રક્તદાન મહાદાન આ સ્લોગન સાથે આપણે રક્તદાન માટે અનેક કેમ્પો ચલાવીએ છીએ.લાખો લોકો રક્તનું દાન પણ કરે છે.પરંતુ તેમાં તંત્રના વાંકે કોઈ બીમાર વ્યક્તિનું લોહી આવી જાય અને તે કોઈ દર્દીને ચઢી પણ જાય તો કદાચ તે વ્યક્તિનો જીવ જોખમમાં મુકાઈ શકે છે.આવી જ બેદરકારી પાટણ તાલુકાની ધારપુરા હોસ્પિટમાં સામે આવી છે.
જેને લઈને ફુડ એન્ડ ડ્રગ્ઝ વિભાગ દ્વારા હોસ્પિટની બ્લડબેંકને બંધ કરવાનો આદેશ અપાયો છે.હોસ્પિટલમાં ચાલતી બ્લડ બેંકમાં છ મહિના પહેલા ફુડ એન્ડ ડ્રગ્ઝ વિભાગ દ્વારા સર્ચ ઓપરેશન હાથ ધરવામાં આવ્યું હતું.જેમાં હોસ્પિટલની બ્લડ બેંકમાં 17 પ્રકારની બેદરકારી સામે આવી હતી.
તેમાં પણ સૌથી મોટી બેદકરારી HIV બ્લડના સેમ્પલમાં સામે આવી હતી.જે બાદ અન્ય એક સેમ્પલમાં ઓસ્ટ્રેલિયા એન્ટીજન નામના કમળાના બ્લડનો રિપોર્ટ પોઝિટીવ હોવા છતાં નેગેટીવ દર્શાવાયો હતો.
જે બાદ બ્લડ બેંકને બંધ કરવાનો આદેશ અપાયો હતો.અહીં મહત્વની બાબત તો એ છે કે હોસ્પિટલમાં બ્લડ બેંક બંધ કરાતા દર્દીઓને હાલાકીનો સામનો કરવો પડી રહ્યો છે.હોસ્પિટલમાં સારવારઅર્થે આવનાર દર્દીઓને લોહી માટે છેક સિદ્ધપુર મહેસાણા ઊંઝા સુધી ધક્કા ખાવા પડે છે.ક્યારેક ઈમર્જન્સીમાં લોકોને લોહી ન મળતા જીવ પણ ગુમાવવો પડે છે.
મહત્વનું છે કે આ હોસ્પિટલને કરોડોના ખર્ચે રાજ્યની સરકારે બનાવી તો છે.પરંતુ વહીવટી તંત્રની કામગીરી એટલી ખાડે ગઈ છે કે હોસ્પિટલ વિવાદોનું એપી સેન્ટર બની ગયું છે.
તો બીજી તરફ દુર દુરથી સારવારઅર્થે આવતા દર્દીઓને લોહી માટે અન્ય શહેરો સુધી ભટકવું પડી રહ્યું છે.ત્યારે જોવું રહ્યું કે રાજ્યની સરકાર સ્વાસ્થ્ય પાછળ કરોડો રૂપિયાનો ખર્ચ તો કરે છે.પરંતુ આ બેદરકાર વહીવટી તંત્ર સામે ક્યારે અને કેવા કડક પગલાં ભરે છે.