અમરેલી / રાજુલામાં દીપડો ત્રાટક્યો, પશુવાડા પર હુમલો કરતા 17 પશુઓના મૃત્યુ, માલધારીઓએ કરી સહાયની માંગ

• અમરેલીમાં વધુ એક વખત દીપડો દેખાયો 
• વનવિભાગની ટીમે કામગીરી હાથ ધરી
• માલધારીને સહાય આપવામાં આવે તેવી માંગ

અમરેલીમાં વધુ એક વખત દીપડો દેખાતા લોકોમાં ફફડાટ ફેલાયો છે. દીપડાએ રાજુલા પંથકમાં ધામાં નાખ્યા હોવાનું સામે આવ્યું છે. મોરંગી ખાતે આવેલા પશુવાડામાં આવી ચડેલા દીપડોએ આતંક મચાવ્યો હતો. બીજી તરફ આ મામલે વન વિભાગને જાણ કરાતા સબંધિત વન વિભાગના કાફલાએ દોડી જઇ દીપડાને પાંજરે પૂરવા કવાયત હાથ ધરી છે. 

અમરેલીના રાજુલામાં દીપડો ત્રાટક્યો
અમરેલી જિલ્લાના રાજુલા ખાતેના મોરંગીમાં દીપડો ત્રાટક્યો હોવાનું ગ્રામજનો જણાવી રહ્યા છે. આ દરમીયાન માલધારીઓના પશુઓ પર દીપડાએ હુમલો કર્યો હતો અને એક, બે નહિ પરંતુ 17 પશુઓના મરણ કાર્ય હોવાનું સામે આવ્યું છે. દીપડાએ પશુઓનું મારણ કરતાં માલધારી પર આભ ફાટી પડ્યું હોય તેવી સ્થિતિ સર્જાઇ છે. આ મામલે ગ્રામજનો દ્વારા તાત્કાલિક વનવિભાગની ટીમને જાણ કરવામાં આવી હતી. જેને લઈને વન વિભાગની ટીમે મોરંગી ગામે દોડી ગઈ હતી અને દીપડાને પકડવા ઠેર-ઠેર પાંજરા મૂકવા સહિતની કામગીરી હાથ ધરી હતી.  

દીપડાના હુમલામાં 17 પશુઓના મોત થયા
ચાલાક દીપડો પાંજરા નજીક આવતો ન હોવાથી લોકોમાં ભયનો માહોલ જોવા મળી રહ્યો છે. દીપડાએ પશુઓ શિકાર કરતા માલધારીને માથે ઓઢીને રોવાનો વારો આવ્યો છે. આથી માલધારી  સરકાર પાસે સહાયની માંગ સાથે ખોળો પાથર્યો છે. તો બીજી તરફ તંત્ર દ્વારા પણ સહાય માટે કાર્યવાહી શરૂ કરવામાં આવી હોવાનું  જાણવા મળી રહ્યું છે. વધુમાં અમરેલી પંથકમાં દીપડાનો ત્રાસ છશવારે સામે આવતો હોવાથી સ્થાનીકોમાં ભયનો માહોલ જોવા મળી રહ્યો છે.