આજે પાંચમાં દિવસે પણ સંસદમાં કામકાજ બંધ રહેતા કોંગ્રેસના સાંસદોએ ભવનની બહાર ગાંધીજીની પ્રતિમા પાસે આકરો વિરોધ નોંધાવી ભાજપ સામે આરોપ લગાવ્યા હતા.લોકસભા પાંચ દિવસમાં માત્ર 42 મિનિટ અને રાજ્યસભાની કાર્યવાહી 55 મિનિટ મળી કુલ 97 મિનીટ જ કાર્યવાહી ચાલી હતી
સંસદમાં પાંચમાં દિવસે પણ કામકાજ ઠપ્પ
લોકસભા અને રાજ્યસભા 20 માર્ચ સુધી સ્થગિત
કોંગ્રેસના સાંસદોએ ભવનની બહાર ગાંધીજીની પ્રતિમા પાસે આકરો વિરોધ નોંધાયો
મોટાગજાના ઉદ્યોગપતિ ગૌતમ અદાણી અંગે રાહુલ ગાંધીના ભાષણને પગલે મડાગાંઠ જન્મી છે. જેને લઈને આજે સંસદમાં પાંચમાં દિવસે પણ કામકાજ ઠપ્પ રહ્યું હતુ. જેને પગલે હવે લોકસભા અને રાજ્યસભા સોમવારે એટલે કે 20 માર્ચ સુધી સ્થગિત કરી દેવામાં આવી છે. તો સંસદ સ્થગિત થયા બાદ કોંગ્રેસના સાંસદોએ ભવનની બહાર ગાંધીજીની પ્રતિમા પાસે આકરો વિરોધ નોંધાયો હતો અને સરકાર વિરુદ્ધ સૂત્રોચાર કર્યા હતા. કોંગ્રેસે 'રાહુલ કો બોલને દો' ના નારા લગાવ્યા હતા તો તેના જવાબમાં ભાજપના નેતાઓએ 'રાહુલ શરમ કરો'ના નારા લગાવ્યા હતા.
સત્રનો 13 માર્ચથી થયો હતો પ્રારંભ
આ દરમિયાન કોંગ્રેસના સાંસદોએ આક્ષેપો સાથે જણાવ્યું હતું કે મોદી સરકાર ગૃહમાં કામ કરવા નથી દેતી અને અદાણી મામલામાંથી લોકોનું ધ્યાન ભટકાવવા માંગી રહી છે. ભાજપ દ્વારા ગૃહમાં રાહુલ ગાંધી પાસેથી માફી માંગવા આગ્રહ કરી રહી છે. આપને જણાવી દઈએ કે બજેટ સત્રના બીજા તબક્કાનો તા. 13 માર્ચથી પ્રારંભ થયો હતો પરંતુ સંસદમાં હંગામાને કારણે ગૃહની કાર્યવાહી એક દિવસમાં પૂરી થઈ શકી ન હતી. પરિણામે સંસદના આ તબક્કામાં 35 બિલ પેન્ડીંગ હોવાનું જાણવા મળી રહ્યું છે.
પાંચ દિવસમાં કાર્યવાહી માત્ર 42 મિનિટ જ ચાલી
ઉલ્લેખનીય છે કે હોબાળાને લઈને લોકસભા પાંચ દિવસમાં માત્ર 42 મિનિટ જ ચાલી છે. એટલે કે 13 માર્ચથી માંડીએ 17 માર્ચ સુધીના સમયગાળા દરમિયાન લોકસભાની કાર્યવાહી માત્ર અને માત્ર 42 મિનિટ જ ચાલી રહી હતી. લોકસભા ટીવીના ડેટા અનુસાર 13 માર્ચે 9 મિનિટ, 14 માર્ચે ચાર મિનિટ અને 15 માર્ચે ચાર મિનિટ તથા 16 માર્ચે સાડા ત્રણ મિનિટ અને 17 માર્ચે 22 મિનિટ એટલે કે કુલ 42 મિનિટ જ કાર્યવાહી ચાલુ હતી. તો છેલ્લા 5 દિવસમાં રાજ્યસભાની કાર્યવાહી 55 મિનિટ સુધી ચાલી હતી.આમ બન્ને ગૃહ માત્ર 97 મિનીટ જ ચાલ્યા હતા. આ દરમિયાન સંસદમાં કોઈ બિલ પાસ થયુ નથી! બીજી બાજુ એક રિપોર્ટમાં જાણવા મળતી વિગત અનુસાર સંસદમાં એક કલાકનો ખર્ચ 1.5 કરોડ રૂપિયા છે. અંદાજ મુજબ સંસદમાં એક મિનિટની કાર્યવાહીનો ખર્ચ 2.5 લાખ રૂપિયા હોવાનું સામે આવ્યું છે.
2008 બાદ આ પ્રથમ વખત બન્યું
બીજી તરફ તૃણમુલ કોંગ્રેસે પણ સરકાર સામે નિશાન સાંધી સાંસદ ડેરેક ઓબ્રાઈને લખ્યું કે છેલ્લા પાંચ દિવસથી સત્તામાં બેઠેલા પક્ષના નેતાઓ સંસદ ચલાવવા દેતા નથી. મહત્વનું છે કે 2008 બાદ આ પ્રથમ વખત બન્યું છે જ્યારે સતાધારી પક્ષના હોબાળાને પગલે સાંસદની કાર્યવાહી પર રોક લગાવી દેવામા આવી હોય! 2008માં અમેરિકા સાથેના પરમાણુ કરારને લઈ અને ડાબેરીઓએ હોબાળો મચાવ્યો હતો. મહત્વનું છે કે સંસદ ચલાવવાની જવાબદારી રાજ્યસભાના અધ્યક્ષ, લોકસભાના સ્પીકર, સંસદીયાના પ્રધાન અને વિપક્ષના નેતા પર સૌથી વધુ હોય છે.