સંક્રમણમાં મતદાન / પંચમહાલની મોરવા હડફ બેઠક પર પેટાચૂંટણીનો ત્રિપાંખીયો જંગ, જાણો કોણ-કોણ છે મેદાને

• મોરવા હડફ બેઠક પર મતદાન
• કોરોનાને કારણે ખાસ તૈયારીઓ
• 3 ઉમેદવારના ભાવિ થશે EVMમાં કેદ

પંચમહાલ જિલ્લાની મોરવા હડફ વિધાનસભા બેઠક પર પેટાચૂંટણીનું 17 એપ્રિલના દિવસે મતદાન થશે. મોરવા હડફની બેઠક પર 3 ઉમેદવાર મેદાનમાં છે. જેમાં ભાજપના નિમિષાબેન સુથાર, કોંગ્રેસના સુરેશ કટારા અને અપક્ષ ઉમેદવાર સુશીલાબેન મૈડા પોતાનું નસીબ અજમાવી રહ્યા છે. સવારે 7 વાગ્યાથી અલગ અલગ બૂથ પર મતદાન યોજાશે.

મોરવા હડફ વિધાનસભા પર કુલ 2 લાખ 19 હજાર 185 મતદારો છે. મતદાન માટે કુલ 124 જેટલા માઈક્રો ઓબ્ઝર્વરની નિમણૂક કરાઈ છે. 60 જેટલા મતદાન મથકો પર લાઈવ વેબકાસ્ટિંગ થશે. કોરોનાની મહામારીને લઈને પણ ચૂંટણીપંચે તૈયારીઓ સજ્જ કરી છે. કોવિડ ગાઈડલાઈન પ્રમાણે 400 થર્મલ ગન, માસ્કની વ્યવસ્થા ગોઠવવામાં આવી છે. તો 2 લાખ 25 હજાર પોલીથીન હેન્ડલ ગ્લોઝ મતદારોને અપાશે. 1260 શંકાસ્પદ કોરોનાગ્રસ્ત મતદારોને PPE કીટ પણ અપાશે.

મોરવા હડફની બેઠક પર પેટાચૂંટણીની તારીખ

મોરવા હડફ વિધાનસભા બેઠકની પેટાચૂંટણી જાહેર થઇ ગઇ છે. આગામી 17 એપ્રિલના મતદાન યોજાશે. જ્યારે 2 મેના રોજ ચૂંટણીનું પરિણામ જાહેર કરાશે. ભાજપમાંથી નિમિષાબેન સુથાર પ્રબળ દાવેદાર પહેલા જ હતા. જે બાદ હવે તેમનું નામ પણ જાહેર થઈ ગયું છે. મહત્વનું છે કે, મોરવા હડફના ધારાસભ્ય ભૂપેન્દ્ર ખાંટ ખોટા પ્રમાણપત્રને લઇ સસ્પેન્ડ કરવામાં આવ્યા હતા. ખોટા પ્રમાણપત્રનો મામલો સુપ્રીમકોર્ટ સુધી પહોંચ્યો હતો. જોકે બાદમાં ભૂપેન્દ્ર ખાંટનું નિધન થયું હતું. ભૂપેન્દ્ર ખાંટનું નિધન થતા બેઠક ખાલી જાહેર કરાઇ હતી.