજરાત વિધાનસભાની ચૂંટણીના બીજા તબક્કાના મતદાનમાં લોકતંત્ર મજબૂત કરવા કોઈ લાકડીના ટેકે, તો કોઈ એમ્બ્યુલન્સ તો કોઈ બ્રેઇન હેમરેજ ઓપરેશનના 48 કલાકમાં જ મત આપવ જતાં નજરે પડ્યા
આણંદમાં રમેશ શાહ નામના દર્દીએ કર્યું મતદાન
બ્રેઈન હેમરેજનું ઑપરેશન થયાના 48 કલાકમાં દર્દીએ મતદાન કર્યું
મતદાન કર્યા બાદ દર્દીએ તમામ લોકોને મતદાન કરવા અપીલ કરી
મોડાસાના નવા ગામના 103 વર્ષની ઉંમરના સંતોકબેન પટેલે કર્યું મતદાન
હારીજ તાલુકાના જસોમાવ ગામમાં 90 વર્ષના વૃદ્ધે મતદાન કર્યું
લાકડીના ટેકે મતદાન મથકે પહોંચી નિભાવી ફરજ
ગુજરાતમાં હાલ ચાલી રહેલા બીજા તબક્કાના મતદાનમાં લોકતંત્ર મજબૂત કરવા કોઈ લાકડીના ટેકે, તો કોઈ એમ્બ્યુલન્સ તો કોઈ બ્રેઇન હેમરેજ ઓપરેશનના 48 કલાકમાં જ મત આપવ જતાં નજરે પડ્યા છે. લોકશાહીના આ પર્વને ઉજવવા માટે વડીલો અને નેતાઓ પણ મતદાન કરવા અપીલ કરી રહ્યા છે. આળસના કારણે મતદાન નહીં કરનાર મતદારો માટે અનેક દાખલારૂપ કિસ્સો સામે આવ્યો છે. અમદાવાદમાં આજે ઑક્સીજન સાથે એક દર્દી મતદાન કરવા પહોંચ્યા હતા. આ તરફઆ અન્ય એક 93 વર્ષ વૃધ્ધ મહિલાએ પણ મતદાન કરી લોકોને મતદાન કરવા અપીલ કરી છે.
આણંદના લોકોમાં મતદાનને લઇ ઉત્સાહ
આણંદમાં મતદારોમાં મતદાન માટે અનેરો ઉસ્તાહ જોવા મળી રહ્યો છે. આણંદમાં હોસ્પિટલમાંથી દર્દીએ સીધા મતદાન કેન્દ્રમાં આવી મતદાન કર્યું હોવાનું સામે આવ્યું છે. આજે આણંદની અંબાલાલ બાલશાળા ખાતે બ્રેઇન હેમરેજનાં ઓપરેશન બાદ 48 કલાકમાં જ જૈન સમાજનાં અધ્યક્ષ રમેશ શાહે મતદાન કરી ઉત્તમ ઉદાહરણ પૂરું પાડ્યું છે. તેઓને એમ્બ્યુલન્સમાંથી સીધા મતદાન કેન્દ્ર ખાતે લાવવામાં આવ્યાહોય તેમણે મતદાન કરી જણાવ્યું હતું કે, મતદાન એ આપણી ફરજ છે. આ સાથે તેમણે સૌને મતદાન કરવા અપીલ કરી છે.
આ તરફ અરવલ્લી જિલ્લામાં મતદાનને લઇ મતદારોમાં ઉત્સાહ જોવા મળી રહ્યો છે. આ દરમ્યાન મોડાસાના નવા ગામમાં વૃદ્ધાએ મતદાન કર્યુ છે. આજે 103 વર્ષની ઉંમરે સંતોકબેન પટેલે મતદાન કરી યુવા મતદારો માટે શ્રેષ્ઠ ઉદાહરણ પૂરું પાડ્યું છે. તો વળી માતર વિધાનસભાના ભાજપના ઉમેદવાર કલ્પેશભાઇ પરમારે પણ આજે મતદાન કર્યું હતું. તેઓએ 104 વર્ષીય માતા સાથે મતદાન કર્યું હતું.
પાટણમાં બીજા તબક્કાનું પૂરજોશમાં મતદાન
પાટણ જિલ્લામાં બીજા તબક્કાના મતદાનને લઈ હાલમાં લોકો મતદાન મથકો પર પહોંચી રહ્યા છે. આ દરમ્યાન પાટણ જિલ્લાના હારીજ તાલુકાના જસોમાવ ગામમાં 90 વર્ષના વૃદ્ધે મતદાન કર્યું છે. આ સાથે 90 વર્ષના વૃદ્ધે લોકોને પણ મતદાન કરવા આહ્વાન કર્યું છે. આ 90 વર્ષના વૃદ્ધ લાકડીના ટેકે મતદાન મથકે પહોંચી ફરજ નિભાવી હતી.
રાજ્યમાં હાલ ચાલી રહેલા બીજા તબક્કાના મતદાન માટે આળસ કરતાં યુવાનોએ આ વૃધ્ધોના મતદાનને જોવાની જરૂર છે. અમદાવાદના નારણપુરા ખાતે આજે એક દર્દી ઓકશીજન સાથે મતદાન કરવા પહોંચ્યા હતા. 72 વર્ષીય રાકેશ શાહ લોકશાહીના તહેવારમાં પોતાની ફરજ અદા કરવા માટે મતદાન કરવા પહોંચ્યા હતા. આ સાથે તેમણે અન્ય લોકોને પણ મતદાન કરવા અપીલ કરી હતી.
આ સાથે એક 93 વર્ષના વૃદ્ધ મહિલાએ પણ મતદાન કર્યું હોવાનું સામે આવ્યું છે. વૃધ્ધાવસ્થાને કારણે 93 વર્ષના વૃદ્ધ મહિલા વહિલચેરમાં મતદાન કરવા આવ્યા હતા. વૃદ્ધ મહિલાના મતદાનનો ઉત્સાહ એવો હતો કે તેમણે દીકરા પાસે મતદાન કરવાની જીદ કરી હતી. જેને લઈ હવે મતદાતા માટે બા પ્રોત્સાહન રૂપ બન્યા છે. ચૂંટણીના બીજા તબક્કાના મતદાન દરમ્યાન આજે અનોખા દ્રશ્યો સામે આવ્યા છે. આજે આણંદમાં મતનું મૂલ્ય સમજાવતા દ્રશ્યો સામે આવ્યા છે. વાત જાણે એમ છે કે, વયોવૃદ્ધ પથારીવશ વૃદ્ધાએ મતદાનમાં ઉસ્તાહ દાખવ્યો છે. જેને લઈ એમ્બ્યુલન્સ સાથે મહિલા મતદાર મતદાન મથક પર પહોંચ્યા હતા. જ્યાં બીમાર અને પથારીવસ હોવા છતાં મતદાન મથક પહોંચી મતદાન કર્યું છે.