મુશ્કેલી / આ એક ભૂલના કારણે દીકરીઓ પાકિસ્તાનમાં અને પોતે ફસાયા ગુજરાતમાં

• હરિદ્વાર દર્શન કરવા આવેલ પરિવાર ફસાયો ગુજરાતમાં
• પાકિસ્તાનથી વિઝિટર વિઝા લઇ આવ્યા ભારત યાત્રાએ
• પ્રધાનમંત્રીને મદદ માટે કરી રહ્યા આજીજી

આ પાકિસ્તાનની કચ્છી ઠાકોર પરિવાર પાકિસ્તાન પરત જઈ શક્યો નથી. પાંચ મહિના જેટલો સમય વીતી ગયો છે. બીજી અકળામણ કરાવે તેવી વાત એ છે કે, આ પરીવારમાં રાણા ભાઈને પાંચ દીકરીઓ છે બે દીકરી હાલ તેમની સાથે ભારત આવી છે જ્યારે તેમની ત્રણ દીકરીના અને એક દીકરાના આ શિયાળામાં પાકિસ્તાનમાં લગ્ન કરવાના હતા. પરંતુ તેઓ હાલ ભારતમાં હોવાથી લગ્નની તૈયારી અને અન્ય સામાજિક વ્યવહારો પૂરા કરવાની ચિંતા તેમને સતાવી રહી છે. 
 
કાયદાની ગૂંચમાં ફસાયો પરિવાર 

આ પરિવાર પાકિસ્તાનથી ભારતમાં હરદ્વાર દર્શન કરવા માટે આવ્યો હતો તેમના વિઝિટર વિઝા પર પણ હરિદ્વારનો ઉલ્લેખ છે. પરંતુ આ પરિવાર હરિદ્વારથી પોતાના કુંટુબીજનોને મળવા સરકારી પરમિશન વગર રાધનપુરમાં આવી ગયો આ સ્થિતિમાં આ પરિવારોનું પાકિસ્તાન પરત જવું કાનૂની દાવપેચમાં અટવાઈ ગયું છે. વિઝાના નિયમોને લઈને કાનૂની દાવપેચમાં ફસાયેલો આ પરીવાર અભણ અને ખેત મજૂરી પર આધારિત હોવાથી હોવાથી તેમની આર્થિક હાલત કફોડી બની છે. વિઝાના નિયમોથી અજ્ઞાન આ પરિવાર હવે  કાયદાની ગૂંચમાં ફસાયો છે.

પ્રધાનમંત્રીને કરી રહ્યો છે આજીજી 

જોકે હાલતો આ પરીવાર પ્રધાનમંત્રીને આજીજી કરો રહ્યો છે કે તેઓ આ બાબતે કંઈક હસ્તક્ષેપ કરે અને પોતાનો પાકિસ્તાન પરત ફરવાનો માર્ગ મોકળો કરી આપે. ત્યારે આશા રાખીએ કે આ ગરીબ હિંદુ પરીવાર પોતાની દીકરીઓ સાથે ખૂબ જલદી પાકિસ્તાન પરત પહોંચીને પોતાના પરિવાર સાથે મિલાપ કરી શકે. સરકાર પણ આ કિસ્સામાં કેવો માનવતા ભર્યો અભિગમ અપનાવે તે જોવું રહ્યું.