ઓખાના દરિયામાંથી 280 કરોડના ડ્રગ્સ અને હથિયારો સાથે ઝડપાયેલા 10 પાકિસ્તાનીઓને આજે કોર્ટમાં રજૂ કરાતા કોર્ટે આરોપીઓના 12 દિવસના રિમાન્ડ મંજુર કર્યા છે.
ગુજરાત ATSએ પકડેલા 280 કરોડના ડ્રગ્સ મામલે મહત્વના સમાચાર
10 પાકિસ્તાનીઓના 12 દિવસના રિમાન્ડ મંજૂર
ATSએ 10 પાકિસ્તાનીઓને ઓખા દરિયામાંથી ઝડપ્યા હતા
ગુજરાત ATSએ ચોખામાંથી પકડેલા 280 કરોડના ડ્રગ્સ મામલે મહત્વના સમાચાર સામે આવી રહ્યા છે. જેમાં ATSએ 10 પાકિસ્તાનીઓને ઓખા દરિયામાંથી ઝડપી લીધા હતાં. જેની પ્રાથમિક પૂછપરછ બાદ આજે રિમાન્ડની માંગ સાથે કોર્ટમાં રજૂ કરાયા હતા. જેમાં કોર્ટે આ 10 પાકિસ્તાની આરોપીઓના 12 દિવસના રિમાન્ડ મંજૂર કરાયા છે. જેને પગલે હવે રિમાન્ડ દરમિયાન વધુ ધડાકાભડાકા થાય તેવા એંધાણ વર્તાઈ રહ્યા છે.
શુ હતો સમગ્ર મામલો
ત્રણ દિવસ અગાઉ એટલે જે ગત તા. 26 ના રોજ દ્વારકા જિલ્લાના ઓખાના દરિયામાંથી 40 કિલો હેરોઈન ઝડપાતા સુરક્ષા એજન્સીઓ સતર્ક બની હતી. ATSએ હેરોઈનના મોટા જથ્થા સાથે 10 પાકિસ્તાનીઓને દબોચી લીધા હતા. હેરોઈન સાથે હથિયાર પણ મળી આવ્યા છે. જેને લઈને ગુજરાત ATSએ મુદ્દામાલ જપ્ત કરી વધુ કાર્યવાહી હાથધરી હતી.
40 કિલો હેરાઈન ઝડપાયું હતું
ભારતીય તટરક્ષક દળ(ICG) અને ATS ગુજરાત દ્વારા ગુપ્ત માહિતીના આધારે ભારતીય જળસીમામાં 10 ક્રૂ સાથે એક પાકિસ્તાની બોટને ઝડપી પાડ્યાં હતા. જેમાં હથિયારો, દારૂગોળો અને ડ્રગ્સ વહન કરવામાં આવી રહ્યું હોવાનું ખુલ્યું હતું. જેને પગલે સુરક્ષા એજન્સીએ 40 કિલો હેરાઈન આશરે રૂપિયા 280 કરોડ સહિતનો મુદામાલ કબ્જે કરી તપાસ તેજ બનાવી હતી.
કરાંચી નજીકથી આવી હતી પાકિસ્તાની બોટ
આ દરમિયાન બોટની અંદર ઉપયોગ થતાં સિલિન્ડરમાંથી ડ્રગ્સ મળી આવ્યું હતું અને હથિયાર મળી આવ્યા હતા. આ અલ સૌહેલી નામની પાકિસ્તાની બોટ કરાંચી નજીકના પોર્ટ પરથી ગુજરાત આવવા રવાના થઈ હતી. આ બોટમાંથી 10 પાકિસ્તાની પણ મળી આવ્યા હતા.
ઝડપાયેલા પાકિસ્તાનીઓની પૂછપરછ ચાલું
ભારતીય કોસ્ટ ગાર્ડ અને ATS દ્વારા સંયુક્ત રીતે ઓપરેશન હાથ ધરી ઝડપી પાડવામાં આવેલી બોટમાંથી ત્રણ સિલિન્ડર અને 40 કિલો નાર્કોટિક્સ મળી આવ્યું હતું, જેની આંતરરાષ્ટ્રીય બજારમાં કિંમત 280થી 300 કરોડ રૂપિયા થાય છે, જ્યારે બોટમાંથી 6 સેમીઓટોમેટીક પિસ્તોલ, 120 કારતૂસ અને 12 મેગઝિન મળી આવેલ છે. હાલ આ ઝડપાયેલા પાકિસ્તાનીઓની સિનિયર અધિકારીઓ દ્વારા પૂછપરછ કરવામાં આવી રહી છે.