અમેરિકાના રાષ્ટ્રપ્રમુખ ડોનાલ્ડ ટ્રમ્પે અમદાવાદમાં આપેલા ભાષણથી પાકિસ્તાની મીડિયાને મરચાં લાગ્યાં છે. મોટા ભાગના પાકિસ્તાની મીડિયાએ ડોનાલ્ડ ટ્રમ્પના ભાષણને સિલેક્ટિવ રીતે કવરેજ આપ્યું છે.
અમેરિકા-પાક. સાથે સારા સંબંધો હોવાના ટ્રમ્પના ભાષણના ભાગને પ્રાધાન્ય આપ્યું
ડોનાલ્ડ ટ્રમ્પે અમદાવાદમાં આપેલા ભાષણથી પાકિસ્તાની મીડિયાને મરચાં લાગ્યાં છે
ડોનાલ્ડ ટ્રમ્પે અમદાવાદમાં પોતાના ભાષણમાં ભારત અને અમેરિકાની ઐતિહાસિક મિત્રતાની પ્રશંસા કરી હતી અને તેના કારણે આંતરરાષ્ટ્રીય સમુદાયમાં ભારતની પ્રતિષ્ઠા વધી છે, પરંતુ પાકિસ્તાને ડોનાલ્ડ ટ્રમ્પના ભાષણને જુદી જ રીતે કવરેજ આપ્યું છે.
મોટા ભાગના મીડિયાએ પાકિસ્તાનમાં ટ્રમ્પના ભાષણના એ ભાગની ઉપેક્ષા કરી કે જેમાં ટ્રમ્પે ભારતની પ્રશંસા કરી છે. તેના બદલે કેટલાક પાક. મીડિયાએ ટ્રમ્પના ભાષણના એ ભાગની પ્રાથમિકતા આપી છે, જેમાં તેમણે એવુ જણાવ્યું હતું કે અમેરિકા અને પાકિસ્તાન સારા મિત્રો છે.
પાકિસ્તાનની મોટા ભાગની વેબસાઇટ અને અખબારોએ ટ્રમ્પના અમદાવાદમાં અપાયેલ ભાષણનું હેડિંગ લગાવ્યું છે કે ટ્રમ્પે અમદાવાદમાં જણાવ્યું કે અમેરિકા પાકિસ્તાન સાથે છે અને અમેરિકાને પાકિસ્તાન સાથે સારા સંબંધો છે. પાકિસ્તાનના જાણીતા ડોન અખબારે ટ્રમ્પના આતંકવાદ પર અપાયેલ ભાષણના સમગ્ર ભાગને કવરેજ આપ્યું છે જ્યારે ધ એક્સપ્રેસ ટ્રીબ્યૂન, જિઓ ન્યૂઝ, ધ ન્યૂઝ એન્ડ ડેઇલી ટાઇમ્સ જેવાં મીડિયા ગ્રૂપે ટ્રમ્પના ભાષણનો સંપૂર્ણ અહેવાલ પ્રસિદ્ધ કર્યો નથી.
આ અખબારોએ માત્ર એ જ ભાગને પ્રાધાન્ય આપ્યું છે, જેમાં ટ્રમ્પે એવું જણાવ્યું હતું કે અમેરિકા અને પાકિસ્તાન વચ્ચે સારા સંબંધો છે. ડોન ન્યૂઝ પેપરે ટ્રમ્પ અને મોદી પર એક મોટો તંત્રીલેખ લખ્યો છે, જેમાં એવું જણાવાયું છે કે ડોનાલ્ડ ટ્રમ્પ અને નરેન્દ્ર મોદી બંને એકસરખા છે અને બંને નેતાઓની વિચારધારા જમણેરી છે. બંને નેતાઓ લઘુમતીઓની ઉપેક્ષા કરે છે.