પાકિસ્તાનથી આવેલા એક ડ્રોન દ્વારા હેરોઇનનો જથ્થો ભારતીય સરહદ સુધી પહોંચાડવામાં આવ્યો છે. ત્યારે BSF જવાનોએ ડ્રોન પર ફાયરીંગ કર્યું હતું.
ભારત પાકિસ્તાન બોર્ડર પર ફરીવાર દાણચોરીની ઘટના
પાકિસ્તાન ડ્રોનની મદદથી ભારતમાં ડ્રગ્સ ઘુસાડે છે
BSF ના જવાનોએ ડ્રોન પર હુમલો કરતા તેમાંથી ડ્રગ્સ મળ્યું
ભારત-પાકિસ્તાન ઈન્ટરનેશનલ બોર્ડર પર ડ્રગ્સની દાણચોરી અટકવાનું નામ નથી લઈ રહી. ફરી એકવાર સરહદ પાર પાકિસ્તાનથી આવેલા એક ડ્રોન દ્વારા હેરોઇનનો જથ્થો ભારતીય સરહદ સુધી પહોંચાડવામાં આવ્યો છે. પરંતુ આ દરમિયાન સીમા પર પાકિસ્તાની ડ્રોનને જોઇને બીએસએફના જવાનોએ તેના પર ફાયરિંગ કરી તેને ભાગવા માટે મજબૂર કર્યો હતો. પરંતુ આ સમગ્ર કાર્યવાહી દરમિયાન પાક.ના દાણચોરોને ભારતીય સીમા સુધી ડ્રગ્સ પહોંચાડવામાં સફળતા મળી હતી. આ પહેલીવાર નથી જ્યારે ડ્રોન દ્વારા પાકિસ્તાનથી ડ્રગ્સની દાણચોરી કરવામાં આવી હોય. આવું અગાઉ પણ ઘણી વખત બની ચૂક્યું છે.
મોડી રાત્રે ડ્રોન જોવા મળ્યું
જાણકારી મુજબ લેટેસ્ટ મામલો શ્રીગંગાનગર જિલ્લાના અનુપગઢ વિસ્તારમાં બન્યો છે. શનિવારે મોડી રાત્રે અનુપગઢમાં કૈલાશ પોસ્ટ પર ભારત-પાક આંતરરાષ્ટ્રીય સીમા પર એક પાકિસ્તાની ડ્રોન દ્વારા ભારતીય સીમામાં ઘૂસણખોરી કરવામાં આવી હતી. પાકિસ્તાની ડ્રોનને જોઇને બોર્ડર પર તૈનાત બીએસએફના જવાનોએ પોતાની બંદૂકોનો રંગ બતાવ્યો હતો. જણાવવામાં આવી રહ્યું છે કે ફાયરિંગ બાદ ડ્રોન ગાયબ થઈ ગયું હતું. ત્યાર બાદના સર્ચ ઓપરેશનમાં બીએસએફના જવાનોને ત્યાં એક પેકેટમાં હેરોઇન મળી આવ્યું હતું.
On the intervening night of 1-2 Oct, BSF troops at Sri Ganganagar, Rajasthan fired on hearing a buzzing sound of a drone in general area of Anupgarh; rogue drone dropped the consignment haphazardly and returned. On search four packets, suspected narcotics found: BSF pic.twitter.com/k4VQWBrsYP
ભારત-પાકિસ્તાન બોર્ડર પર સર્ચ ઓપરેશન
બીએસએફ દ્વારા મળી આવેલા પેકેટમાં લગભગ સાડા ત્રણ કિલો હેરોઇન હતું. ફાયરિંગ કર્યા બાદ આ ડ્રોન પાકિસ્તાનની સીમામાં પાછું ગયું અથવા તો તેને નુકસાન પહોંચ્યું અને તે ભારતીય સરહદમાં પડી ગયું. તેનો હજુ સુધી સંપૂર્ણ ખુલાસો કરવામાં આવ્યો નથી. ડ્રોનની શોધમાં ભારત-પાક સીમા વિસ્તારમાં સર્ચ ઓપરેશન ચલાવવામાં આવી રહ્યું છે. ભારતીય સરહદમાં ડ્રોનની હાજરીને કારણે બીએસએફના જવાનો એલર્ટ મોડ પર આવી ગયા છે.
ઘણા ભારતીય તસ્કરો આપે છે સાથ
ઉલ્લેખનીય છે કે ભારત-પાક બોર્ડર પર પાકિસ્તાની તસ્કરો ઘણા સમયથી ભારતમાં ડ્રગ્સની દાણચોરી કરી રહ્યા છે. આ કામમાં સરહદી વિસ્તારમાં સક્રિય ભારતીય ડ્રગ દાણચોરો તેમની મદદ કરે છે. સ્થાનિક દાણચોરો ડ્રોન અથવા અન્ય માધ્યમથી ભારતીય સરહદમાં ફેંકી દેવામાં આવેલા હેરોઇનને પંજાબ લઈ જાય છે. આના બદલામાં તેમને મોટી રકમ આપવામાં આવે છે. બીએસએફ અને સ્થાનિક પોલીસે અગાઉ પણ અનેક વખત આવા તસ્કરોને પકડી પાડ્યા છે. પરંતુ તેમ છતાં સરહદ પારથી ડ્રગ્સની દાણચોરીનો આ ટ્રેન્ડ અટકવાનું નામ નથી લઈ રહ્યો.