અત્યારે પરીક્ષાની સીઝન ચાલી રહી છે. આસપાસમાં નજર કરશો તો ઘણાય બાળકો પરીક્ષાની તૈયારીમાં વ્યસ્ત જોવા મળશે. તેનાથી પણ વધુ વ્યસ્ત દેખાશે માતા પિતા. કેટલાય માતા પિતા જાહેર ફંકશનમાં જવાનુ ટાળતા હશે તો કેટલાય ઘરમાં ચેનલો બંધ કરીને બેસતા હશે. બાળકોના ડાયેટથી લઇને બધી જ વસ્તુઓની ફિકર માતા પિતાને સતાવતી હશે.
જિંદગીમાં હજી ઘણી પરીક્ષાઓ થવાની છે, બોર્ડની પરીક્ષા આખરી નથી
બોર્ડના રિઝલ્ટની માર્કશીટ જિંદગીની અન્ય પરીક્ષાઓમાં ચાલવાની નથી
બોર્ડની પરીક્ષાને માતા-પિતા પોતાનો સ્ટેટસ સિમ્બોલ ન બનાવે
આજથી 25-30 વર્ષ પહેલા માતા પિતા બાળકોના ભણવામાં આટલો રસ લઇ શકતા ન હતા, તેમને લેવાની જરુર પડતી ન હતી. પહેલા પિતા પોતાના કામમાં વયસ્ત રહેતા અને માતા ઘરના કામકાજમાંથી નવરી પડે તો બાળકોના પુસ્તકો ઉથલાવી લેતી અથવા તેને ભણવા માટે ધમકાવતી અથવા કહેતી. આનાથી વિશેષ કંઇ જ નહતુ. સામાન્ય બાળકો સામાન્ય રીતે ભણી લે તો વાંધો આવતો ન હતો. બાળકોની પરીક્ષા બાળકો પુરતી મર્યાદિત રહેતી, તે માતા પિતાની પરીક્ષા કે માન-અપમાન કે સ્ટેટસનો મુદ્દો બનતી ન હતી. જિંદગી પોતાનો રસ્તો શોધી લે છે.
આજે તમારી આસપાસમાં એવા ઘણા લોકો હશે જે ખુબ જ સારું કમાતા હશે અને સ્ટેટસવાળી જિંદગી જીવતા હશે. શું તેઓ બોર્ડની એક્ઝામમાં ટોપર હતાં, શું તેઓ બોર્ડની એક્ઝામને યુધ્ધનું મેદાન સમજતા હતા, શું તેમના મા-બાપ તેમના માટે એટલા ચિંતિંત હતા, જેટલા તમે આજે છો. ના... બસ તો એટલુ યાદ રાખો જિંદગી પોતાનો રસ્તો શોધી જ લે છે, બસ તેને પોતાની રીતે વિકસવા દો. જિંદગી કોઇ પરીક્ષાની મોહતાજ બિલકુલ નથી. ઘણા લોકો તમને એવુ કહેતા પણ જોવા મળશે કે તેમણે વિચારી હતી તેના કરતા તેઓ વધુ સારી લાઇફ જીવી રહ્યા છે. MBA થયેલા પણ અહીંથી તહીંના ચક્કર કાપતા જોવા મળે તો આ બધુ કિસ્મત પર ડિપેન્ડ છે.
બાળકની રેસ જાતે ન દોડવા લાગો
બાળકોને લડો જ નહીં, કે તેમની નિષ્ફળતામાં ટોકો નહીં તેવું બિલકુલ નથી. એ પણ જરુરી છે, પરંતુ દરેક વસ્તુનુ એક માપ હોય છે અને કેવી રીતે બાળકોને સમજાવવા એ પણ જાણવું જરુરી છે. આજકાલ બાળકનું ધ્યાન ભટકાવનારા તત્વો અનેક થઇ ગયા છે. તેથી તેઓ રાહ ભટકી જાય છે, આ બધી બાબતોથી બાળકોને પહેલેથી જ દુર રાખો. છેલ્લી ઘડીએ દોડવાથી રેસ જીતી નહીં જવાય. બાળકોની રેસ તમે જાતે જ દોડવા લાગશો તો પણ બાળક જીતી જવાનું નથી. તેને પણ દોડવા દો. દરેક બાળક સુંદર પિચાઇ, વિશ્વનાથ આનંદ કે મુકેશ અંબાણી બની શકવાનું નથી. આ બધાને પણ પોતાની સાથે સામાન્ય લોકો રાખવાની જરુર પડે જ છે.
બાળકોનું ધ્યાન રાખો આ રીતે
બાળકોનું ધ્યાન એ રીતે રાખો કે પરીક્ષામાં તેની સાથે જાગો. તે શું વાંચે છે તેની પર નજર રાખો. જરુર લાગે તો તેની નાનકડી ટેસ્ટ પણ લો, જેથી તમને બાળક બનાવી ન શકે. ભણવામાં શક્ય હોય તે રીતે મદદ કરો. માત્ર ભણવા બેસ ભણવા બેસ કહીને બાળકને ટોર્ચર કરવા બિલકુલ જરુરી નથી. છેલ્લે પરીક્ષા જીવનમરણનો પ્રશ્ન છે તેવી ગ્રંથિ તેના મનમાં બંધાવા ન દો. જાણતા અજાણતા આવુ કરી બેસનારા માતાપિતાને નિરાશ કરવાનુ દુઃખ સહન ન થતા બાળક ખતરનાક પગલું ભરતા અચકાતું નથી.
બોર્ડની પરીક્ષા જિંદગીની પરીક્ષા નથી. જિંદગીમાં હજી ઘણી પરીક્ષાઓ આપવાની છે અને બોર્ડની ફર્સ્ટ ક્લાસની માર્કશીટ પણ ત્યાં નહીં જ ચાલે. બાળકોમાં પ્રામાણિકતાના ગુણ કેળવો જેથી તેઓ ભવિષ્યમાં પણ કોઇ પણ તકલીફમાંથી માર્ગ કાઢી શકે. મા-બાપ તરીકે આજ તમારી સૌથી મોટી જવાબદારી છે.