જૂનાગઢ: હાર્દિક પટેલના ઉપવાસ આંદોલનનો આજે 15 મો દિવસ છે ત્યારે જૂનાગઢમાં પણ હાર્દિક પટેલને પાટીદાર યુવાનોનું સમર્થન મળ્યું છે.
હાર્દિકના સમર્થનમાં મોટી સંખ્યમાં પાટીદાર યુવાનો રસ્તા પર ઉતરી આવ્યા છે અને શાળા-કોલેજો બંધ કરાવી રહ્યા છે. એટલું જ નહીં પરંતુ શાળા-કોલેજો બંધ કરાવી સરકાર સામે દેખાવો પણ કર્યા છે.
તો આ તરફ હાર્દિક પટેલના સમર્થનમાં માણાવદરના કોંગ્રેસના ધારાસભ્ય જવાહર ચાવડા એક દિવસીય ઉપવાસ પર બેઠા છે. આ એક દિવસીય ઉપવાસમાં જવાહર ચાવડાની સાથે મોટી સંખ્યામાં પાસ અને કોંગ્રેસના કાર્યકરો જોડાયા છે. ચાવડાએ એવી પણ ચીમકી આપી છે કે સરકાર માગ નહીં સ્વીકારે તો આવતીકાલથી જિલ્લાના તમામ મથકોએ ઉપવાસ કરવામાં આવશે.
આપને જણાવી દઇએ કે પાટીદાર નેતા હાર્દિક પટેલે છેલ્લા 14 દિવસથી સરકાર સામે બાંયો ચડાવી છે. તે આમરણાંત ઉપવાસ આંદોલન કરીને ખેડૂતા દેવાની માફી અને આરક્ષણની માગ કરી રહ્યા છે ત્યારે તેમના આ આંદોલનને કોંગ્રેસ સહિત અન્ય પક્ષો તથા વિવિધ સંગઠનોએ ટેકો જાહેર કરેલ છે.