રાજસ્થાન અધ્યાપક ભરતી પરીક્ષાના પેપર લીક કાંડના તાર ગુજરાત સુધી પહોંચ્યા છે. પકડાયેલી બસને ગુજરાત પાસિંગની કાર એસ્કોર્ટ કરતી હતી. ગુજરાત પાસિંગની કારમાં માસ્ટરમાઇન્ડ સુરેશ બિશ્નોઈ બેઠો હતો. GJ-08-CC-2902 નંબરની કાર બનાસકાંઠા RTOમાં રજિસ્ટર હોવાનું તપાસમાં સામે આવ્યું છે. સાથે જ એવું પણ સામે આવ્યું છે કે આ કાર ગણપતલાલ ભગીરથરામ બિશ્નોઈના નામે ખરીદવામાં આવી હતી. ગાડીના રજીસ્ટ્રેશનમાં ડીસાના કંસરી ગામનું સરનામું નોંધાયેલું છે. હાલ આ મામલે વધુ તપાસ કરવામાં આવી રહી છે. ગાડીના માલિક અને બસના માલિકના મોબાઈલ નંબર એક હોવાની શક્યતા સેવવામાં આવી રહી છે.
અલગ-અલગ જગ્યાએથી 55 લોકોની કરાઈ ધરપકડ
રાજસ્થાન પબ્લિક સર્વિસ કમિશન (RPSC)ની વરિષ્ઠ શિક્ષક ભરતી પરીક્ષા જૂથ 'C'ના સામાન્ય જ્ઞાનના પેપરના દિવસે ઉદયપુર પોલીસે મોટી કાર્યવાહી હાથ ધરીને પેપર લીક કેસ ગેંગ અને તેમની પાસેથી પેપર ખરીદનારા ઉમેદવારોની ધરપકડ કરી હતી. ઉદયપુર પોલીસે બે અલગ-અલગ જગ્યાએથી 55 લોકોની ધરપકડ કરી હતી. જે બાદ આ મામલે પૂછપરછમાં એક પછી એક મોટા ખુલાસા થઈ રહ્યા છે. બીજી તરફ તપાસ દરમિયાન પણ આવા અનેક તથ્યો સામે આવી રહ્યા છે જેના કારણે અગાઉના પેપર પણ શંકાના દાયરામાં આવવા લાગ્યા છે.
બસને એસ્કોર્ટ કરતી કારનું ગુજરાત કનેક્શન
મળતી માહિતી મુજબ, ઉદયપુર પોલીસે જે બસ જપ્ત કરી હતી, તે બસ 20 ડિસેમ્બરથી સતત જાલોર અને ઉદયપુર વચ્ચે દોડી રહી હતી. જેના પરથી અનુમાન લગાવવામાં આવી રહ્યું છે કે આ પહેલા પણ આ બસમાં અગાઉના પેપર લીક કરીને સોલ્વ કર્યા હશે. એટલું જ નહીં બસને એસ્કોર્ટ કરતી કારનું ગુજરાત કનેક્શન પણ સામે આવ્યું છે. એસકે ટૂર કંપનીની આ બસને ઉદેપુર પોલીસે બેકરિયા નજીકથી જપ્ત કરી હતી. આ બસમાં સવાર ઉમેદવારો અને તેને એસ્કોર્ટ કરતી કારમાંથી કુલ 45 લોકોની ધરપકડ કરવામાં આવી હતી.
બસની ઉદયપુર અને જાલોર વચ્ચે સતત જોવા મળી હતી અવરજવર
ઉમેદવારો સુધી પેપર પહોંચાડવાના માસ્ટરમાઈન્ડ સુરેશ વિશ્નોઈ પણ બસને એસ્કોર્ટિંગ કરતી કારમાંથી ધરપકડ કરવામાં આવી હતી. આ બસના માલિક પીરારામ બિશ્નોઈ છે. પીરારામ સહિત બસના ચાલક નરેશની પણ પોલીસે ધરપકડ કરી ચૂકી છે. પોલીસે જ્યારે ગોગુંડા વિસ્તારના ટોલ નાકા પર સીસીટીવી ફૂટેજ ચેક કર્યા ત્યારે 20 ડિસેમ્બરથી આ બસના ઉદયપુર અને જાલોરની વચ્ચે સતત અવરજવર જોવા મળી હતી. 21મી ડિસેમ્બરે પણ પેપર હતું.
એસ્કોર્ટ કરતી કારનું ગુજરાત કનેક્શન
આ બસ 20 ડિસેમ્બર, 22 ડિસેમ્બર અને 23 ડિસેમ્બરે સીસીટીવી કેમેરામાં કેદ થઈ હતી. એટલું જ નહીં આ બસને એસ્કોર્ટ કરતી કારનું ગુજરાત કનેક્શન છે. આ કાર ગુજરાતના બનાસકાંઠા RTOમાં રજિસ્ટર હોવાનું તપાસમાં સામે આવ્યું છે. મળતી માહિતી અનુસાર, કાર ગણપતલાલ બિશ્નોઈના નામથી રજિસ્ટર છે. ઉદયપુર પોલીસે જે ધરપકડ કરી છે, તેમાં બસનો ચાલક નરેશ પણ સામે છે.