પરીક્ષા પે ચર્ચા દરમિયાન PM મોદીએ દેશભરના બાળકોને ટેકનોલજીના ગુલામ ન બનવા માટે કરી ટકોર
PM મોદીએ કરી પરીક્ષા પે ચર્ચા
તમે REELS માંથી બહાર જ નથી આવતા: PM
ઘરમાં ને ઘરમાં લોકો એકબીજાને મેસેજ કરે છે: PM
ગેજેટ આપણાથી સ્માર્ટ નથી, તેના ગુલામ ન બનો: PM
REELS ને લઈને કરી ટકોર
દેશ માટે ચિંતાનો વિષય છે કે ભારતમાં લોકો એવરેજ છ કલાક સ્ક્રીન પર વિતાવે છે, જ્યારે મોબાઈલ ફોન પર ટોકટાઈમ હતો ત્યારે તો 20 મિનિટનો સમય જતો હતો. અને હવે તો REELS, એક વાર શરૂ કરો એટલે બહાર નીકળતા જ નથી. આ ગેજેટ આપણને ગુલામ બનાવી રહ્યો છે. તમે જોયું હશે મારા હાથમાં ભાગ્યે જ મોબાઈલ ફોન હોય, હું એક્ટિવ છું પણ એના માટે સમય નક્કી કરેલો છે. પ્રયાસ કરવા જોઈએ આપણે ગેજેટના ગુલામ નથી બનવું, ટેકનોલોજીનો ઉપયોગ કરો પણ ગુલામ ન બનો.
ક્રિએટિવિટી ખતમ થઈ જશે
માની લો કે તમે ઢોંસાની રેસીપી ઓનલાઈન જોઈ લીધી પણ શું તેનાથી પેટ ભરાઈ જશે? પેટ ભરવા માટે આપણે ઢોંસા બનાવવા પડશે. તમે જોયું હશે પહેલાના સમયમાં બાળકો આરામથી ઘડિયા બોલતા, વિદેશના લોકોને ખૂબ આશ્ચર્ય થતું, હવે ધીરે ધીરે કેવા હાલ થઈ ગયા છે. હવે બાળકો ક્ષમતા ગુમાવી રહ્યા છે. હવે તો AIના એવા પ્લેટફોર્મ આવી ગયા છે કે તમારે કશું કરવાની જરૂર જ નથી, ગૂગલથી પણ એક સ્ટેપ આગળ જતું રહ્યું છે આર્ટિફિશ્યલ ઈન્ટેલિજન્સ, એક ચેટમાં જ દુનિયાભરની માહિતી મળી જાય. પણ જો તમે તેમાં ફસાઈ ગયા તો તમારી ક્રિએટિવિટી ખતમ થઈ જશે.
ડિજિટલ ઉપવાસ કરો
હવે સમય બદલાઈ ગયો છે, શું તમે સપ્તાહમાં કોઈ દિવસ અથવા દિવસમાં કેટલાક કલાક માટે ટેકનોલોજીનો ઉપવાસ કરી શકો છો કે નહીં, તમે જોયું હશે કે ઘણા પરિવાર હોય છે કે બોર્ડની પરીક્ષા હોય ત્યારે પરિવાર બધુ બંધ કરી દે છે. TV પર પણ કપડું લગાવી દે છે, જો આપણે સ્વભાવથી નક્કી કરી શકીએ કે ડિજિટલ ઉપવાસ કરીએ. તેમાંથી જે લાભ મળે તે જુઓ. મેં જોયું છે કે પરિવાર હવે નાના થતાં જઈ રહ્યા છે, અને પરિવાર પણ ડિજિટલ દુનિયામાં ફસાઈ રહ્યા છે અને એક જ ઘરમાં માં, દીકરા, ભાઈ બહેન બેઠા છે પણ બધા એકબીજાને વોટ્સએપ મેસેજથી વાત કરી રહ્યા છે, બધા સાથે બેઠા છે પણ બધા ફોનમાં ખોવાઈ ગયા છે. પહેલા તો બસ અને ટ્રેનમાં લોકો ગપ્પાં મારતા પણ હવે તો ફોનમાં જ હોય છે. આ બીમારીઓ છે અને તેનાથી મુક્ત થવાની જરૂર છે. ઘરમાં પણ એક એરિયા નક્કી કરી નાંખો કે આ એરિયા નો ટેકનોલોજી ઝોન બધા ફોન બહાર મૂકીને આવે અને શાંતિથી વાતો કરે. તમે જુઓ જીવન જીવવાનો આનંદ શરૂ થશે.
પરીક્ષામાં નકલથી બચવા માટે પીએમનો મંત્ર
પીએમ મોદીએ કહ્યું કે, 'ઘણા એવા ટીચર હોય છે જે ટ્યુશનમાં ભણાવે છે અને તેના સ્ટુડન્ટના સારા નંબર આવે એ માટે આવૈ નકલ પદ્ધતિને વધારો આપે છે. ઘણા વિદ્યાર્થીઓ જેટલું ભણે તેના કરતાં વધારે સમય તો નકલની પદ્ધતિ શોધવામાં લગાવી દે છે, નાના અક્ષરની કાપલી બનાવે છે, જેટલી ક્રિએટિવિટી આમાં બતાવે છે એટલી ભણવામાં બતાવે તો નકલ કરવાની જરૂર ન પડે.'
#WATCH | PM Narendra Modi speaks on the issue of 'cheating' in examinations during 'Pariksha Pe Charcha' 2023 pic.twitter.com/5rsqxph6gJ
સ્માર્ટ વર્ક અને હાર્ડ વર્ક વચ્ચે શું પસંદ કરવું?
આ સવાલના જવાબમાં પીએમ મોદીએ કહ્યું, 'તમે બધાએ તરસ્યા કાગડાની વાર્તા તો સાંભળી જ હશે, જેમાં કાગડો કાંકરા નાખીને પાણી પીવે છે. શું તે તેની મહેનત હતી કે સ્માર્ટવર્ક? કેટલાક લોકો હાર્ડલી સ્માર્ટવર્ક કરે છે જ્યારે કેટલાક લોકો સ્માર્ટલી હાર્ડવર્ક કરે છે. આ આપણે કાગડા પાસેથી શીખવાનું છે.
આ વર્ષે 20 લાખ જેટલા સવાલ PM મોદી પાસે પહોંચ્યા
કેન્દ્રીય શિક્ષણ પ્રધાન ધર્મેન્દ્ર પ્રધાને એક પ્રેસ કોન્ફરન્સમાં જણાવ્યું હતું કે આ કાર્યક્રમમાં અત્યાર સુધીમાં લગભગ 20 લાખ પ્રશ્નો આવ્યા છે, જેને NCRT દ્વારા શોર્ટલિસ્ટ કરવામાં આવી રહ્યા છે. આ 20 લાખ પ્રશ્નોમાં વિદ્યાર્થીઓએ ફેમિલી પ્રેશર, સ્ટ્રેસ મેનેજમેન્ટ, અયોગ્ય માધ્યમથી બચવા, સ્વાસ્થ્ય અને કેવી રીતે ફિટ રહેવું, કારકિર્દીની પસંદગી વગેરે જેવા વિષયો પરથી પ્રશ્નો પૂછ્યા છે. પ્રધાને કહ્યું કે આ કાર્યક્રમ માટે 155 દેશોએ નોંધણી કરાવી છે.
પરિક્ષા પે ચર્ચા એ એક અનોખો કાર્યક્રમ છે
પરિક્ષા પે ચર્ચા કાર્યક્રમ નું આયોજન દર વર્ષે બોર્ડની પરીક્ષાઓ પહેલા કરવામાં આવે છે. જણાવી દઈએ કે વર્ષ 2018માં પ્રધાનમંત્રી નરેન્દ્ર મોદીએ આ કાર્યક્રમની શરૂઆત કરી હતી, જેમાં પીએમ મોદીએ દેશના બાળકો, શિક્ષકો અને માતા-પિતા અને વાલીઓ સાથે વાતચીત કરી હતી. નોંધનીય છે કે આ વર્ષે 38 લાખથી વધુ વિદ્યાર્થીઓએ આ કાર્યક્રમમાં ભાગ લેવા માટે રજીસ્ટ્રેશન કરાવ્યું છે, જે ગયા વર્ષ કરતા બમણાથી વધુ છે.
પરિક્ષા પે ચર્ચા કાર્યક્રમનું શિક્ષણ મંત્રાલય અને વડાપ્રધાન કાર્યાલયના ટ્વિટર, ફેસબુક અને ટ્યુબ પર લાઈવ પ્રસારણ કરવામાં આવશે અને આ સિવાય શિક્ષણ મંત્રાલયની સત્તાવાર વેબસાઇટ education.gov.in પર લાઈવ પ્રસારણની લિંક્સ છે. ખાસ જણાવી દઈએ કે PPC 2023 સ્પર્ધાના વિજેતાઓને વડાપ્રધાન મોદી સાથે વાર્તાલાપ કરવાની તક મળશે.