સંસદના બજેટ સત્રનો આજે મહત્વપૂર્ણ દિવસ છે. નાણામંત્રી નિર્મલા સીતારમણ આજે બજેટ પરની ચર્ચાના જવાબ આપશે પરંતુ આ સિવાય રાજ્યસભામાં આજે હાજર રહેવા માટે વ્હિપ જાહેર કરતા સોશિયલ મીડિયા પર અટકળોનો દોર શરૂ થયો છે.
સંસદ માટે આજે મહત્વનો દિવસ
ભાજપના સાંસદોએ વ્હિપ જાહેર કર્યો
સોશિયલ મીડિયા ઉપર અફવા બજાર ગરમ
આજે દરેકની નજર દિલ્હીના ચૂંટણી પરિણામો પર છે. પરંતુ સંસદના બજેટ સત્રમાં પણ હલચલ તેજ થઈ છે. સોમવારે મોડી સાંજે ભારતીય જનતા પાર્ટીએ તેના લોકસભા અને રાજ્યસભાના સાંસદોને એક વ્હિપ જારી કર્યો છે. આ વ્હિપ બાદ સોશિયલ મીડિયા પર અટકળોનું બજાર ગરમ થવા લાગ્યું અને અનેક પ્રકારની અફવાઓ પણ શરૂ થઈ ગઈ. ટ્વિટર પર લોકોએ યુનિફોર્મ સિવિલ કોડથી લઈને દિલ્હી સુધી કેટલાક મોટા નિર્ણયોની ચર્ચા શરૂ કરી દીધી છે.
સાંસદોને ભાજપનો વ્હિપ
આજે બજેટ સત્રના પહેલા ભાગનો અંતિમ દિવસ છે અને નાણામંત્રી નિર્મલા સીતારમણ આ દિવસે બજેટ સત્રના બંને સત્રોમાં થયેલી ચર્ચાના જવાબ આપશે. આવી સ્થિતિમાં ભારતીય જનતા પાર્ટી દ્વારા બંને ગૃહોના સભ્યોને વ્હિપ આપવામાં આવ્યો હતો, જેમાં તમામ સભ્યોને ગૃહમાં હાજર રહેવા અને સરકારને ટેકો આપવા જણાવાયું હતું.
નોંધનીય છે કે આ વખતે બજેટ પૂરું થાય તે પહેલાં સરકાર મની બિલ સંસદમાં રજૂ કરશે. સંસદમાં 'વિવાદ સે સંવાદ' બિલને પાસ કરવાને લઈને પણ વ્હિપ જાહેર કર્યો હોય એમ બની શકે.
સોશિયલ મીડિયા ઉપર અટકળો
મોડી રાત્રે ભાજપનો વ્હિપ આવતા સાથે જ લોકો ટ્વિટર પર સક્રિય થઈ ગયા અને વિવિધ અટકળો શરૂ કરી દીધી. આ પહેલા જ્યારે પણ ભાજપ દ્વારા તાજેતરના સમયમાં તેના સાંસદો માટે વ્હિપ આપવામાં આવ્યો છે ત્યારે કંઈક મોટું થયું છે.પછી તે જમ્મુ-કાશ્મીરમાંથી કલમ 370 પાછી ખેંચવાનું હોય કે રામ મંદિર માટે ટ્રસ્ટના નામની ઘોષણા હોય. આ સિવાય નાગરિકતા સુધારો અધિનિયમ દરમિયાન પણ આવું જ કરવામાં આવ્યું હતું.
ટ્વીટર ઉપર લોકો શું કહે છે?
ભાજપના વ્હિપના મુદ્દા પછી, સોશિયલ મીડિયા પર જે ચર્ચા ચાલી રહી છે તેનું પહેલું નામ 'યુનિફોર્મ સિવિલ કોડ' છે, જે ભાજપના મુખ્ય એજન્ડા પર રહ્યું છે. સોશિયલ મીડિયા પર એક પેપર વાયરલ થઈ રહ્યું છે, જેને સંસદની કાર્યવાહીના ભાગ રૂપે વર્ણવવામાં આવી રહ્યું છે અને તેમાં યુનિફોર્મ સિવિલ કોડ બિલ 2020 નો ઉલ્લેખ છે.