બનાસકાંઠાના પાલનપુર પોલીસ હેડક્વાર્ટરમાં આગ લાગતા અફરા તફરીનો માહોલ સર્જાયો હતો. અચાનક પોલીસ હેડક્વાર્ટરમાં આગ લાગતા સમગ્ર વિસ્તારમાં ભાગ દોડ મચી ગઈ હતી. આગની જાણ ફાયર વિભાગ અને પોલીસને કરવામાં આવતા તેઓ ઘટના સ્થળે દોડી આવ્યા અને ભારે જહેમત બાદ ફાયર વિભાગના જવાનોએ આગ પર કાબૂ મેળવ્યો હતો.
પાલનપુરના પોલીસ પરેડ ગ્રાઉન્ડ નજીક આવેલા હેડ ક્વાર્ટર્સના બી બ્લોકના 17 નંબરના ક્વાર્ટર્સમાં બુધવારે મોડી સાંજે પરિવાર બહાર ગયેલો હતો જેને લઇ ક્વાર્ટર બંધ હતું અને તે સમયે અચાનક રસોડામાંથી ધુમાડાના ગોટે ગોટા નીકળતાં સમગ્ર બ્લોકમાં અફરાતફરી મચી ગઈ હતી. આગના ગોટેગોટા જોઈ બ્લોકના લોકોએ બુમાબુમ કરતા ગણતરીની મિનિટોમાં જ બ્લોકના લોકો સહી સલામત નીચે ઉતરી ગયા હતા.
ઘટનાની જાણ પાલનપુરના ફાયર ફાઇટરોને કરતાં ફાયર ફાઇટરના પાયલોટ બળદેવ ભાઇ સહિત ફાયરમેન શામળભાઇ તેમજ સંજય ભાઇએ ઘટનાસ્થળે પહોંચી ફાયર પર લાગેલી લેડરની મદદથી ક્વાર્ટરની બારીમાંથી પાણીનો મારો ચલાવી કલાકોની જહેમત બાદ આગ પર કાબુ મેળવ્યો હતો. આગ પર કાબૂ મેળવાતા સ્થાનિકોએ રાહતનો શ્વાસ લીધો. પ્રાથમિક તપાસમાં સામે આવ્યું કે શોર્ટ સર્કિટના કારણે આ આગ લાગી હતી. તો આગ લાગવાના પગલે ઘરમા રાખેલો માલ સામાન અને સામગ્રી બળીને ખાખ થઈ છે.