અમદાવાદમાં મલ્ટિ લેવલ પાર્કિંગ તેમજ મ્યુનિ. પ્લોટમાં પાર્કિંગ જેવી ઓફલાઈન પાર્કિંગની સુવિધાની સાથે-સાથે તંત્રે ઓનસ્ટ્રીટ પાર્કિંગનો નવો અભિગમ અપનાવ્યો
અમદાવાદીઓ માટે મોટા સમાચાર, પાર્કિંગની સમસ્યામાંથી છુટકારો
ટોરેન્ટ ક્રોસિંગથી સરખેજ-વિશાલા હાઈવે ક્રોસ રોડ સુધી ઓનસ્ટ્રીટ પાર્કિંગ
મ્યુનિ. તંત્ર દ્વારા 610 વાહનો પાર્ક કરવા માટેનાં ચક્રો ગતિમાન કરાયાં
અમદાવાદના શહેરીજનોને હવે AMTS અને BRTS ઉપરાંત મેટ્રો ટ્રેનનો વિકલ્પ જાહેર પરિવહન સેવા ક્ષેત્રમાં સાંપડ્યો છે. તેમ છતાં શહેરમાં અંગત વાહનોના વપરાશમાં પણ વધારો થયો છે, જેના કારણે લોકોને કાયમ માટે કનડતી સમસ્યામાં પોતાનાં વાહનોનું પાર્કિંગ કર્યાં કરવું તેનો સમાવેશ થાય છે. મ્યુનિ.તંત્ર દ્વારા દબાણથી સાંકડા થયેલા રોડને તેને હટાવી પહોળા કરવાની ઝુંબેશ સતત ચાલતી રહે છે. ઉપરાંત નિતનવા બ્રિજ પ્રોજેક્ટથી પણ લોકોને રાહત આપવાની દિશામાં તંત્રનો અભિગમ રહ્યો છે.
વાહનોનાં ઓનસ્ટ્રીટ પાર્કિંગ માટે કવાયત
અમદાવાદમાં પાર્કિંગની વાત કરીએ તો મલ્ટિ લેવલ પાર્કિંગ તેમજ મ્યુનિ. પ્લોટમાં પાર્કિંગ જેવી ઓફલાઈન પાર્કિંગની સુવિધાની સાથે-સાથે તંત્રે ઓનસ્ટ્રીટ પાર્કિંગનો નવો અભિગમ અપનાવ્યો છે, જે અંતર્ગત દક્ષિણ-પશ્ચિમ ઝોનમાં આવેલા ટોરેન્ટ ક્રોસિંગથી સરખેજ-વિશાલા હાઇવે ક્રોસ રોડ સુધી વાહનોનાં ઓનસ્ટ્રીટ પાર્કિંગ માટેનાં ચક્રો ગતિમાન કરાયાં છે.
અગાઉ મ્યુનિ. સત્તાવાળાઓએ પૂર્વ ઝોનના વાહનચાલકોને ઓનસ્ટ્રીટ પાર્કિંગની સુવિધા પૂરી પાડવા માટે પ્રયાસ હાથ ધર્યા હતા, જેમાં વસ્ત્રાલ વોર્ડમાં ઓમ સર્કલથી વસ્ત્રાલ તળાવ સુધી 60 ટુ વ્હીલર અને 15 ફોર વ્હીલર તો નિકોલ વોર્ડમાં સુકન ચાર રસ્તાથી રસપાન ચાર રસ્તા સુધી 280 ટુ વ્હીલર અને 65 ફોર વ્હીલર મળીને કુલ 420 વાહનોનાં ઓનસ્ટ્રીટ પાર્કિંગ માટેની કવાયત હાથ ધરી હતી.
કયા-કયા ઓનસ્ટ્રીટ પાર્કિંગની કવાયત ?
દક્ષિણ-પશ્ચિમ ઝોનમાં અતિવ્યસ્ત શ્યામલ ચાર રસ્તાથી શિવરંજની ચાર રસ્તા સુધીના રોડની એક બાજુ 38 ટુ વ્હીલર અને 61 ફોર વ્હીલર મળીને કુલ 99 વાહન અને ટીપી સ્કીમ નં. 23+26 હેઠળ સર્કલ પીથી દિવ્ય ભાસ્કર પ્રેસ સુધીના રોડ પર 180 ટુ વ્હીલર અને 93 ફોર વ્હીલર મળીને કુલ 273 વાહન અને ટીપી નં. 85નો 100 ફૂટના રોડ એટલે કે મેડી પ્લસ બિલ્ડિંગથી સવેરા હોટલની બાજુથી પસાર થતા રોડની એક બાજુએ 187 ટુ વ્હીલર અને 38 ફોર વ્હીલર મળીને કુલ રરપ વાહનના ઓનસ્ટ્રીટ પાર્કિંગની તજવીજ હાથ ધરવામાં આવી હતી. આ ત્રણેય રોડ પર 405 ટુ વ્હીલર અને 192 ફોર વ્હીલર મળીને કુલ 597 વાહનનો સમાવેશ થાય છે.
પશ્ચિમ ઝોનની વાત કરીએ તો શહેરના સૌથી સમૃદ્ધ આ ઝોનમાં વાહનચાલકોને સી.જી. રોડ પર 830 ટુ વ્હીલર અને 415 ફોર વ્હીલર, માઉન્ટ કાર્મેલથી મીઠાખળી છ રસ્તા પર 228 ટુ વ્હીલર અને 78 ફોર વ્હીલર અને હેપી સ્ટ્રીટ ફરતે 1617 ટુ વ્હીલર અને 294 ફોર વ્હીલરના પાર્કિંગની સુવિધા મળી રહી છે. હવે દક્ષિણ-પશ્ચિમ ઝોનમાં આવેલા ટીપી સ્કીમ નં. 84/એના ટોરેન્ટ ક્રોસિંગથી સરખેજ-વિશાલા ક્રોસ રોડ સુધીના 40 મીટરના રોડ પર ઓનસ્ટ્રીટ પાર્કિંગની સુવિધા વાહનચાલકોને આપવા માટેનાં ચક્રો ગતિમાન કરાયાં છે. આ ઓનસ્ટ્રીટ પાર્કિંગ હેઠળ વાહનચાલકોનાં 216 ટુ વ્હીલર અને 394 ફોર વ્હીલર મળીને કુલ 610 વાહનો રોડ પર પાર્કિંગ કરી શકાશે.
ટેન્ડર-કમ-હરાજીની નોટિસ પ્રસિદ્ધ
આ માટે ટેન્ડર-કમ-હરાજીની નોટિસ પ્રસિદ્ધ કરવામાં આવી છે, જેમાં વાર્ષિક અપસેટ વેલ્યૂ રૂ. 12,82,669 રખાઈ છે, જ્યારે અર્નેસ્ટ મની ડિપોઝિટ રૂ.75 હજાર છે. આગામી તા. 2 ફેબ્રુઆરીએ હરાજી થવાની છે. ત્રણ વર્ષની મુદત માટે કોન્ટ્રાક્ટ અપાશે: મ્યુનિસિપલ કોર્પોરેશન દ્વારા ઓનસ્ટ્રીટ પાર્કિંગ રોડનો કોન્ટ્રાક્ટ માટેનાં ટેન્ડર-કમ-હરાજીની નોટિસમાં દર્શાવ્યા મુજબ આ કોન્ટ્રાક્ટ ત્રણ વર્ષની મુદતનો છે. હરાજીમાં આવેલી ઓફર પૈકી જેની મહત્તમ ઓફર હશે તેને કોન્ટ્રાક્ટ અપાશે. કોન્ટ્રાક્ટ અપાયાના દશ દિવસમાં એક વર્ષની લાઈસન્સ ફીની 50 ટકા રકમ એડ્વાન્સ જમા કરાવવાની રહેશે. છ માસની લાઈસન્સ ફી પહેલી વખત જમા થયાના છ માસમાં બાકી લાઈસન્સ ફી જમા કરાવવાની રહેશે, નહીં તો કોન્ટ્રાક્ટ રદ કરવામાં આવશે.
40 ટકા જગ્યા પાર્કિંગ પરમિટ માટે રખાશે
પાર્કિંગ માટેની કુલ જગ્યામાંથી 40ટકા જગ્યા પાર્કિંગ માટે અનામત રાખવાની રહેશે. જો કોઈ અરજદાર પાર્કિંગ પરમિટ માટે માગણી કરે તો તેમને પાર્કિંગ પરમિટ માટે અનામત રાખેલી જગ્યા ફાળવવાની રહેશે. જો પાર્કિંગ પરમિટ પૂરતા પ્રમાણમાં ઉપલબ્ધ ન બને તેવા સંજોગોમાં સામાન્ય લોકોનાં પાર્કિંગ માટે તે જગ્યાનો ઉપયોગ કરી શકાશે.
ટુ વ્હીલરના 2 કલાકના પાર્કિંગ માટે 5 રૂપિયા લેવાશે
તંત્રે પહેલા 2 કલાકના પાર્કિંગ માટે રાબેતા મુજબ સ્કૂટરનું રૂ. 5 ભાડું નક્કી કર્યું છે, જ્યારે કાર માટે રૂ. 15 ચૂકવવા પડશે. સાઈકલધારકે પહેલા એક કલાક માટે 1 રૂપિયો અને 2 કલાક માટે 2 રૂપિયા ચૂકવવા પડશે. મધ્યમ પ્રકારનાં વાહનોએ પહેલા એક કલાકના 50 રૂપિયા અને બે કલાક માટે 80 રૂપિયા તો હેવી ગુડ્સના મામલે પહેલા કલાકના 75 રૂપિયા અને બે કલાક માટે 125 રૂપિયા ચૂકવવાની તૈયારી રાખવી પડશે.