ચૂંટણી / લોકસભામાં ભાજપને ભારે પડશે પાસ! સૌરાષ્ટ્ર ઝોનની બેઠકમાં ઘડાઇ રણનીતિ

મોરબીના આમરણ ગામે પાસે પાસની સોરાષ્ટ્ર ઝોનની આજે બેઠક યોજાઇ હતી. જેમાં હાર્દિક પટેલની સૂચક ગેરહાજરી આખે ઉડીને વળગી હતી. લોકસભાની ચૂંટણીમાં પાસનું કેવું સ્ટેન્ડ રહેશે તે મુદે યોજાયેલી આ મીટીંગમાં લોકસભાની ચૂંટણીમાં પાસ ભાજપ વિરુદ્ધ પ્રચાર કરશે તેવો નિર્ણય લેવાયો હતો અને ગુજરાતમાં 26 સીટોમાં ભાજપને હરાવવા પાસ મેદાને પડશે તેવો લલકાર કરાયો હતો.

આગામી લોકસભાની ચૂંટણીમાં પોતાનું સ્ટેન્ડ નક્કી કરવા માટે પાટીદાર અનામત અદોલન સમિતિની સૌરાષ્ટ્ર ઝોનની એક અગત્યની મીટીંગ મોરબી આમરણ ખાતે યોજાયા હતી. જેમાં હાર્દિક પટેલ હાજર રહેશે તેવી અગાઉ જાહેરાત કર્યા બાદ આજે આ મહત્વની બેઠકમાં તે ગેરહાજર રહ્યો હતો. 

આ મીટીંગ અંગે મોરબી પાસ સમિતિની કન્વીનર મનોજભાઈ પનારાએ મીડિયા સાથેની વાતચીતમાં જણાવ્યું હતું કે, આ પાસની સૌરાષ્ટ્ર ઝોનની બેઠકમાં સોરાષ્ટ્ના અને ગુજરાતના કન્વીનર તથા કાર્યકરો ઉપસ્થિત રહ્યા હતા. આ મીટીંગમાં સર્વાનુમતે આગામી લોકસભાની ચૂંટણીમાં પાસ ભાજપ વિરુદ્ધ પ્રચાર કરશે તેવો ઠરાવ કરાયો છે. હવે પછીની મધ્ય, દક્ષિણ તથા ઉત્તર ગુજરાતમાં મળનારી પાસની મીટીંગમાં પણ આ નિર્ણય લેવામાં આવશે.
 

આ મીટીંગમાં અલ્પેશ કથીરિયા તથા પાટીદાર શહીદોને યોગ્ય ન્યાય મળે તે માટે મુદા હતા. જોકે ભાજપ સરકારે પાટીદારો પર દમનનીતિ અપનાવી હોવાથી આગામી લોકસભસની ચૂંટણીમાં ભાજપનો હરાવવા પાસ મેદાને પડશે. 

ગુજરાતમાં ભાજપને 26 સીટો પર હરાવવા માટે સમગ્ર ગુજરાતમાં ભાજપ વિરુદ્ધ પ્રચાર કરાશે. આ માટેની પત્રિકાઓ સાથે 1 હજારથી વધુ યુવાનોની ટીમ ગુજરાતના ગામે ગામ ફરશે અને લોકોને ભાજપમાં મતદાન ન કરવા સમજાવશે, તેમજ મુખ્યમંત્રીએ હાર્દિક પટેલ સામે જે નિવેદન આપ્યું છે. તેના વિરોધમાં તેમના પૂતળાનું દહન કરાશે. સાથે પાકવિમો તથા સિંચાઈ સહિતના મુદે ભાજપ સરકારની નિષ્ફળતાને ઉજાગર કરશે.

જોકે ગત વિધાનસભાની ચૂંટણીમાં ભાજપને જબરી ટક્કર આપી હોય તેમાં સફળતા મળી હોવાથી આ લોકસભાની ચૂંટણીમાં ભાજપને હરાવવા તમામ તાકાત કામે લગાવીને એમાં સફળતા મેળવશે એવું તેમણે જણાવ્યું હતું.