ગજબ ભયો રામા / પેપરમાં 200 વિદ્યાર્થીઓના એક સરખા જવાબ, ગુજરાતની આ યુનિ.માં મોટા કાંડ બાદ આરોપ-પ્રત્યારોપ

• ઉત્તર ગુજરાત યુનિવર્સિટી ફરી વિવાદમાં આવી
• પેપરમાં 229 વિદ્યાર્થીઓના એક સરખા જવાબ
• B.Sc સેમિસ્ટર-2ની પરીક્ષામાં મોટા પ્રમાણમાં ગેરરીતિ

પાટણની હેમચંદ્રાચાર્ય ઉત્તર ગુજરાત યુનિવર્સિટી ઘણી વાર વિવાદમાં આવેલી છે. ત્યારે આ વખતે ફરી વાર યુનિવર્સિટી વિવાદમાં આવી છે. પરીક્ષામાં માસ કોપીને લઇને યુનિવર્સિટી ફરી વિવાદમાં આવી છે. B.Sc સેમિસ્ટર-2ની પરીક્ષામાં મોટા પ્રમાણમાં ગેરરીતિ સામે આવી છે. જેમાં 229 વિદ્યાર્થીઓના પેપરમાં એકસરખા જવાબ લખેલા જોવા મળ્યા છે. જેમાં કેમેસ્ટ્રીના પેપરમાં 200 વિદ્યાર્થીઓના જવાબ એકસરખા છે તો મેથ્સના પેપરમાં 29 વિદ્યાર્થીઓના જવાબ એકસરખા જોવા મળ્યાં છે.

તમામના પરિણામ સ્થગિત કરી દેવાયા

સમગ્ર ઘટના પરનો પર્દાફાશ પેપર ચેકિંગમાં માસ કોપીનો ભાંડો ફૂટ્યો છે. જો કે ત્યાર બાદ આ મામલે પરીક્ષા સમિતિ દ્વારા તપાસ હાથ ધરવામાં આવી છે. કેમેસ્ટ્રી અને ગણિતના વિદ્યાર્થીઓના વર્ગખંડના CCTV મંગાવાયા છે. પરીક્ષાના સુપરવાઇઝરોને પણ નોટિસ ફટકારવામાં આવી છે. તમામના પરિણામ સ્થગિત કરી દેવાયા છે.

અગાઉ પણ આવો જ એક કિસ્સો સામે આવ્યો હતો

જો કે, આવું પ્રથમ વાર નથી થયું કે પાટણની હેમચંદ્રાચાર્ય ઉત્તર ગુજરાત યુનિવર્સિટીમાં માસ કોપીનો કેસ નોધાયો હોય. ગત વર્ષે પણ નર્સિંગની પરીક્ષામાં 15 વિદ્યાર્થીઓએ એક જ પ્રશ્નના એકસરખા જવાબ આપ્યા હતાં. જો કે, તે સમયે પણ માસ કોપી કેસ નોંધાયો હતો. ત્યારે આ વર્ષે ફરીથી કોપી કેસ રિપીટ થયો છે. જે પરીક્ષાના સુપરવાઈઝર્સ પર સવાલો પેદા કરે છે.