દિલ્હી / પાકિસ્તાની હિંદુ શરણાર્થી મહિલાએ પોતાની નવજાત બાળકીનું નામ ‘નાગરિકતા’ રાખ્યું

• રાજ્યસભાએ નાગરિકતા સુધારા વિધેયક-ર૦૧૯ પર મંજૂરીની મહોર મારતાં જ હવે રાષ્ટ્રપતિની મંજૂરી સાથે આ વિધેયક કાયદો બની જશે
• એક પાકિસ્તાની હિંદુ શરણાર્થી મહિલાએ પોતાની બે દિવસની નવજાત બાળકીનું નામ નાગરિકતા રાખ્યું

પાકિસ્તાની હિંદુ શરણાર્થી મહિલાએ પોતાની બે દિવસની નવજાત બાળકીનું નામ નાગરિકતા રાખ્યું

આ વિધેયક પાસ થવાની સાથે જ ખાસ કરીને પાકિસ્તાની હિંદુઓમાં ખુશીનો માહોલ છવાઇ ગયો છે. આ વિધેયક પાસ થવાની ખુશીમાં મજનુકા ટીલા પાસે રહેતી એક પાકિસ્તાની હિંદુ શરણાર્થી મહિલાએ પોતાની બે દિવસની નવજાત બાળકીનું નામ નાગરિકતા રાખ્યું છે.

આરતી નામની આ મહિલાએ પોતાની નવજાત બાળકીનું નામ નાગરિકતા એટલા માટે રાખ્યું છે, કારણ કે આ બાળકીનો જન્મ થવાની સાથે જ આ વિધેયક પાસ થયું હતું અને તેને આશાનું કિરણ નજરે પડયું છે કે વર્ષોથી જે ઓળખ માટે તેઓ લડી રહ્યા હતા તેમને હવે આ ઓળખ પ્રાપ્ત થશે.

રાજ્યસભામાં નાગરિકતા સુધારા વિધેયક-ર૦૧૯ પસાર થવાની સાથે જ દિલ્હીના મજનુકા ટીલા વિસ્તારમાં વર્ષોથી રહેતા પાકિસ્તાની હિંદુ શરણાર્થીઓની વસાહતમાં ઉત્સવનો માહોલ સર્જાયો હતો. તેમણે ફટાકડા ફોડીને તેમજ સીટીઓ વગાડીને આ વિધેયકનું સ્વાગત કર્યું હતું. સમગ્ર વાતાવરણ ભારત માતા કી જય અને જયહિંદના નારાથી ગૂંજી ઊઠયું હતું. આબાલ વૃદ્ધે એકબીજાને અભિનંદન પાઠવ્યાં હતાં અને મોં મીઠાં કરાવ્યાં હતાં.